QVand Dieu feit publier sa Loy en la mõtagne d'Horeb , apres auoir retiré le peuple de la captiuité d'Egypte,il mõstroit par cela à quelle fin & intention il auoit eu pitié de son peuple pour le deliurer : c'est à ce qu'il en fust glorifié: comme aussi il nous faut rapporter toutes les graces que Dieu nous eslargit , à ce but-la. Zacharie pere de sainct Iean Baptiste,parlant de la grande & souueraine deliurance qui a este faite en la personne de nostre Seigneur Iesus Christ, dit, que Dieu nous a retirez de la main &tyrannie de nos Luc I.74. ennemis: afin que nous le seruions tout le tẽps de nostre vie en sainctete & iustice. Et c'est vne doctrine assez commune en toute l'Escriture saincte. Et voila pourquoy aussi il est dit par le Prophete Isaie , que Dieu a creé vn peuple lequel racontera Isa.43.31. sa louange. Puis qu'ainsi est donc , que la Loy fut donnee au peuple , afin de luy faire sentir pourquoy il auoit este deliuré de la seruitude d'Egypte, c'estoit bien raison qu'il se dediast du tout à l'obeissance de Dieu,qui s'estoit ainsi monstre Redempteur . Mais le peuple se fasche, & ne se peut rendre docile pour escouter ce qu'on luy propose au Nom de son Dieu.Neantmoins si est- ce qu'il le deuoit bien faire , apres auoir senti vn tel bien,& si inestimable:car Dieu auoit desployé son bras robuste, quand le peuple fut deliuré. Il deuoit donc cognoistre , Voici nostre Dieu qui s'est magnifié d'vne façon admirable enuers nous, nous auons eu comme vne presence visible de sa maiesté : si les cieux se fussent ouuerts , & que Dieu se fust mõstre à l'œil en personne,nous n'eussions pas eu tesmoignage plus ample ne plus indubitable qu'il nous estoit prochain , qu'il estoit nostre conducteur. Or puis que Dieu est ainsi descendu à nous,qu'il luy a pleu de nous communiquer ainsi sa bonté : n'est ce pas raison que nous soyons du tout siens? Et d'autant qu'il nous a tendu la main pour nous racheter, ne faut-il pas que nous soyons son heritage, quand il nous a acquis par sa vertu? Le peuple donc s'il eust eu vn grain de prudence , deuoit bien se ranger en toute humilité pour receuoir la doctrine qui luy estoit preschee par Moyse. Et mesme quelle authorite meritoit la Loy , qui estoit ainsi approuuee par tant de miracles?Car Dieu ne commande pas simplement à Moyse de parler, apres l'auoir choisi pour son prophete:mais il le tire en la montagne, il le separe de la compagnie des hommes,afin que quand il viendra mettre en auant la Loy,qu'on le tienne comme vn Ange,& non point comme vne creature mortelle. Il a este là quarante iours sans boire ne sans manger : pour monstrer qu'il a este exempté du rang commun des hommes , & que Dieu l'auoit recueilli comme en sa gloire celeste. Moyse vient-il? il y a en sa face vne clarté si grãde, qu'il semble que ce soit vn soleil.Au lieu qu'on luy attribue des cornes, il est dit,qu'il y auoit des rayons de soleil tout à l'entour , c'est à dire , vne telle splendeur qu'il falloit qu'il meist vn voile deuant sa face.Et à quoy seruoit cela,sinon pour ratifier & approuuer la Loy que Dieu luy auoit dõnee , & qui luy estoit cõmise & qu'on cogneust que ce n'est pas vne doctrine forgee d'vn homme caduque?Et au reste,voila les tõnerres & esclairs, les trompettes qui sonnẽt:qu'il semble que tout le le monde doiue estre comme abysmé, il n'y a lieu ne haut ne bas qui n'en soit esmeu,& qui ne trẽble quand il est question que Dieu prononce sa voix. Quãd dõc la Loy est si biẽ seellee, & auec vne telle maieste, ne faut-il pas que le peuple soit plus que stupide , de n'escouter point son Dieu parlant auec vne telle force? Or tant y a que la Loy est mesprisee:& mesmes cependant que Dieu prepare son seruiteur Moyse pour la publier , voila le peuple qui n'a point patience que la volõte de Dieu luy soit apportee: mais il se forge le veau d'or , il n'est question que de bastir des superstitions nouuelles: voire despitant le Dieu , duquel il auoit tant experimenté la vertu & la grace. Au reste,encores que la Loy soit donnee,tant y a que pour vn peu de temps le peuple tremble & fremit, mesmes il est cõtraint de dire , Si Dieu parle à nous , c'est faict , nous sommes tous peris : & se tient loin de la montagne ( comme aussi il luy est cõmandé). Il y a dõc quelque reuerẽce, ce semble: mais l'issue monstre qu'il n'y a qu'hypocrisie, & cognoist-on bien qu'ils n'estoyent point touchez droitement en leur cœur , qu'ils n'auoyent point prins vne racine viue pour profiter en la doctrine Nous voyons donc en somme,quand Dieu a publié sa Loy pour le premier coup,qu'elle a eu vne poure audience & bien maigre, & que le peuple n'estoit pas encores disposé à se laisser ranger comme il appartenoit.Or pour ceste cause il a falu que Dieu y retournast, combien que le peuple ne fust pas digne que Dieu feist encores seruir Moyse en cest office. Car n'estoit-ce pas raison que ceux qui avoyent ainsi mesprisé le Dieu viuant,fussent là destituez de toute verite que le diable en prinst possession: qu'il les aveuglast du tour,& qu'ils fussent affamez de la pasture de vie: qu'ils fussent empoisonnez de toutes les faussetez & erreurs de Sathan? Il est vrai que le peuple estoit digne d'vn tel salaire: mais Dieu n'a point eu esgard à ce que ces pPoures gens auoyent merité : car il a surmonté leurs pechez par sa bonté infinie,& a cõtinué mesmes à les enseigner, combien qu'ils se fussent monstrez tant farrouches & rebelles , & qu'il y eust eu de l'ingratitude auec l'obstination , telle qu'il sembloit qu'il n'y eust nul moyen ni approche pour profiter: si est-ce qu'encores Dieu vsant de sa misericorde,a voulu essayer si le peuple ne le laisseroit point reduire. Et voila pourquoy Moyse non seulement a publié la Loy en Horeb:mais voyant la legereté & inconstance du peuple , a vsé quant & quant d'exhortations vehementes,& a mis peine,& s'est efforcé en toutes façons de le reduire à Dieu.Or en la fin , Dieu encores a voulu qu'il y eust vn sommaire final de la Loy, & qu'elle fust confermee, comme il est contenu en ce Liure. Et voila pourquoy il est intitulé Deuteronome, qui signifie autant que la Loy reiteree. Non point que Dieu ait ici rien amené de nouueau: mais il a redargué le peuple de ceste malice que nous auons dit: monstrant que sa doctrine auoit este mal obseruee. Comme quand des enfans auront mal profité à l'escolle , qu'ils seront de gros asniers,apres que ils auront este vn an sans aduancer , il les faut retourner à l'A B C. Pourquoy? Ayans ouy le maistre, les voila ignorans comme deuant: qu'au lieu d'auoir comprins quelque chose , on voit qu'ils sont demeurez tels qu'ils estoyent auparavant. Ainsi donc nostre Seigneur reproche au peuple d'Israel vne stupidité brutalle,en luy declarant la Loy pour le second coup.Cõme s'il disoit , Vous estes biẽ mauuais escoliers:car ie vous auoye enseigné suffisamment en ma Loy:la doctrine qui estoit contenue aux dix parolles, cõtient toute perfection de sagesse. Or cela ne vous a point suffi, d'autant que vous n'auez point eu les aureilles, ou vous les auez eu trop longues,cependant rien ne vous est entré au cœur,mesmes vous n'auez riẽ entendu à ce que ie vous disoye , il faut donc que vous retourniez à vostre premiere leçon ,& à vostre A B C, que ie vous declare ma Loy, & que ie vous la masche , afin que vous la puissiez mieux digerer.Et d'autãt que vous estes ainsi dures à l'esperõ, il faut que ie vous picque: que i'vse de plus grande vehemẽce pour vous resueiller,& que ceste durté que ie voy en vous soit corrigee.Maintenant donc nous voyons en somme quel est l'argument de ce liure:c'est assauoir, que Dieu ayant desia auparauãt donné sa Loy au peuple d'Israel, l'ayant approuuee autant qu'il estoit requis à cause de la durté & rebellion du peuple,a voulu encores donner plus ample declaration de la Loy que Moyse auoit desia reduite par escrit. Et non seulement il a declaré la Loy: mais quant & quãt il a sollicité le peuple à l'obseruer mieux qu'auparauant: & luy a reproché sa villenie, de ce qu'il auoit este si sauuage , & de son Redempteur. Or tout ce que nous voyons en ce peuple- la,nous appartient. Et pleust à Dieu que nous ne ressemblissions en rien aux Iuifs , ie di quant à cest endroit:mais s'il y a eu de ce tẽps-la trop de durté ,auiourd'huy cõbiẽ en trouuera-on en no9us? Car nostre Seigneur n'a point seulement parlé vn iour pour nous enseigner.Si la Loy a bien este ratifiee en la main de Moyse,l'Euãgile a-il auiour d'huy moins d'approbation? Si la terre a este esmeuë, si les trompettes ont sonné,que les esclairs ayent volé , que les tonnerres ayent este ouis,l'Euangile a esmeu le ciel & la terre ( comme il est dit par le Prophete Aggee ) & que l'Apostre l'allegue Agg. 2.7 Heb. 12.26. 2. Cor. 3-7. en l'Epistre aux Hebrieux.Et nous oyons aussi ce qu'en traitte S. Paul au 3. de la seconde aux Corinthiens. Qu'il faut bien(dit-il) que ce message de vie & de salut , qui est contenu en l'Euangile, soit glorifié autant ou plus que la doctrine de la Loy , qui estoit mortelle de soy , & qui ne pouuoit viuifier les hommes. Puis qu'ainsi est donc que Dieu a declaré vne si grande maieste en l'Euangile, & que ce n'a point este pour vn iour qu'il nous est annoncé , mais nous en auons les aureilles batues tous les iours:regardons si nous sommes bons disciples , si nous retenons ce qui nous est monstré, tellement que Dieu soit honoré de nous.Sommes-nous conioints à luy? Helas! il s'en faut beaucoup. Car quelque chose que Dieu persiste à nous proposer sa doctrine,là où nous voyons comme son cœur desployé enuers nous, tant y a que nous sommes serrez de nostre costé, & ne luy donnons nulle ouuerture : ou bien nous sommes volages , & pleins de vanité , qu'il s'en faut beaucoup q̃ la doctrine nous touche , q̃ nous la receuions pour nous y retenir du tout, & pour pour y auoir nos sens enclos, & cõfermez en vne droite obeissance.On verra plustost l'opposite.Et ainsi cognoissons que le peuple des Iuifs nous est comme vn miroir auquel nous pouuons contempler nostre rudesse , nostre malice , nostre ingratitude, nostre rebellion obstinee à l'encontre de Dieu.Au reste,nous sommes plus coulpables que les Iuifs,pource que nous donnons vne si poure audience à nostre Dieu. Car nous auons desia dit, que le peuple ancien, apres auoir este deliuré de la seruitude d'Egypte , se deuoit sentir obligé à Dieu pour s'addõner & dedier pleinement à son seruice. Et d'où est-ce que maintenant Dieu nous a retirez? a-ce este de la tyrannie d'vn homme mortel , ou d'vn peuple terrien? Mais nous sauons qu'il nous a rachetez des liens de peché & du diable: il nous a retirez du gouffre de mort: il nous a deliurez des abysmes d'enfer,& ne nous a point promis seulement la terre de Chanaan pour heritage , mais les cieux nous ont este ouuerts en la personne de nostre Seigneur Iesus Christ,il en a prins possession pour nous,afin que nous soyons asseurez que là nous auons nostre siege appresté,& nostre repos permanent. Quand donc Dieu nous a ainsi obligez à soy , nostre ingratitude n'est-elle pas plus vilaine au double, voire cent fois plus que celle du peuple ancien? Au reste, puis qu'ainsi est que Dieu a bien daigné continuer l'office de Maistre & Docteur enuers ce peuple-la qui estoit tant rude & rebelle , cognoissons qu'auiourd'huy il fait le semblable en nous. Et aussi il nous est besoin , comme i'ay desia dit,autrement que seroit-ce? Mais voyant vne telle grace , c'est que Dieu ne se fasche point de nous enseigner , encores qu'il ne profite gueres du premier iour , ne du premier an , sachons que s'il nous traitte ainsi de iour en iour, q̃ cela n'est point superflu. Et c'est vn poinct bien à obseruer: car les hommes ont les aureilles chatouilleuses, & ne demandent sinon qu'on leur apporte quelque nouueaute : & quand la doctrine de Dieu leur sera preschee & proposee chacun iour , ils s'en faschent, & en sont ennuyez. Car il leur semble que c'est assez de leur auoir dit vn coup ou deux, & ne regardent pas comme ils mettent en oubli ce qu'ils deuoyent auoir entẽdu. Ainsi dõc afin que la doctrine qu'on nous presche ne nous soit point fascheuse, notons qu'il est besoin que Dieu nous ramentoyue ce que desia il nous auoit enseigné : car nous auons courte memoire enuers luy. Et pensons bien toutes fois & quantes qu'on nous met au deuant , qu'il y a vn Dieu , auquel nous sommes : & que non seulement il nous est createur , mais qu'il nous est pere,nous ayant adopté pour ses enfans,& puis, apres nous auoir rachetez par le sang de son Fils , qu'il nous a attirez à soy d'vn lien plus estroit. Quand cela nous est ramentu,si nous l'auons desia ouy auparauant, ne disons point, Et cela nous auoit esté presché: mais que chacun entre en soy , qu'on s'examine,& qu'on cognoisse si ce que nous auõs ouy est bien imprimé en nos cœurs. Entrons donc en ce conte. Et pourquoy? Car si nous auions bonne memoire,que nous sommes mis en ce monde afin de glorifier nostre Dieu : n'aurions nous pas autre affection de nous acquitter enuers luy?Si nous pensions à la douceur paternelle de laquelle il vse quand il nous appelle pour ses enfans, & laquelle il nous a desia monstree vn coup, quãd il nous a adoptez en la personne de son Fils: si nous regardions combien nous auons cousté à nostre Seigneur Iesus Christ,quãd il nous a affrãchis de la mort eternelle:ne seriõs-nous poĩt affectionnez à nous dedier du tout à nostre Dieu ? ne seriõs-nous point esmeus à luy porter autre reuerence que nous ne faisons pas? Ainsi donc quand nous sommes sauuages, que le monde nous transporte, que nous sommes enuelopez de nos cupiditez & affections terrestres, cognoissons que c'est d'autant que nous n'auons point bien escouté nostre Dieu quand il parloit à nous, s'il nous aduertit de nostre deuoir,nous n'y regardõs point. Et ainsi il est bon que la memoire nous en soit refreschie, & que Dieu reuiẽne à nous,& qu'il nous declare, Poures gens,qu'est-ce que ceci veut dire? quand ie vous ay enseignez, vous deuiez estre tout cõfits en la doctrine qui est cõtenue en ma parolle : & cependãt vous estes encores comme des petis enfans. Voila ( di-ie ) ce que nous auons à faire,voire afin de prendre goust à la parole de Dieu, & pour en estre nourris comme de nostre pasture ordinaire. Que nous sachions que ce n'est point en vain que cest ordre a este constitué, que tout le temps de nostre vie on nous presche, que nous ayõs les aureilles batues de ce que nous deurions auoir compris en vn mois,ou en deux. Au reste,si nous n'en faisons ainsi, c'est que tout le temps de nostre vie nous ne soyons appriuoisez à escouter nostre Dieu , & que nous ne souffrions d'estre enseignez de luy : craignons qu'il n'execute sur nous ceste vengeance,de laquelle il a vne fois menacé le peuple d'Israel par son Prophete Isa.29.11. Isaie,disant,Que sa Loy sera comme vn liure clos & cacheté : & que si on le presente aux gens sauans,ils diront, Ce ne sont pas lettres ouuertes, il y a vn cachet dessus , ie ne puis pas dire ce qui est là dedãs. Si on la presentoit à des idiots & gẽs non lettrez,ils dirõt, Nous ne sommes pas clercs, & n'auons point este à l'escole , nous ne saurions lire.Voila comme Dieu punit tous ceux qui cheminent en leur brutalité,& ne se veulent iamais ranger à luy. Il est vray que pour vn temps il nous supporte , & ( comme desia i'ay dit ) encores que nous soyons dignes d'estre retranchez de sa maison , d'estre priuez de sa verite , qu'il nous deuroit bailler entre les mains de Sathan, afin qu'il nous aueuglast de mensonges , & que nous en fussions empoisonnez: tant y a que nostre Dieu ayant pitié de nous,encores essaye s'il nous pourra gagner à soy. Mais si à la longue nous persistons tousiours à reietter la bonne doctrine , & que nous ne profitions non plus au bout de l'an q̃ le premier iour,il faudra que ceste menace s'accõplisse sur nous,c'est, Que nous preniõs l'Escriture saincte entre les mains,& qu'elle no9us soit preschee,touteffois q̃ nous n'y entẽdrõs riẽ,encores que nous soyõs biẽ subtils.Et quãd les gens idiots diront,Ie ne say que c'est,q̃ les plus sauans & plus aigus ayent cela cõme des lettres closes & cachettees.Craignons donc vne telle menace , & que la clarte ne nous soit conuertie en tenebres , & retenons ceste opportunité que Dieu auiourd'huy nous presente, que nous puissions faire nostre profit d'vn tel biẽ quand il continue ainsi de parler à nous. Or il est vray que ce qui est ici contenu,a este dit au peuple d'Israel,& luy a peu profiter pour son temps : mais auiourd'huy il nous appartient , & ce nous est vn thresor commun duquel Dieu veut que nous soyons participans. Car (comme nous verrons ) la Loy n'a pas este seulement donnee comme vne reigle de bien viure: mais elle est fondee sur l'alliance que Dieu auoit faite auec Abraham, & auec son lignage.Et en vertu de ceste alliance-la, nous sommes Gal. 3.29 heritiers du royaume celeste, comme S.Paul le monstre. Et pour cercher nostre salut il nous faut venir à ceste promesse qui a este dõnee à nostre pere Abrahã: & q̃ nous soyõs son lignage spirituel, pour estre domestiques de l'Eglise de Dieu, pour estre membres de nostre Seigneur Iesus Christ. Par cela donc nous voyons, que ceste doctrine n'a pas serui seulement iusques à la venue du Fils de Dieu : mais qu'elle nous est vtile, & sera iusques à la fin du monde. Car c'est vn bastiment qui est fondé sur ceste alliance eternelle, de laquelle ( comme i'ay dit) nostre salut procede, comme de sa vraye source. Au reste notons, quand Dieu parlera d'oresenauant aux Iuifs, que cela s'adresse à nous: voire, & qu'il nous le faut receuoir en telle sorte , que nous cognoissions que Dieu a estendu sa grace par tout le monde à la venue de son Fils vnique , & qu'il a basti Ierusalem celeste, afin que nous soyons tous associez en vne fraternité saincte , pour l'inuoquer d'vne bouche nostre pere. Puis qu'ainsi est donc , cognoissons que c'est bien raison que nous soyons addonnez à luy , & qu'il nous tienne comme en bride, & qu'il iouisse de nous , & que cõme il luy a pleu se donner à nous,que nous soyons siens de nostre costé , que nous luy rendions le deuoir qu'ont les enfans à leur pere:& si nous sommes lasches & tardifs à cela , que pour le moins nous soyons esmeus des exhortations qui sont contenues en ce liure. Et voyant que Dieu vse de vehemence , que nous ne facions point l'aureille sourde: mais que chacun s'esueille, & que chacun se redargue. Et mesmes (si nous estiõs bien sages) nous ne devriõs point attendre que Dieu nous sollicitast si asprement, nous deurions plustost anticiper: mais c'est pour le moins quand Dieu vse de corrections,& qu'il tonne, & qu'il nous menace , & qu'il nous reproche nos pechez,que nous soyons esmeus, afin d'auoir honte de nostre turpitude , afin de retourner à luy. Voila en somme ce que nous auons à obseruer en ce liure en general.Or venons maintenant au texte que nous auons recité. Ce sont les parolles que Moyse prononça au peuple au desert, en la planure (ou au lieu champestre)outre le Iourdain , voire depuis Horeb iusques aux lieux qui sont ici recitez. En ceci nous auõs à noter que Dieu vouloit redarguer le peuple de ce qu'il n'auoit pas retenu la Loy , qui non seulement luy estoit preschee de bouche, mais aussi couchee par escrit. Comme si on faisoit vn instrument authentique de quelque contract, & de quelque conuenance entre deux parties . Et Dieu mesme auoit voulu engrauer sa Loy , au moins les dix paroles , dedans deux tables , afin que la memoire en fust plus grande. Car le peuple n'auoit point receu la doctrine,combiẽ qu'elle fust assez claire de soy , & que Dieu eust proueu afin qu'on ne la mist pas en oubli. Il reproche donc maintenant à ce peuple-la , comme quand il nous seroit dit, Voici l'Euangile de nostre Seigneur Iesus Christ qui a este laissé par escrit , apres auoir este publié en vne telle vertu & maieste. Nous auons l'Euangile qu'on nous presche desia de long temps,l'Euangile qui nous est exposé par liures. Nous sommes donc inexcusables tant à plus, si nous ne sauons ce que Dieu veut ici dire.Quand on parlera ainsi,c'est pour nous accuser de nostre bestise. Et puis quand on dira, qu'estans baptisez au Nom du Fils de Dieu dés nostre enfance, nous ne l'auons point cogneu: qu'estans paruenus en aage d'homme , nous auons este si brutaux, qu'ayans escouté tãt de fois la verite de Dieu , nous y sommes tant nouueaux , & que nous ne sauons à grand'peine que c'est , pour le moins que nous n'y auons prins gueres de goust. Voila nostre proces qui est formé, quand on parlera ainsi de l'Euangile , comme de long temps il nous est presenté,voire en plusieurs façons. Ainsi maintenant Moyse, pour faire vne protestation que le peuple s'estoit monstré par trop ingrat à Dieu , dit notamment , Voici les parolles que i'ay publié, & que i'ay presché derechef,non seulement pour vn iour,mais depuis que la Loy fut publiee en la montagne d'Horeb. Et pource que le peuple s'estoit monstré si mal disposé, ie n'ay cessé de luy refreschir la memoire des choses qu'il auoit desia entendues. Or par cela apprenons d'estre mieux incitez , quand nous voyons que nostre Dieu dés le commencement du monde a voulu que sa verite eust certain tesmoignage entre les hommes , a qu'il n'a cessé de lap roduirela produire en auant,& quand les hommes l'ont voulu enseuelir par leur malice , qu'il l'a cõme ressuscitee: cognoissons en cela sa bonte admirable , & soyõs esmeus à receuoir ce qu'il no9us sera dit. Voila pour vn item. Mais afin que nous soyons mieux affectionnez,il nous faut aussi poiser ce mot que Moyse adiouste, Voire selon tout ce qui luy estoit commandé de Dieu . Or par ceste preface il declare , qu'il n'a rien apporté du sien , qu'il n'a point voulu assuiettir le peuple à ses resueries , ni mesmes à ce qu'il auoit peu inuenter par bonne raison à prudence quant aux hommes , que simplement il a obey à Dieu,& qu'il a este vn messager fidele & loyal sans decliner ni à dextre ni à fenestre. Or si Moyse,qui a eu vn tesmoignage si excellent, Deut.34.10. comme nous voyons que iamais Dieu n'a suscité vn prophete pareil ni egal à luy. Si donc Moyse qui a este le prince des prophetes , apres Iesus Christ,mais sous la Loy ancienne il est le principal, s'il a protesté touteffois qu'il n'aduançoit rien de son propre,ie vous prie, que sera-ce des autres? autres?se pourront-ils accomparer à luy?Mais prenons le cas qu'ils soyent aussi haut esleuez & iuchez,si est-ce neantmoins que voila le degré où il faut qu'ils demeurent , c'est qu'ils anoncent ce que Dieu leur a commandé. Et ainsi apprenons que la porte est ici fermee à toutes doctrines humaines. Et par cela voit-on comme le Pape a depraué & corrompu tout l'ordre de l'Eglise,quand il s'est constitué legislateur , qu'il a inuenté & imposé des loix à son plaisir, qu'il a forgé & controuué des articles de foy , qu'il a voulu que ce qu'il auoit imaginé fust receu comme Escriture saincte : n'est-ce point tout peruertir? Car iamais Dieu n'a voulu que ceste licence dominast en son Eglise , que les hommes proposassent rien de leurs inuentions : mais il a voulu estre escouté luy seul. Voila pour vn item. Mais encores y a- il plus: car il n'est pas seulement dit , que Moyse a parlé selon la charge qui luy estoit donnee, mais selon tout ce que Dieu luy auoit commandé. Il monstre donc qu'il n'a point fait comme vn meslinge, qu'il n'a point cerché en façon que ce fust d'apporter ce que bon lui sembloit , pour se separer de la parolle de Dieu:mais qu'il a suyui de poinct en poinct iusques au bout ce que Dieu vouloit. Voila donc vne grande simplicité qui a esté en Moyse , c'est qu'il n'a point seulement anoncé ce qu'il tenoit de Dieu:mais qu'il a demeuré du tout en ceste simplicite-la , qu'il n'a point passé sa mesure, qu'il n'a point voltigé pour dire , Ceci est bon , i'ay vne telle opinion de ceci : non, mais en tout & par tout il s'est reiglé à la charge de son office , que selon qu'il auoit ouy Dieu parler, il a annoncé le message.voila pour le second. Or cependant nous sommes admonnestez de receuoir la doctrine ici contenue,non point comme venante d'vn homme mortel. Moyse a parlé,protestant qu'il n'est pas le maistre , quand il nous recordera nostre leçon: mais il y aura tousiours Dieu & son sainct Esprit , il y aura mesmes nostre Seigneur Iesus Christ , en la main duquel la Gal.3.19 Loy a este donnee , comme sainct Paul en parle. Car il a este Gouuerneur de l'Eglise de tous temps. Voila donc ce que nous auons ici à retenir, voire pour receuoir en toute reuerence & sollicitude ce qui nous a este donné par la main de Moyse.Non point que nous estimions que rien soit procedé de luy : mais que Dieu l'a enuoyé, qu'il l'a constitué son organe, tellement que quand nous receuons ce qui est dit par Moyse, nous pouuons estre asseurez que Dieu nous conduit & gouuerne par sa pure verite, & que nostre foy n'est point appuyee sur les hommes , ne sur aucune creature caduque: mais que le Dieu viuant en est l'autheur , & en sera aussi le garent. Or apres auoir parlé ainsi , il dit , Qu'il a recité toutes ces choses l'annee quarantieme , en l'onzieme mois , & au premier iour du mois. Comme s'il estoit dit, Quand le peuple a approché, & qu'il deuoit entrer en la terre promise , alors il a recapitulé la Loy de Dieu,il en a fait vn sommaire , il a fait vn recueil de toutes les remonstrances & exhortations dont il auoit vsé auparauant. Non pas que Moyse se fust teu depuis Horeb , & qu'il eust fait silence: car (comme nous auons dit) il n'a cessé de crier tousiours apres ce peuple , le voyant ainsi dur & reuesche,le voyant d'vn col dur à plier. Mais en la fin , pource qu'il approchoit de son but, qu'il auoit acheué sa course ( comme nous verrons son trespas en la fin du Liure ) pource donc qu'il falloit qu'il fust retiré de ce monde:il a fait vn recueil de toute la doctrine qu'il auoit preschee pas l'espace de quarante ans , & l'a voulu ratifier tellement au peuple, qu'apres son trespas ses successeurs en fussent edifiez , & qu'encores auiourd'huy l'vtilité en vienne iusques à nous , & que nous soyons endoctrinez de toutes les admonitions qui sont ici contenues. Tant y a que nous voyons , que desia le peuple deuoit bien estre matté pour se renger mieux à Dieu que il n'auoit point fait. Car c'est vn bon terme de quarante ans , pour disposer vn homme à bien, s'il le doit estre. Quand on verra qu'vn homme ne veut escouter nul conseil ne raison , & bien si on le laisse ronger son frain par l'espace de quarante ans , lors il est temps ou iamais , qu'il pense à soy : & si on luy remonstre qu'il a failli , qu'il soit mieux disposé & meuri qu'il n'estoit. Dieu donc voyant que son peuple luy estoit si sauuage, luy a donné terme & loisir de s'appriuoiser, & l'a pourmené par l'espace de quarante ans: & il l'a fait pour leur rebellion , comme nous verrons cy apres.Mais pour le present il nous faut noter,que quand Moyse parloit à ce peuple,c'estoit approchant de son but,pource que Dieu le deuoit retirer du monde,& aussi que le peuple deuoit estre alors comme renouuelé : car il fut dit à ceux qui auoyent refusé d'entrer en la terre, Vos charongnes pourriront ici au desert : vous n'estes pas dignes de posseder l'heritage que vostre Dieu auoit promis à son seruiteur Abraham.Voila donc le peuple qui auoit este cõme renouuelé au bout de quarante ans, & c'est alors que Moyse met en auant la Loy , & qu'il parle selon le commandement de Dieu. Or il nous faut aussi bien appliquer ceci à nostre instruction: c'est que quand nous auons este si mal aduisez de ne point profiter en l'escole de Dieu,que nous soyons tousiours demeurez asniers, ou bien que nous ayons seulemẽt fleureté sur la doctrine , sans qu'elle ait prins vne droite viuacite en nous: si Dieu nous donte,& que par succession de tẽps il nous prepare mieux à l'escouter , que nous aduisions de faire nostre profit de cela, & que nous ne soyons pas incorrigibles. Car que gagnerons-nous en la fin quand nous aurons este tousiours sauuages, & que Dieu ne pourra cheuir de nous:ne sera-ce point à nostre confusion?Ainsi donc tant en publique qu'en particulier,aduisons de faire nostre profit de cest aduertissement,& si nous auons mal receu la doctrine qui no9us a este preschee desia lõguemẽt:que nous sachions,puisque Dieu encores ne nous veut point quitter,& qu'il vse d'vne telle misericorde enuers nous,qu'encores demande-il de nous attirer à soy:que nous soyons preparez , que nous ne soyons point ainsi reuesches. Mais apprenons de nous appriuoiser,& que la doctrine ait son entree & en nos esprits,& en nos cœurs. Voila comme il nous en faut faire. Et au reste,quand Dieu nous aura visité , qu'il nous aura enuoyé quelques corrections pour nous humilier,& pour abbatre en nous ceste ingratitude & malice qui est trop grande:que nous aduisions de nous reduire , & de retourner à luy.Et quand nous aurons fait cela en general pour tout le corps de l'Eglise,qu'vn chacun aussi en son priué face le semblable.Que vn homme qui aura esté esgaré , & qui n'aura iamais bien cogneu que c'est de Dieu,qui ne se sera point assuietti pleinement à la bonne doctrine,si Dieu le visite par maladie , par poureté, ou comment que ce soit : qu'il regarde, Helas! l'Euangile m'auoit esté annõcé:mais cependant comment est-ce que ie l'ay receu? Ie ne sauoye que c'estoit de mon Dieu, & combien que j'aye fait professiõ d'estre des siens,touteffois cela ne m'a point touché le cœur : qu'est-il de faire donc maintenant? puis que Dieu me veut auoir pour son escolier, c'est bien raison que ie me baille du tout à luy, & que ie luy porte telle reuerence comme ie doy à mon maistre & souuerain docteur. Voila de quoy nous sommes admonnestez en ce passage, quand nous voyons que nostre Seigneur par tous moyens nous veut reduire , & qu'il nous abbat ceste rebellion qui est en nous , qu'il nous argue de nos vices,& que voyant que nous sommes ainsi esgarez , il nous recueille à soy , afin de sauoir cheuir de nous , que nous ne regimbions point contre l'esperon, ainsi que i'ay dit ; mais plustost qu'auec vn esprit debonnaire nous demandions d'estre gouuernez par luy , & de profiter de plus en plus en sa parolle.

Or nous nous prosternerons deuant la face de nostre bon Dieu, en cognoissance des fautes innumerables que nous ne cessons de commettre iournellement à l'encontre de sa Maiesté : le prians qu'il luy plaise de les effacer par sa bonté gratuite , & cependant qu'il nous reduise à soy, & qu'il besogne tellement en nous par son sainct Esprit,que vos consciences soyẽt mortifiees de tout au iour iusques à ce que nous soyons despouillez de toutes les corruptions de nostre chair pour estre reuestus de sa iustice. Ainsi nous dirons tous, Dieu tout puissant, Pere celeste,&c.