Nous lisons au dix-septiéme chap. du premier livre de Samuel, que Dauid ayant tué en duel le Geant Goliath , ceux d'Israël & de Iuda se leuerent & ietterent cris d'esiouïssance. Et au chapitre suiuant il est recité,que comme ils reuenoyent,Dauid retournant de la desfaite du Philisthin,il sortit des femmes de toutes les villes d'Israel, pour chanter , & qu'ensemble sortirent des danses pour aller au deuant du Roi Saul auec tabours, auec ioye, & auec rebecs. Et les femmes qui iouoyent s'entrerespondoyent & disoient,Saul en a frappé ses mille,& Dauid ses dix mille.

Le peuple de Dieu,les Chrestiens,n'ont-ils point , sans comparaison , plus de suiet de s'éiouïr , lisans & meditans attentiuement l'Histoire que nous venons de lire ? En icelle S. Matthieu nous descrit & le duel & la victoire que Iesus Christ a euë sur le Diable, vrai Goliath, vrai geant infernal. En ceste histoire il n'y a trait aucun qui ne soit capable de nous instruire,de nous consoler,de nous apporter vne ioye inenarrable & incomprehensible. Goliath estoit vn homme mortel: & Satan vn esprit rusé & puissant, serpent ancien, lion rugissant. Goliath assuiettissoit aux Philisthins seulement les corps des Israëlites: mais le Diable enchaisnoit en ses pieges & les corps & les ames de tous hommes pecheurs. Goliath n'a esté redouté que peu de temps, il estoit incognu es aages precedens: mais Satan auoit subiugué & le premier homme, & auec lui toute sa posterité pour iamais. Goliath desfioit les Israëlites au combat d'vn à vn : Car quelque puissant qu'il fust, vne compagnie des Israëlites n'en fust-elle pas bien venue à bout ? Mais le Diable au premier combat contre Adam l'a- l'auoit tellement vaincu , & tellement rendu esclaue toute sa posterité , que tous les hommes ensemble n'eussent iamais peu secouër le ioug de sa tyrannie. Les Philisthins,ayans veu que leur fort homme estoit mort, s'enfuirent: Aussi nostre principal accusateur estant vaincu, n'est-ce point pour mettre en route tous nos ennemis? Les Israëlites qui durant le deffi de Goliath eurent fort grand peur , apres la mort d'icelui se rallient, poursuiuent les Philisthins, les battent, pillent leurs camps. Aussi la frayeur que nous donnoit la tyrannie du Diable sous le peché,n'est-elle point conuertie en asseurance sous la grace de Iesus Christ? Maintenant nous poursuiuons Satan. Nous menons battans, & mettons en desroute tous ses supposts,tous nos ennemis , voire la mort mesme. Nous sommes chargés de leurs despouilles.

Puis que ces choses sont telles , ne ietterions- nous point aussi cris d'esiouissance: Dauid fils d'Isai en a tué dix mille : mais Christ Fils de Dieu a tué plusieurs millions. Ains nostre resiouissance est bien mieux fondee. Car la mort de Goliath & de quelques Philisthins n'a point exterminé tous les Geans, n'a point empesché qu'à diuers temps apres les Israëlites n'ayent eu sur les bras plusieurs puissantes armees. Mais Christ vne fois pour toutes a vaincu Satan , & auec lui tous nos ennemis. Car nostre Seigneur au seiziesme de S. Iean nous dit, Ayez bon courage , i'ai vaincu le monde . Si le monde,aussi le Prince du monde,lequel au mesme chapitre il dit estre desia iugé. Il est vrai que Satan nous liure encor plusieurs assauts : que iour & nuict il chemine à l'entour de nous, cerchãt qui il pourra engloutir. Mais tous cela, comme à sa plus grande confusion, aussi à la confirmation de nostre salut. Il en est aux convulsions, il iette les derniers sanglots, tandis que le bruit qu'il fait nous resveille du dormir de peché , excerce nostre foi , & nous retient es bornes d'vne vraye humilité, attendant que Christ ait aboli tout empire, & notamment la mort, ennemi qui sera destruit le dernier,comme l'enseigne l'Apostre au 15. de la premiere aux Corinthiens.

Or nous est l'histoire presente vne preuue asseuree de la victoire que Christ a obtenue contre le Diable. Histoire grandement digne de nostre attention. Car elle nous represente le combat de deux puissans ennemis , du Fils de Dieu createur & cõducteur de toutes choses contre le Diable qui est ce fort armé dont il est parlé en l'Euangile. Et pour considerer sommairement ce qui nous est ici proposé,on le peut rapporter à deux poincts. Car au premier l'Euangeliste nous recite comment Satan a tenté Iesus Christ,& en ce combat s'est efforcé de le renuerser. Que fust deuenu nostre stre salut, si Satan fust venu à bout de son entreprise ? Mais il auoit à faire à trop forte partie. Or le second point de l'Histoire monstrera en quelle façõ & auec quelles armes Christ esteignant tous les dards enflammés de ce Malin, l'a vaincu & chassé au loin.

Dés l'entree le mot Tenter dont vse l'Euangeliste nous donne à entendre que Satan a dressé des embusches à Iesus Christ. Car se sentant trop foible pour combattre ouuertement contre le Fils de Dieu il en vient aux ruses , il tasche de le circonuenir,il essaye de lui faire commettre quelque peché. Car il estoit asseuré que si nostre respondant eust peché, pour nous eust esté nulle la satisfaction,& il se fust trouué par trop, voire eternellement,empesché de satisfaire pour soi-mesme. Mais l'issue du combat monstre euidẽment que Christ a participé ouy bien à nos infirmités,mais non à nos iniquités : qu'il a esté tenté de mesme comme nous,ouy en toutes choses mais horsmis peché , comme il est dit au 4. de l'Epistre aux Hebrieux.

Or en ceste tentation du costé du Diable il faut remarquer tant les auantages qu'il a creu auoir de s'engager au combat , que les traits qu'il a descochés contre Iesus Christ.

Son premier auantage il l'a pris du lieu où estoit Iesus Christ. Pour lors il estoit au desert , esloigné des hommes , & parmi les bestes sauuages.Satan a creu ceste occasion lui estre fauorable. Et de fait il n'y a nulle doute que la solitude ne soit beaucoup plus propre aux embusches qu'vn lieu fort frequẽté. A quoi peut estre rapporté ce qui est dit au 4. de l'Ecclesiaste: Malheur à celui qui est seul:d'autant qu'estant tombé il n'y aura personne d'autre pour le releuer. Ceci peut receuoir éclaircissement par exemples.Car il est tres-certain que la solitude souuent donne occasion à plusieurs personnes de commettre ce dont ils s'abstiendroyent s'ils estoyent en compagnie. Au milieu de Sodome Loth a vescu chastement en sa maison , mais retiré en vne cauerne ses deux filles commettent inceste auec lui. En la maison de leur pere les freres de Ioseph n'eussent iamais osé mettre la main sur lui : mais le voyans tout seulet aux champs ils machinent de le mettre à mort. Nous dirons qu'vne mauuaise beste la deuoré; Et la solitude fut l'occasion du mauuais traitement que Ioseph receut d'eux.

Amnon fils de Dauid n'vsa point de force contre Thamar sa sœur , qu'il n'eust fait retirer vn chacun arriere de soi.Cain frappa Abel, non en la maison de leur pere, mais comme ils estoyent aux champs. Tant est propre la solitude à l'execution des meschantes conuoitises. Le Diable donc selon sa coustume a assailli Iesus Christ,non au milieu de Ierusalem,mais dans dans le desert, & a estimé que Christ estant là tout seul pourroit estre plus facilement seduit. Mais il s'addressoit à celui qui ne seduit personne, qui aussi ne peut estre seduit. Il s'adressoit à celui qui n'est iamais seul. Christ n'estoit point en la compagnie des hommes. Non. Mais n'estoit-il pas enuironné de plusieurs legions d' Anges, lesquels, comme il est dit en ce texte s'approcherent, & le seruoyent. Et quand il n'eust-eu aucun Ange auec lui eust-il pourtant esté tout seul ? Il ne l'a iamais esté, puis qu'il a tousiours esté au sein du Pere,puis que dés le commencement ceste parole estoit auec Dieu, puis qu'en lui de toute eternité le Pere a pris son bon plaisir. Mais Christ lui mesme en termes formels & à son auantage sould ceste question , au 8. de S. Iean , Ie ne suis point seul , mais il y a moi & le Pere qui m'a enuoyé.

Cependant, puis que pour nous seduire le Diable espie la solitude. C'est à nous non à cercher les deserts, mais à euiter la tentation, & à demeurer vn chacun és bornes de la vocation à laquelle Dieu nous a appelés. Christ s'y est retiré pour les raisons à lui particulieres, & qui seront marquees en leur lieu. La persecution y a souuent chassé les fideles obligés à la conseruation de leur vie. Mais qu'vn homme, mesme au temps de la prosperité,quitte sa vocation,fuye toute societé, viue tout seul au desert , c'est ce que le Diable demande , pour plus aisément le seduire. Mais à ceste solitude ont dés long temps remedié les Moines. Ils en retienent bien le nom. Car Moine veut autant à dire que solitaire. Et cependant ils ne viuent rien moins que solitaires , rien moins que parmi les deserts. Que s'il aduient quelquefois que nous-nous trouuions seuls au regard des hommes : souuenons- nous que Dieu nous void & qu'il est auec nous. S'il nous void, s'il contemple nos actions, mais nos cœurs, ne seroit-il point vengeur de nos iniquitez ? Viuons donc retenus: viuons autant & plus en crainte deuant lui, que si tous les hommes nous voyoyent. Si aussi Dieu est auec nous , qui sera contre nous ? Quand nos plus proches nous auroyent abandonné , le Seigneur nous recueillira. Si les hommes nous reiettent , Dieu nous receura, & ne permettra point que le Diable nous tente outre nostre portee.

L'autre auantage , que Satan a creu auoir sur Iesus Christ, c'est que Christ ayant iusné 40. iours & 40. nuicts finalement eut faim. Le Diable a estimé que la faim auroit affoibli Iesus Christ & rendu moins habile au combat contre lui. Et certes des soldats alangouris & affamez ne rendront pas beaucoup de combat, ne feront pas grand' resistance. Et la faim n'affoiblit pas pas seulement le corps,mais aussi le courage: voire la faim est vne rage qui porte l'homme au desespoir. Il n'y a aucun mal qu'vn homme affamé ne face, aucun mal qu'il ne souffre. Ainsi est le Diable vn fort grand naturaliste. Il remarque soigneusement la nature & les inclinations de chaque chose: & selon qu'il croid en estre bien informé, il assaut vn chacun par la partie la plus foible , proposant à vn chacun tels allechemens au mal, qu'il croira propres pour chatouiller & émouuoir la conuoitise. Il sçait ce qui peut émouuoir vn larron. Il sçait ce qui a force sur vn voluptueux. Par artifices il pousse le meurtrier iusqu'à l'execution. A ceux qui ont quelque horreur de l'iniquité, il s'efforcera de pallier le vice, d'extenuer le peché. A ceux qui apprehendent la vengeance ou de Dieu ou du Magistrat, il trouue & propose des apparences de seureté. Que s'il y en a qui sentent desia le bourreau de la conscience: il n'oublie rien de tout ce qui les peut pousser au desespoir. Il noircit leurs taches , il aggraue leur peché, il amoindrit la misericorde de Dieu.S'il pouuoit, il leur fermeroit le ciel:il leur ouuriroit les abysmes.

De mesme il a iugé,que puis que Christ auoit faim,il viendroit plus aisément à bout de lui pour le porter bon gré mal gré lui à quelque moyen illegitime , éloigné de son deuoir & proche de la desfiance. Mais nous verrons qu'il s'est fort mesconté de son calcul : que Christ a eu faim au desert, non pour succomber en ce combat : mais pour faire voir combien est foible,voire nulle la force des sollicitations du Diable contre le Fils de Dieu,lors mesme qu'au iugement d'vn chacun il estoit en lieu & en estat desavantageux, puis qu'au desert,puis qu'ayant faim. Car aussi comment la faim estonneroit-elle celui qui rassasie les affamez , qui donne à boire aux alterés , qui nous abruue du fleuue de ses delices, qui est nostre viande, qui est nostre breuuage? Celui pecheroit-il par la faim, duquel la principale viande est de faire la volonté de celui qui l'a enuoyé & de parfaire son œuure, comme il le tesmoigne au 4. de S. Iean?

A ces deux auantages adioustons la circonstance du temps qui est marquee en nostre texte par ce mot Alors. Quand alors ? Incontinent apres le Baptesme de Iesus Christ. De Iesus Christ auquel peu auparauant Iean Baptiste auoit rendu ce tesmoignage, Voila l'Agneau de Dieu, au premier de S. Iean : De Iesus Christ, duquel le Pere venoit de dire au 3. de S. Matthieu, Cettui-ci est mon Fils bien-aimé , en qui i'ai pris mon bon plaisir. Bref de Iesus Christ qui commençoit à exercer publiquement la charge qui lui auoit esté commise. Nous ne lisons pas que Satan ait tenté Iesus Christ, Christ,tandis qu'il a vescu comme particulier en la maison de Ioseph & de Marie : mais maintenant qu'il le void instalé en sa charge, voire dés le commencement, mesmes en quelque sorte auant qu'il la commence, le Diable s'auance pour le faire chopper dés l'entree,afin que tout le reste de son ministere demeure infructueux. Ennemi caut & rusé. Il veut obuier aux commencemens. Il sçait combien nuist le retardement , que le remede à vn mal ne peut estre trop tost apporté : que s'il n'étouffe le regne de Iesus Christ dés sa naissance, il faudra necessairement que le sien diminue, qu'à la fin il soit renuersé. Ainsi l'ennemi de nostre salut n'a rien omis, non pas mesmes es formalités & circonstances. Ayant à combattre Iesus Christ il a pris son temps:Croyant plus facile de le renuerser, que s'il eust attendu son plein establissement. Mais aussi en ce poinct s'est abusé le Tentateur. Car le regne de Iesus Christ n'a point de fin , point aussi de commencement. Les fondemens de sa domination sont non en la terre,mais au ciel : ils n'ont point de temps , ils sont eternels. Et la nature de ce regne est qu'il croist & s'augmente par l'opposition de ses ennemis , par leur contradiction. Plus le Diable machine, plus il dresse d'embusches à Iesus Christ,plus aussi paroist la lumiere de l'Euangile,& ce par la sagesse admirable de celui qui conuertit les tenebres en lumiere, & qui change les maledictions des aduersaires en benedictions sur son peuple. Et de fait ceste circonstance regarde aussi l'Eglise de Dieu, voire chaque fidele. Vn Ancien escriuant sur ce passage dit, qu'alors le Diable fait ses plus grands efforts contre nous lors que nous sommes sanctifiez. Comme s'il disoit , qu'alors auec plus d'animosité il se bande contre nous , quand il void que Dieu nous a choisis pour ses enfans. Et l'experience parle pour nous en cet endroit. Auant que Dieu t'eust appelé à sa cognoissance, tu iouissois , ce diras-tu, de repos en ta conscience. Rien ne te molestoit. Tout le monde t'estoit ami. Mais maintenant que tu as embrassé la profession de l'Euangile,tu es trauaillé de tous costez, tu as des tentations à droite & à gauche, hors de chés toi, en ta maison. Pren bon courage, & que cela te soit vne marque de ta vocation & de ta sanctification. Le Diable tente Iesus Christ lors qu'il te void commencer ton ministere. Aussi trouuant mauuais que tu te vouës au seruice de Dieu, il s'efforce de troubler ton repos , comme il n'auoit garde de te resveiller pendant que tu estois endormi en tes vices. Car tel repos, tel dormir lui est agreable. La mesme consolation doit estre donnee à plusieurs poures Eglises qui dés leur naissance experimentent contre leur establissement la rage & la ruse du diable. ble. Tels efforts doiuent estre pris pour vn tesmoignage asseuré que le Soleil de iustice luit au milieu de nous. Au fort de l'hyuer ne paroissent point sur la terre les bestes venimeuses. Au lieu qu'au printemps lors que le Soleil a plus de vigueur sortent les serpens & autres insectes. De mesme on remarque ceste difference entre les pays esquels la parole de Dieu est preschee , d'auec ceux où elle ne l'est point.En ceux où elle est preschee le Diable écume son ire , & suscite diuerses tentations contre les auditeurs d'icelle. Au lieu qu'il laisse les autres qui n'ont point ouy parler de Iesus Christ ni de sa parole , il les laisse di-ie sans assaut se plonger es tenebres de leur erreur & dissolution. Or Iesus Christ lui a resisté , afin qu'il nous soustienne aussi & au commencement de nostre course,& iusques à la fin d'icelle.

Et voila les auantages que Satan a pretendu prendre contre Iesus Christ.

Suiuent maintenant au texte les traits qu'il a decochés contre icelui , que nous ne toucherons que sommairement en l'heure presente. Satan donc ayant pris son temps, commence sa tentation. Tentation qui n'est point d'vne sorte : car il s'efforce ou de corrompre sa foi, ou de lui faire changer d'obiect. Pour corrompre la foi de Iesus Christ, il entreprend de le faire ou tomber en defaut, ou monter à l'excés. Il tasche de le porter au defaut, c'est à dire à la desfiance par sa premiere tentation, quant il lui dit s'approchant de lui, Si tu es Fils de Dieu, di que ces pierres deuienent pains , Comme s'il disoit, Ne vois-tu pas bien que tu es abandonné de Dieu, & desnué de tout secours? sans doute si tu estois Fils de Dieu tu ne mourrois pas de faim : plustost, pour te soustenir, seroyent ces pierres ici conuertis en pain.Et puis que tel changement n'arriue pas, tu n'es point Fils de Dieu,& tu periras de faim. L'intention de Satan est de faire conclurre à Iesus Christ , que Dieu l'a abandonné puis que les moyens exterieurs lui defaillent.Donc rien plus ne lui reste que d'auoir recours à toutes sortes de moyens, quoi que non legitimes , comme de commander à des pierres qu'elles deuienent pain. Ainsi le Diable prend a tasche d'arracher à l'homme la confiance qu'il doit auoir en Dieu , pour le conduire à des pierres , c'est à dire à des moyens defendus de Dieu.Stratageme & artifice merueilleusement pernicieux. Ainsi,pour ce que l'Eternel n'auoit point respondu à Saul ni par songes, ni par Vrim, ni par les Prophetes, le Diable,duquel dés long temps il estoit possedé, l'incite à s'adresser à vne femme qui auoit l'esprit de Python. Ainsi plusieurs impatiens en leurs maladies & langueurs se desfient du se- secours de Dieu , ont recours aux deuins & arts magiques. C'est sans, c'est contre le commandement de Dieu, commander aux pierres qu'elles deuienent pain. Ainsi le Diable pousse plusieurs poures au larcin, plusieurs offensez à la vengeance, plusieurs affligez au desespoir : sur tout ceux qui sont à l'article de la mort, si Dieu par sa misericorde ne nous soustient au milieu des tentations que le malin nous liure.

Ceste premiere tentation n'ayant point reussi,il passe à la seconde,& n'ayant peu mener Iesus Christ au defaut,il essaye de le mener à l'excés. Ainsi Satan extrauague aux extremitez , à la seule vertu obtient le milieu. Elle garde mesure tandis que le malin ou défaut à Dieu,ou excede contre lui. Or le diable transporte Iesus Christ en la saincte ville & le met sur les crencauxcreneaux du temple, & lui dit, Si tu es Fils de Dieu iette toi en bas, car il est escrit, Qu'il donnera charge de toi à ses anges, & ils te porteront en leurs mains, de peur que tu ne heurtes de ton pied à quelque pierre. Comme s'il disoit, Puis que tu te fies tant en Dieu , donne-nous vn peu quelque preuue & tesmoignage extraordinaire. Car si tu te fies en lui, feras-tu difficulté de te ietter en bas ? & si tu es son Fils , manquera-il à te conseruer?Or pour donner couleur à sa tentation il produit vn passage de l'Escriture , afin de contrequarrer celui que Christ auoit allegué en sa premiere responce. Passage fort excellent pris du Pseaume 91. Mais en la citation duquel il commet deux omissions notables. Il dit vrai en citant le verset onziéme: mais pourquoi au mesme verset omet-il ce qui est de principal , en toutes tes voyes . Il dit en tes voyes. Non donc hors d'icelles. Or estoyent-ce les voyes de Christ que le Diable lui proposoit ? Dieu n'assiste point : il n'ottroye point aussi la garde de ses Anges à celui qui se precipite : mais à celui qui chemine par degrés en sa vocation. L'autre omission est du verset treiziesme du mesme Pseaume. Il taist subtilement cela , pource qu'il faisoit contre lui. Car c'est de lui proprement qu'il faut entendre ces paroles , Tu marcheras sur le lion, & sur l'aspic, & fouleras le lionceau & le dragon. Ainsi le Diable , pour plus aisément persuader aux hommes ce que bon lui semble , quelques meschans qu'ils soyent , il les endort par l'Escriture mesme: soit sur la misericorde de Dieu , soit sur la legereté de leur peché. Quant aux dissolus & desbordés , il les enchante par ce que Iesus Christ dit au vingt-vniesme de Sainct Matthieu. En verité ie vous di que les peagers & les paillardes vous deuancent au royaume de Dieu. Il leur propose cela nuement , sans y ioindre ce qui est escrit au 33. d'E- d'Ezechiel , Ie suis viuant , dit le Seigneur l'Eternel , que ie ne pren point plaisir à la mort du meschant , ains plustost que le meschant se destourne de son train & qu'il viue. Destournez-vous , destournez-vous de vostre meschant train, & pourquoi mouriez- vous ô maison d'Israel ? Ainsi aux auaricieux il propose ce qui est escrit au cinquiesme de la premiere à Timothee , asçavoir , Que si quelcun n'a soin des siens, & principalement de ceux de sa famille , il a renié la foi , & est pire qu'vn infidele. Passage proposé par l'Apostre , non en faveur des auaricieux, mais contre les prodigues & faineans. Ainsi il entretiendra les gourmands & yurongnes sur ce que Sainct Paul dit à Timothee au cinquiesme de sa premiere , qu'il ne boiue plus d'eau , mais qu'il vse de vin. Comme si cela fauorisoit leur dissolution , puis qu'il dit , Vse d'vn peu de vin. Adioustant la raison , à cause de ton estomach , & à cause des maladies que tu as souuent. En ceste façon le Diable a accoustumé d'abuser de l'Escriture. Que s'il l'alleguoit entiere il lui seroit impossible d'induire par icelle l'homme au mal. Comme en cet endroit , qui ne void que ce seroit vne temerité enragee de se ietter en bas d'vne haute tour, puisque Dieu ne promet de garentir que ceux qui cheminent en leurs voyes, c'est à dire en vne vocation legitime & reglee par la parole de Dieu.

Ceste seconde tentation s'estant trouuee de nul effect, le Diable adiouste vn troisiéme & dernier assaut, pour induire Iesus Christ à lui rendre l'honneur qu'il deuoit à Dieu seul. Iesus auoit Dieu seul pour object de son adoration, & de son inuocation. Et le Diable lui dit apres l'auoir transporté sur vne fort haute mõtagne, & lui auoir monstré tous les royaumes du monde,& leur gloire, Ie te donnerai toutes ces choses, si en te prosternant en terre tu m'adores. Tentation composee d'imprudence, de mensonge, & de sacrilege. D'imprudence : Il auoit esté reietté, repoussé es deux assauts precedens, & il entreprend encor ce troisiesme. C'est là le naturel de ce malin esprit.Et il en vse de mesme à l'endroit des fideles. Il ne se rebute point au premier refus.Il nous assaut par plusieurs fois, par plusieurs endroits, par tous endroits. Ses ruses sont enchaisnees,elles s'entresuiuent. La fin de la premiere est l'entree à la deuxiéme: Ceste-ci suiuie d'vne troisiéme, ains d'vn nõbre infini. Car qui pourroit suffisamment & sans se lasser reciter les tentations de celui qui ne se lasse point de tenter,qui à tous momens, qui à toutes occasions attente au repos de nos consciences, au salut de nos ames. Celui qu'il n'a peu seduire en sa ieunesse, il ne tient point à lui qu'il ne le face trebuscher en la vieillesse. Ce Ce qu'il ne peut gagner par la volupté, il l'obtient par l'ambition. Si l'vne & l'autre est inutile, il employe l'auarice.Apres cette-ci quelqu'autre. Auec cette-ci plusieurs autres.Car le Diable pretend d'enlacer chacun homme,par tant de pieges & en tant de sortes de liens,que iamais pas vn ne lui puisse eschapper. Ainsi veut-il pousser Iesus Christ à la desfiance, à vne trop grande confiance, à l'auarice, & à l'idolatrie. Il y a aussi du mensonge tout euident en ceste tentation. Il promet de donner les Royaumes du monde & leur gloire. Lui, qui n'a par droict que du mal, du bien que par vsurpation, promet ici les Royaumes à celui qui seul de droit est Roi & iuste possesseur de toutes choses. Il est vrai qu'au 12. de S. Iean le Diable est appellé Prince de ce monde. Mais par le monde il faut entendre les iniques,qui par leur iniquité volontaire,aussi bien que par le iuste iugement de Dieu , sont asseruis à la tyrannie du Diable , lequel ne possede chose aucune que par perfidie & desloyale vsurpation. Ce qu'il promet donc ici,c'est ce qu'il ne veut, ni ne peut tenir. Il ne le veut : car s'en dessaisiroit-il si cela dependoit de sa puissance. A-il l'esprit enclin à faire du biẽ à autrui. Ains lui qui pousse & le corps & l'ame des hommes en la gehenne, te donneroit-il ses biens? mais espargneroit-il les tiens ? Est-il veritable en ses promesses? Ains menteur. Car à qui appartienent les Royaumes? Et qui les distribue? Par moi regnent les Rois, dit le Sage au 8. des Prouerbes , & les Princes decernent iustice. Et Iosaphat au 19. du 2. liure des Chroniques, dit aux Iuges , Regardez que vous ferez : car vous n'exercez pas la iudicature de par vn homme , mais de par l'Eternel, lequel est parmi vous en iugement. Daniel au 2. chapitre dit à Nebucadnezar , C'est Dieu qui change les temps & les saisons , qui oste les rois,& qui establit les rois: qui donne la sagesse aux sages,& la congnoissance à ceux qui scauent que c'est de prudence. Au 19. de S. Iean, nous voyons comme Iesus respondit à Pilate. Tu n'aurois puissance quelconque sur moi, s'il ne t'estoit donné d'enhaut:pour ceste cause celui qui m'a liuré à toi a plus grand peché. Et S. Paul au 13. de l'Epistre aux Romains,Que toute personne, dit-il , soit suiette aux puissances superieures : car il n'y a point de puissance sinon de par Dieu, & les puissances qui sont en estat , sont ordonnees de Dieu. Le Prince est seruiteur de Dieu pour ton bien: mais si tu fais mal,crain:d'autant qu'il ne porte point l'espee sans cause : car il est seruiteur de Dieu, ordonné pour faire iustice en ire, de celui qui fait mal. Il adiouste finalement: Car pour ceste cause aussi payez-vous les tributs , d'autant qu'iceux sont ministres de Dieu,s'employans à cela. Bref, il y a ici du sacrilege cri tout euidemment, de vouloir rauir à soi l'adoration deuë à Dieu seul. Si en te prosternant en terre tu m'adores. Aussi Iesus Christ comme nous le verrons, ne le peut plus ouyr, ains le chassa. Car aussi que pouuoit-il dire de plus abominable ? Et que pouuoit requerir le Diable de plus excellent, & qui lui soit moins deu , sous vne condition specieuse en apparence, fausse en effect. Et quand elle seroit vraye , & que le Diable la pourroit accomplir, y a-il quelque proportion entre ce qu'il demande , & ce qu'il offre. Cependant de tout temps, par ses offres il a fait fleschir deuant soi le genou à plusieurs sortes de personnes. C'est ce grand dragon roux duquel il est dit au 12. de l'Apocalypse , Il apparut aussi vn autre signe au ciel , & voici vn grand dragon roux , ayant sept testes & dix cornes, & sur les testes sept diademes , Et la queuë d'icelui trainoit la tierce partie des estoiles du ciel,lesquelles il iette en terre : puis le dragon s'arresta deuant la femme qui deuoit enfanter : afin que quand elle auroit enfanté il deuorast l'enfant d'icelle. Il enchaisne les hommes de liens d'or & d'argent. Les autres il les accable iusqu'aux enfers sous le fardeau de quelque Royaume , domination, & possession. O qu'il est difficile qu'vn riche entre au Royaume des cieux ! Mais il est impossible à vn auaricieux. Ici a lieu ce que dit S. Paul au 6. de la premiere à Timothee, Ceux qui veulent deuenir riches, tombent en tentation & au piege, & en plusieurs desirs fols & nuisibles, qui plongent les hommes en destruction & perdition. Car la racine de tous maux c'est la conuoitise des richesses: de laquelle quelques vns ayans enuie se sont desvoyés de la foi, & se sont eux mesmes enserrez en plusieurs douleurs. Ananias & Sapphira comme nous le voyons au 5. des Actes pour auoir par auarice & en mentant à L'Esprit de Dieu,voulu posseder quelque chose plus que les autres , perdent la vie , conseruee aux autres.Iudas l'vn des douze Apostres par auarice trahit à mort le Sauueur de vie, puis se precipita soi-mesme. Ainsi fut deserte son habitation : & sa portion fut auec les iniques.

Voila au regard des hommes des tentations bien fortes, bien pressantes : Mais que Iesus Christ a iugees fort legeres , qu'il a fort aisément surmontees. Et voyons-le sommairement. Car moyennant la grace de Dieu nous esperons es exhortations suiuãtes exposer ces choses plus au long, & par le menu. Et ceci n'est dit que comme vne exposition generale de toute l'histoire qu'il faudra puis apres examiner selon toutes ses circonstances & doctrines.