NOvs ne nous arresterons pas à rechercher quelle a esté l'occasion particuliere de ce Pseaume, ny qui en a esté l'autheur, puisque ni l'vn ni l'autre n'est declaré. Il nous suffit que l'autheur a esté vn S. Prophete de Dieu, & qu'il semble l'auoir composé pendant que le peuple estoit dans la captiuité de Babylone, comme dans vn gouffre de maux. Partant le Prophete disant qu'il crie à Dieu des lieux profonds, nous considerons deux choses en general par les lieux profonds : La profondeur des maux, & celle du ressentiment qu'on en a. Celle des maux, cõme Zach. 9. la captiuité du peuple en Babylone est representée par vne fosse sans eau, dãs laquelle le peuple eust esté deualé : aussi Ieremie en ses lamentations pendãt cette captiuité, disoit au nom de l'Eglise d'Israël ch. 3. Seigneur i'inuoque ton nom d'vne des plus basses fosses : façon de parler qui venoit de ce que jadis on deualoit les prisonniers en des fosses ; Mesmes l'Escriture employe la comparaison des abysmes, ou de la profondeur des sepulchres, pour exprimer la grandeur des afflictions ou des dangers : Celle des abysmes, comme Ps. 71. ô Dieu, qui est semblable à toy, qui m'as fait voir plusieurs destresses & maux, & derechef tu m'as rendu la vie, & m'as fait remonter hors des abysmes de la terre ? Celle des sepulchres, comme Ps. 88. ma vie est paruenuë iusques au sepulchre, tu m'as mis en vne fosse des plus basses, ez lieux tenebreux, ez lieux profonds, ta fureur s'est jettée sur moy, & tu m'as accablé de tous tes flots. Et l'Escriture nous donne deux tableaux de cette dispensation & conduite de Dieu : l'vn est le peuple d'Israël passant par les profondeurs & les gouffres de la mer rouge, entre des montagnes d'eau esleuées de deux costez : selon qu'il est dit Ps. 106. Il assecha la mer rouge, & les conduisit par les abysmes. L'autre est Ionas jetté en la mer & englouti d'vne Baleine, selon que luy- mesme dit, Tu m'as jetté au profond, au cœur de la mer, & le courant m'a enuironné, tous les flots & les vagues ont paßé sur moy, l'abysme m'a enclos tout à l'entour, ie suis descendu iusques aux racines des montagnes. Or cette profondeur de miseres est dispensée de Dieu pour diuerses raisons : Il veut par la grandeur de nos maux nous faire sentir la grandeur de nos offenses & de son courroux, afin que nous soyons d'autant plus touchez de repentance. 2. Il veut exercer nostre foy & la mettre à l'espreuue par le defaut de tous moyens de deliurance. 3. Il veut par la grandeur des maux faire voir la grandeur de sa puissance & de sa bonté, en deliurant ses enfans. Il nous faut donc considerer les profondes miseres dans lesquelles nos pechez meritẽt que nous soyons jettez, & lors mesmes que Dieu nous fait subsister, les considerer comme presentes, puis que nous sommes dignes d'y tomber. Ces profondes miseres sont descrites par S. Paul Rom. 8. oppression, angoisse, persequution, famine, nudité, perils, espée. Et si nous voulons nous bien humilier, nous passerons encor plus outre que les afflictions temporelles, & regarderons la profondeur des Enfers, où nostre corruption naturelle nous auoit mis : puis que (comme dit l'Apostre Ephes. 2.) nous sommes de nature enfans d'ire . Et certes Iesus Christ (ainsi que le dit l'Apostre Gal. 3.) ayant esté fait maledictiõ pour nous : & la parole de foy, disant, Ne di plus, qui descendra en l'abysme ? cela est rappeller Iesus-Christ des morts, nous sommes bien obligez de considerer ce gouffre comme y estans de nostre nature, & crier à Dieu de ces lieux profonds. Mesmes les pechez que nous commettons tous les iours, si vous considerez ce qu'ils meritent selon la rigueur de la iustice de Dieu, nous mettent là dedans, puisque Dieu dit en la loy, maudit est quiconque n'est permanent en toutes les choses de cette loy. Il y a encor vne profondeur du fonds de laquelle il nous faut crier à Dieu : à sçauoir celle de la malice naturelle de nostre cœur. Car la chair est vn gouffre d'inimitié cõtre Dieu, veu qu'elle n'est point sujette à la loy de Dieu, & mesme ne le peut, dit l'Apostre Rom. 8. & le Seigneur en parlant Ierem. ch. 17. dit, le cœur de l'homme est cauteleux & desesperement malin par dessus toutes choses, qui le cognoistra ? Ie suis l'Eternel qui sonde le cœur & esprouue les reins. Car ce mot de sonder est relatif à vne profondeur, & le Seigneur la dit estre telle qu'il n'y a que luy qui en puisse cognoistre le fonds ; Aussi quãd Iean Baptiste recommande la repentance, il veut que les costaux soiẽt abbaissez & que les vallées soient comblées, à sçauoir les costaux d'orgueil, de fierté & de rebellion contre Dieu : & les vallées de malice, de fraude & d'hypocrisie. Et ne recõnoissez vous pas, mes Freres, que la corruption de la chair est vn gouffre inépuisable de vices & pechez, puis qu'apres que vous aurez tasché de l'espuiser par repentance, vous y sentirez encore sourdre des nouuelles pensées & inclinations à mal ? Ces choses ainsi considerées, iugez si esleuans nos yeux au Ciel & voyans la distance & separation immense que nos pechez ont fait entre Dieu & nous, nous ne sõmes pas obligez de crier à Dieu de lieux profonds ?

Car nos maux estans profonds, telle aussi doit estre nostre tristesse & humiliation : non legere & superficielle ; mais qui occupe toutes les dimensions du cœur. Aussi jadis en Israël pour tesmoigner la grandeur de la tristesse on se iettoit en terre & se couchoit sur la poudre & sur la cendre : pour dire qu'on n'auoit comme plus de vie & de vigueur : ou plustost pour dire qu'on meritoit d'estre reduit en poudre & cendre. Aussi on deschiroit ses vestemens, on se couuroit de sacs : pour monstrer qu'on ne pouuoit prendre plaisir en aucun ornement, & qu'on meritoit d'estre despoüillé de tous biens. Et mesmes ce qu'on jeusnoit & s'abstenoit de viande & de breuuage, monstroit qu'on se jugeoit indigne de viure, & qu'on estoit tellement affligé, qu'on ne prenoit plus de plaisir és choses de la chair, & n'y auoit point d'esgard. Ailleurs l'Escriture represente la profondeur de la tristesse en parlant d'espandre son ame deuant Dieu comme de l'eau, de rompre son cœur, & briser son esprit, comme si nostre ame n'auoit plus de force & de subsistence en nous pour la grandeur de la douleur.

Que si vous demandez pourquoy Dieu prend plaisir en vne si profonde tristesse ? Il y a de cela trois raisons ; L'vne, que le peché est vn acte d'amour de nous mesmes, & vne production du contentement & plaisir que nous prenons en la chair ; secondement que le peché est vn acte de force & de rebellion contre Dieu. Il faut donc à l'opposite du plaisir que nous y auons pris, la tristesse & la douleur, à ce que toute la douceur du peché nous soit deuenuë aluine & fiel, & à l'opposite de la vigeur qu'il auoit contre Dieu, il faut vn aneantissement, à ce qu'il n'ait plus de force dedans nous. L'autre raison est, que Dieu estant vne Maiesté souuerannesouueraine, c'est de son droict d'estre souuerainement exalté, & du deuoir de la creature d'estre dans vne profonde humilité à son esgard : c'est pourquoy il ne se peut qu'il ne se plaise en l'humilité par laquelle la creature s'abbaisse en sa presence, & recognoisse son neant deuant luy. Car, si mesmes les Anges & Seraphins qui sont exempts de peché couurent leurs faces en sa presence, par le sentiment de la bassesse & chetiueté de leur estre à l'esgard du sien, & de la souueraine saincteté à laquelle la leur est infiniment inferieure : combien plus la creature qui à peché & qui tombe tous les iours en faute, doit elle estre humiliée deuant luy, & combien doit elle auoir de tristesse & de confusion en sa presẽce ? Et c'est en quoy dieu prend plaisir, entant que par cela la creature se remet & restablit dans l'ordre & le deuoir duquel elle s'estoit departie par negligẽce ou fierté. Aussi pour expier le peché il a falu vne humiliation extreme, pource que le peché auoit esté vn acte de rebellion & de mespris contre vne Majesté souuerainemẽt esleuée. La nature donc de la chose requeroit que la satisfaction consistast en vn extreme abbaissement : Et que le propre Fils de Dieu, duquel la grandeur & hautesse naturelle rendoit son abbaissement d'autant plus grand, prist forme de seruiteur & s'aneantist, se rendant obeïssant iusques à la mort, voire la mort de la Croix.

La troisiesme raison est, qu'vne grieue & profonde tristesse pour le peché, est celle qui produit des bons effets d'amendement & de renoncement à nous-mesmes. C'est elle qui nous donne la crainte de retomber au peché & le soin d'en éuiter les occasions, & laquelle nous fait comme prendre vne saincte vengeance contre nous-mesmes, pour nous sevrer de nos plaisirs, & reduire nostre corps en seruitude ; selon que l'Apostre disoit, 2. Cor. 7. Ce que vous auez esté contristez selon Dieu, quel soin a-il produit en vous ? voire quelle satisfaction ? voire indignation, voire crainte, voire grand desir, voire zele, voire vengeance ? Au lieu qu'vne tristesse legere & superficielle, estant bien-tost éuanoüie de l'esprit, nous laisse bien-tost retourner à nos fautes & retomber en nos pechez.

Or la profonde tristesse que nous requerons ne demeure pas absoluëment dans l'aneantissement (cela seroit vne tristesse selon le monde) mais elle regarde à Dieu & esleue l'ame à luy, selon que nostre Prophete dit, Eternel, ie t'inuoque des lieux profonds, Seigneur escoute ma voix, que tes aureilles soient attentiues à la voix de mes supplications. Le peché nous ayant separez de Dieu, & nous ayant plongez comme dans l'abysme, il faut que la repentance & tristesse selon Dieu fasse des efforts pour nous esleuer à Dieu. Celle qui est selon le monde ne regarde que l'abysme où elle est, & s'y plonge par desespoir : car elle n'a point de foy pour s'esleuer à Dieu. Ainsi Caïn ayant peché ne regarde que la grandeur de la peine, & y termine sa repentance, disant ma punition est plus grande que ie ne puis porter. Et Iudas dans la profondeur de son anxieté, s'alla precipiter. Mais le fidele prend courage de regarder à son Dieu & l'inuoquer, par la cognoissance & persuasion qu'il a de sa bonté : outre qu'il sẽt parmy sa tristesse des émotions d'amour enuers Dieu, & que le déplaisir qu'il a de l'auoir offencé est joint au desir de se conuertir à luy, & à l'esperance & dessein de s'amender. Partant le Prophete dit icy, Seigneur ie t'inuoque des lieux profonds, que ton aureille soit attentiue à mes supplications.

POurtant aussi nostre Prophete recourt au throne de grace, disant, Il y a pardon par deuers toy afin que tu sois craint. En quoy il y a deux choses requises conjointement & inseparablement en la vraye repentance, le recours au pardon, & le dessein d'amendement & de sanctification : le Prophete demandant à Dieu pardõ, non pour demeurer en ses pechez & offences, mais pour craindre Dieu, & le seruir.

Il y a pardon deuers toy. La misericorde diuine à pardonner aux pecheurs repentans, est vne proprieté qui resulte de sa nature toute bonne & toute encline à bien faire à sa creature : laquelle proprieté a esté manifestée depuis que l'homme eût peché, par le support duquel Dieu a vsé enuers luy, & par les richesses de sa benignité, de sa Rom. ch. 2. patience & longue attente, par lesquelles il inuite les hommes à repentance. C'est pourquoy les nations mesmes que Dieu n'auoit pas esclairées de sa cognoissance, ont fait profession d'implorer la misericorde & le pardon de la Diuinité. Mais l'alliance de grace, qui auoit esté traictée auec Abrahã en Iesus-Christ, reueloit à plein, & promettoit expressement misericorde & grace aux pecheurs repentans. Là Dieu témoigne auec serment qu'il ne veut point la mort du pecheur, Ezech. 33. mais qu'il se conuertisse & qu'il viue : là il declare qu'il a pour sacrifices agreables le cœur froissé & brisé ; & que Ps. 51. quand les pechez seroient Es. 1. rouges comme cramoisi ils seront blanchis comme la neige, moyẽnant qu'on cesse de mal faire, & apprenne à biẽ faire. Là il declare qu'autant Ps. 103. que les Cieux sont esleuez par dessus la terre, autant est grande sa bonté sur ceux qui le reuerent, qu'il a esloigné d'eux leurs forfaits, autãt que l'Orient est esloigné de l'Occident ; que de telle compassion qu'vn Pere est esmeu enuers ses enfans, de telle compassion est esmeu l'Eternel enuers ceux qui le craignent. C'est donc là dessus que le Prophete se fõde maintenant, quand il dit, Il y a pardon pardeuers toy, aussi adjouste- il qu'il y a gratuité par- deuers l'Eternel, & redemption en abondance, & qu'il racheptera Israël de toutes iniquitez. Termes, par lesquels l'Esprit de Dieu a regardé la redemption que le Christ obtiendroit à son peuple sous le nouueau Testament, & de laquelle la grandeur immense nous est reuelée en l'Euangile, là où nous voyons que Dieu par ses compassions a donné son fils à ce que par sa mort il expiast les pechez du monde. C'est icy où nous voyons qu'il y a grace en abondance, & misericorde immense pardeuers luy. C'est icy où il a fait voir des richesses de grace & de charité, voire a fait voir qu'il est tout charité, selon que dit S. Iean : En cela est manifestée la charité de Dieu enuers nous, non point que nous ayons aymé Dieu, mais que luy nous a aymez & a donné son fils, pour estre propitiation pour nos pechez. C'est ce fondement que l'Apostre prend lors qu'il se iuge le premier 1. Tim. 1. v. 15. des pecheurs, disant, Cette parole est certaine que Iesus- Christ est venu au monde pour Rom. 5. sauuer les pecheurs, desquels ie suis le premier. Car là où le peché a abondé, la grace a abondé par dessus. Par ce moyen donc celuy qui ne pouuoit subsister deuãt Dieu, trouue vne subsistance ferme & asseurée au sang de Iesus- Christ, puisque nous auons redemption en son sang : à sçauoir, remission des pechez Colloss.Coloss. 1. selon les richesses de sa grace ; Et icy l'Apostre nous represente subsistans auec telle asseurance que nous puissions dire qui est-ce qui condamnera ? Rom. 8. Christ est celuy qui est mort. Et icy comme le fidele se void iustifié & purgé de tout peché par le sãg de Iesus-Christ deuant Dieu, aussi attend il icy bas tous effets de la grace & de la paix de Dieu parmy les miseres de cette vie ; & quand il voit la face de Dieu courroucée à cause des pechez, se prosternant deuant Dieu auec vraye repentance, il attend à cause du sang de l'alliance toute grace & deliurance, selon qu'il sera expedient pour son salut & pour la gloitegloire de Dieu. Et d'icy resulte, mes Freres, que par cette alliance la justification de l'homme est toute gratuite & toute par la foy, c'est à dire par le recours d'vn cœur repentant à la promesse de grace : selon que dit l'Apostre Rom. 4. c'est par foy afin que ce soit par grace : Et pretendre subsister par œuures & par perfection de justice est vne contradiction euidente, puis que la foy est le recours au pardon & à la misericorde. Quiconque donc subsiste deuant Dieu y subsiste en la maniere que propose icy le ProphetProphete : à sçauoir en disant, Seigneur si tu prens garde aux ini- iniquitez qui subsistera ? mais il y a pardon pardeuers toy ; qui est la maniere de subsister que Saint Iean propose, disant si nous confessons nos pechez, 1. Jean. ch. 1. Dieu est fidele & juste pour nous pardonner nos pechez.

Or la foy en regardant le pardon en embrasse aussi la condition, à sçauoir de delaisser ses pechez & se conuertir à Dieu, pour le craindre & le seruir, selon que dit icy le Prophete, Il y a pardon par- deuers toy, afin que tu sois craint , Car la crainte de Dieu exprime en general l'amendement de vie & l'obeïssance aux commandemens de Dieu. Pource que comme la cause de l'abandon au peché est de ne craindre point Dieu, aussi le motif de l'obeïssance à Dieu & de la pureté de la vie, est de le craindre : selon qu'il est dit Prouerb. 16. par la crainte de l'Eternel on se détourne du mal. Pourtant Salomon definit la crainte de Dieu par hair le mal , Prouerb. 8. la crainte de l'Eternel est de hair le mal , & communément craindre Dieu & se détourner du mal, ou garder ses commandemens sont pris pour vne mesme chose, comme Iob 28. la crainte de l'Eternel est la sapiance, & se détourner du mal est intelligence : & Eccles. 12. crain Dieu & garde ses commandemens, car c'est le tout de l'homme. De là vient qu'au Ps. 19. la crainte est prise pour les commandemens de Dieu, Les mandemens de l'Eternel sont droits, le commandement de l'Eternel est pur, la crainte de l'Eternel est nette demeurante à perpetuité , &c. La condition doncques du pardon est le renoncement aux pechez & l'obeïssance à Dieu : selon que dit Salomon Prou. 28. qui confesse ses pechez & les delaisse obtiendra misericorde. Toute nostre humiliation est feintise & hypocrisie deuant Dieu sans cela. Car comment peux-tu, ô homme, gemir pour tes pechez, si tu n'as dessein de t'en retirer ? as-tu de la tristesse pour ce à quoy presentement tu donnes ton cœur & ton amour, & dont tu ne te veux point departir ? viens-tu pas te mocquer de Dieu comparoissant de la sorte en sa presence ? En tel estat ton humiliation exterieure & ton jeusne adjouste mesmes vn nouueau crime à tes iniquitez, à sçauoir l'hypocrisie, & le mépris de Dieu, & par ton cœur endurcy & qui est sans repentance, tu t'amasses ire au iour de l'ire & du juste jugement de Dieu. Nos pechez donc sans l'amendement de nostre vie demeurent rouges deuant Dieu comme vermillon. Car Dieu n'a promis de les lauer que sous la condition qu'il a exprimée, Esa. 1. lauez-vous, nettoyez-vous, ostez de deuant mes yeux la malice de vos actiõs, cessez de mal-faire, apprenez à bien-faire, recherchez droicture, redressez celuy qui est foulé, faites droit à l'orphelin, debattez la cause de la vefue : autrement, dit-il, quand vous estendrez vos mains, ie cacheray mes yeux arriere de vous, mesme quand vous multiplierez vos requestes ie ne les exauceray point : & chap. 58. Est-ce là le jeusne que i'ay choisi, que l'homme afflige son ame vn iour ? est-ce en courbant la teste comme le jongjonc, & estendant le sac & la cendre ? appelleras-tu cela jeusne & iour acceptable à l'Eternel ? n'est-ce pas icy plustost le jeusne que i'ay choisi, que tu dénouës les liens de méchanceté, que tu rompes de ton pain à celuy qui a faim, & que tu faßes venir en ta maison les affligez qui sont en pauure estat, quand tu vois celuy qui est nud que tu le couures, & que tu ne te caches point arriere de ta chair, adonc ta lumiere s'esleuera comme l'aube du iour, & ta guerison germera incontinent, ta iustice ira deuant toy, & la gloire de l'Eternel sera ton arriere-garde .

Or remarquez ce mot [Afin afin que tu sois craint] lequel nous apprend que le but de Dieu en l'exercice & dispensation de sa grace à pardonner, est nostre amendement & sanctification. Et cela estant, comment pouuons nous obtenir pardon si nous ne tendons à son but & n'y rapportons toutes nos resolutions ? Certes, la saincteté estant de la nature de Dieu, s'il nous reçoit à mercy, il faut que ce soit pour nous rendre participans de son image en justice & saincteté. Il se renieroit soy-mesme s'il acquiesçoit à l'estat des vices & pechez de l'homme. De sorte que c'est par vne necessité indispensable que Dieu requiert que le pecheur qui reçoit grace & pardon s'estudie à craindre & à cheminer en ses commandemens. Aussi c'est à quoy se termine toute l'œuure de nostre redemptiõ, à sçauoir de nous rendre saints & purs deuant Dieu : selon que l'Escriture nous dit Tit. 2. Iesus-Christ s'est donné soy mesme pour nous, afin qu'il uousnous recheptast de toute iniquité, & nous purifiast pour luy estre vn peuple peculier addonné à bonnes œuures. Et Eph. 5. Il a aimé l'Eglise & s'est donné soy-mesme pour elle, afin qu'il la sanctifiast, l'ayant nettoyée au l'auementlauement d'eau par la parole, & qu'il se la rendist vne Eglise glorieuse, n'ayant tache ny ride ny autre chose. S. Pierre au au 2. de sa 1. Il a porté nos pechez en son corps sur le bois, afin que mourans au peché, nous viuions à justice ; Pourtant Saint Iean dit que si nous cheminons en lumiere comme Dieu est lumiere, nous auons communion auec luy, & le sang de son fils Iesus-Christ nous purge de tout peché , ne recognoissant le sang de Iesus-Christ estre alloüé qu'à ceux qui satisfõt à la fin & au but de la foy & de l'Euangile. Et icy s'aneantit l'objection des profanes qui disent, nous pecherons afin que grace abonde ; veu qu'au contraire la grace ayant pour but de nous faire mourir à peché, nul ne peut obtenir la grace qu'il ne tende tende à cette fin. Et d'icy resulte que si nous demandons à Dieu pardon de nos pechez simplement pour détourner de dessus nous ses iugemens, & les miseres dont nous sommes menacés, & si nous n'auons autre but, c'est l'amour de nous-mesmes & l'aise de nostre chair qui nous cõduit, & non la foy & la vraye repentance. Car pour celle-cy il faut que nous demandions à Dieu pardon des fautes passées pour nous en abstenir à l'aduenir, & mieux craindre Dieu que nous n'auons fait. Mais aussi de ces Mots [ afin que tu sois craint ] apprenons quelle est la nature de la vraye crainte de Dieu & de l'obeïssance que Dieu requiert, à sçauoir non vne crainte & obeïssance seruile, que la seule apprehension de la peine & des jugemens produit, mais vne crainte filiale, consistant en reuerence & amour, & prouenante du sentiment de la bonté paternelle de Dieu enuers nous, puis que le Prophete veut que nous craignions Dieu de ce qu'il y a pardon pardeuers luy ; & par consequent que la persuasion de la misericorde de Dieu produise cét effet. Et c'est là, mes Freres, le vray motif Euangelique, d'estre incitez par la contemplation de la grande bonté de Dieu enuers nous, à nous consacrer à son seruice & à son obeïssance : selon que S. Pierre nous propose la qualité de Pere & le prix inestimable par lequel Dieu nous a racheptez pour nous porter à le craindre. Si, dit-il, vous inuoquez pour Pere celuy qui sans auoir esgard à l'apparence des personnes, iuge selon l'œuure d'vn chacun, conuersez en crainte durãt le temps de vostre sejour temporel, sçachans que vous auez estez racheptez de vostre vaine conuersion qui nous auoit esté enseignee par vos Peres, non point par choses corruptibles, comme par or ou par argent, mais par le precieux sang de Christ comme de l'agneau sans sans macule & sans tache .

APpliquons nous maintenant ce propos.

Le Prophete tant pour soy que pour toute l'Eglise de son temps crioit à Dieu des lieux profonds, Entrons en nos consciences, mes Freres, pour voir s'il y a vne telle tristesse d'auoir offensé Dieu que le Prophete l'a proposée, à sçauoir non legere & superficielle qui est sans fruit, mais profonde & efficacieuse. Sentons donc, sentons nos pechez, afin que nous n'en sentions les peines : gemissons pour nos offenses, afin que nous ne gemissions pour nos calamitez. Voyons combien nous auons entassé de pechez & d'offenses les vnes sur les autres, afin que la hauteur & profondeur nous en estonne, & que de là dedans comme de dedans vn abysme profond nous nous escriions à Dieu. Ne regardons pas à la subsistence que Dieu nous donne, & à l'estat de paix & de tranquilité dans lequel nous nous trouuons par son support : Mais à ce que nous meriterions de sa iustice & de son courroux, aussi bien que plusieurs Eglises effectiuement destruittes & desolées, ou miserablement troublées, & nous verrons vn gouffre de calamitez dont il faudra que nous criions à Dieu. Et pour nous joindre icy à l'interest de nos concitoyens, quand nous voyons les profondes ruïnes dans lesquelles sont tombez par la guerre tant d'Estats estrangers auparauant tres-florissans : ne deuons nous pas reconnoistre en leur calamité, celle en laquelle nous eussions pû nous trouuer, si Dieu n'eust par sa grande bonté frustré le dessein des ennemis de cét Estat, & n'eust maintenu & beny la Couronne de nostre Roy ? Et au regard d'vn chacun de nous, mes Freres, voyans les miseres & ruines où sont tombées plusieurs familles particulieres qui n'estoient point plus coulpables que les nostres, gemissons à Dieu de la profonde misere où nous serions, si Dieu ne nous eust espargnez ; Et ne doutons point que Dieu prepare encor diuerses fosses profondes de maux pour nous y faire cheoir, si nous ne nous amendons ; Nous souuenans des propos de Iesus-Christ touchant les Galileens, dont Pilate auoit meslé le sang auec les sacrifices, & touchant les 18. personnes sur lesquelles estoit tombée la Tour de Siloé. Pensez-vous, dit-il, que ceux-là eussent offensé plus que les autres ? non, vous dis-ie : Mais si vous ne vous amendez, vous perirez tous semblablement .

Que nos cris ne soient pas simplement ceux que la nature extorque des hommes en leurs maux ; mais ceux que la pieté & la vraye repentance pousse vers le Ciel par le desplaisir d'auoir peché & irrité le Seigneur. Que ce soient des cris d'vne inuocation religieuse que la foy produise en nous ; pour recourir à celuy mesmes qui nous menace, & implorer sa grace & son esprit à nostre amendement & conuersion : afin qu'à la profondeur de nostre corruption, il oppose la profondeur de sa vertu & de ses compassions à nostre sanctification & consolation.

Et cependant recueillons des paroles de nostre Prophete cette consolation, qu'encor que le throne de Dieu soit infiniment esleué au dessus de nous, il n'y a rien de si profond en la terre en miseres, d'où nos prieres & nos soupirs ne montent à luy : Fussions nous dedans le fonds de la mer & du ventre de la Baleine comme Ionas : ou dans les profondes cauernes de la terre comme Dauid pendant la persecution de Saül : ou en la fosse des lyons comme Daniel ; ou au fonds des prisons comme Paul & Silas en la ville de Philippes, nos gemissemens & nos cris paruiendront à Dieu & seront ouys au throne de sa grace : A ce que nous experimentons ce que dit l Apostre Rom. 8. que ni hautesse ni profondeur ne nous pourra separer de la dilection qu'il nous a monstrée en Iesus Christ. Et qu'il y a à l'opposite de toute la hauteur & profondeur de nos miseres, vne longueur & largeur, vne hauteur & profondeur de la dilection de Christ, laquelle surpasse tout entendement , comme cela est dit Ephes. 3.

Et pour presenter nos prieres deuant le throne de sa Majesté, souuenons-nous de commencer par la recognoissance & la confession qu'à faite icy nostre Prophete, Si tu prens garde aux iniquitez Seigneur qui est-ce qui subsistera ? faisons comme ce pauure peager qui n'osant leuer les yeux au Ciel frappoit sa poitrine disant, ô Dieu sois propice à moy qui suis pecheur ; & comme Esdras, Mon Dieu i'ay honte, & suis trop confus pour esleuer ma face vers toy. Car nos iniquitez sont multipliées par dessus la teste, & nostre coulpe est accreuë iusqu'aux Cieux. Les fideles Ps. 106. disoient, Nous auons peché uecauec nos Peres, nous auons fait iniquement, nous auons meschamment fait. Nos Peres n'ont point esté attentifs à tes merueilles en Egypte, Ils n'ont eu souuenance de la multitude de tes gratuitez. C'est ce qu'il faut que nous disions de nous mesmes. Nous auions esté deliurez de l'Ægypte spirituelle, c'est à dire de la seruitude du peché & de la mort, & de celle des erreurs & superstitions du siecle : comment est-ce que nous auons vescu depuis ? quelle souuenance auons-nous euë de la multitude de ces gratuitez ? En quel estat de gratitude enuers Dieu est auiourd'huy nostre corps ? Mais quels pechez & quels crimes y a-il qui ne se trouuent parmy nous ! L'auarice y est-elle pas ardente, l'injustice, la fraude & l'iniquité frequentes & abondantes ? Les paillardises & les adulteres n'y font elles pas perir nostre sainte profession ? & les voluptez charnelles emportent- elles pas les esprits à trauers champs ? les plaisirs de la chair y font-ils pas mettre sous le pied toutes les considerations de la crainte de Dieu, portans les vns à la reuolte, & les autres à des mariages contraires à la pieté ? la gourmandise & l'yurognerie y a elle pas aussi sõ regne ? & le luxe & la vanité n'y engloutissent-ils pas les aumosnes ? les haines, les envies, les querelles & procez, les médisances & les calomnies y sont-elles pas choses communes ? & où est la reformation que nous professons ? n'estoit-ce pas en nos mœurs, aussi bien qu'en la doctrine, qu'il falloit que nous la monstrassions ? ne meritons nous pas doncques que Dieu nous oste son chandelier & nous traicte comme des ingrats, & des rebelles & contempteurs de son nom ?

I'aduoüe qu'il y a nombre de bonnes ames parmy nous qui gemissent à Dieu, & desquelles la pieté & l'integrité luy est agreable : aussi sont-ce elles qui arrestent son bras : Mais i'ay à dire deux choses. L'vne qu'encor celles là ont des defauts dont elles doiuent gemir & tascher de se corriger : & l'autre, que le nombre de ces personnes-là est petit, & qu'il ne va pas croissant.

Mais puis qu'ainsi est qu'il y a pardon pardeuers Dieu afin qu'il soit craint, voyons si nous auons le dessein de le craindre, & d'arrester le cours de nos offenses & iniquitez pour y renoncer dés ce moment, afin de cheminer en pieté, iustice & saincteté. Examinons si dés à present nous voulons mettre sous les pieds tous nos interests mondains pour glorifier Dieu par toutes nos actions & rechercher son Royaume & sa iustice, & si nous voulousvoulons rejetter tous nos plaisirs charnels, ayans deuant nos yeux l'excellence de la vocation de Dieu, & les richesses de la gloire de son heritage en ses Saints. Examinons si nous voulons changer nostre injustice en droicture & équité, nostre auarice en charité & beneficence : nos haines, envies, & mesdisances, en dilection & bienveillance ; nos excés en temperance. En somme, si nous voulons viure en ce present siecle sobrement, justement & religieusement.

Si ainsi est, mes Freres, nous experimẽterons qu'il y a pardon pardeuers Dieu, voire tant & plus de grace & de pardon. Dieu ratifiera dans le Ciel vostre pardon ainsi que nous vous l'annonçons aujourd'huy en son nom, & les Anges s'éjoüiront de nostre conuersion. Le Pere celeste ouurira les bras de ses compassions pour nous receuoir à mercy, & pour estendre sur nous ses benedictions & nous couurir de sa protection ; Icy nous verrons que quand nos pechez seroient montez iusques au Ciel, sa gratuité est encore au dessus. Iesus-Christ nostre mediateur se presentera pour nous à la bresche de l'ire de Dieu auec le sang de l'alliance, & nous obtiendra toute grace par son intercession. Ce Fils de Dieu nous reconnoistra pour les membres sacrez de son corps, & Dieu nous aura agreables en ce bien-aimé. Ainsi nous subsisterons par le merite de Iesus-Christ, & toutes choses desormais nous ayderont en bien : Nous serons esclairez des gracieux rayons de la face face de Dieu en tout nostre besoin ; sa prouidence admirable resplendira sur nous en deliurances, & l'esprit de sa grace remplira nos cœurs de consolation, iusqu'à ce que finalement il nous esleue en son Paradis pour estre rassasiez de joye en la contemplation de sa face, & joüir pesdes plaisirs qui sont en sa dextre pour iamais. Ainsi soit-il.