Lors Ionas commença d'entrer en la ville le chemin d'une iournee ; si cria, & dit, Encore quarante iours & Niniue sera renuersee . Et les hommes de Niniue creurent à Dieu,& publierent le ieusne , & se vestirent de sacs , depuis le plus grand d entr'eux , iusques au plus petit .

SI nostre ame est naturellement capable d'obeissance, aussi est-elle nee à ie ne sçay quelle fierté franche , & à vne liberté noble qui ne souffre point de contrainte. La force la fait reculer, les liens la mettent en fougue , la violence la rend opiniastre ; Et comme vn cheual genereux entre en des desespoirs capricieux qu'il se void gourmandé par de rudes brides, de camorres & caueçons, & se laisse au contraire conduire à vn filet,& mener par douceur. Ainsi nostre ame est tellement disposee qu'elle se picque contre la rigueur, & conçoit vn tel despit si elle se void gourmandee, que mettant à part toute modestie elle s'effarouche plustost que d'obeïr ; au lieu qu'estant sollicitee doucement elle fleschit selon ses forces à ce qui lui est demandé. C'est ce que les Anciens Philosophes ont recognu , & particulierement Seneque qui nous en a laissé cette sentence remarquable, disant, l'esprit de l'homme est genereux, tendant au rebours parmi les difficultez, & est plus facilement mené que tiré . A quoy nous pouuons adjouster ce qui se void encore tous les iours dans la pratique du monde , l'experience nous apprenant que les cœurs magnanimes se portent plus volontiers à l'ottroy d'vne demande amiable que si on les braue par menaces , ou qu'on tasche de les esmouuoir par crainte à l'execu- l'execution de quelque deuoir ; d'où aduient que l'histoire prophane rapporte que Pyrrhus Roy des Epirotes, se rendit autresfois maistre de plus de villes par la langue desertediserte de Cyneas orateur, que par la force de ses armes, tant les douces paroles sont puissantes sur l'esprit de l'homme pour le ployer. Or si en toutes choses il est necessaire d'auoir esgard à cette disposition naturelle de l'ame , c'est principalement és œuvres de pieté que cela se doit soigneusement prattiquer ; car de penser qu'on puisse forcer les hommes au seruice de Dieu,& les contraindre par violence au trauail de leur salut , c'est se tromper tout à fait ; voire les actions salutaires sont tellement esloignees de l'inclination de l'ame, qu'elle n'a affection ni disposition quelconque pour icelles , ains ne peut que les detester , tant sa deprauation est grande à cause du premier peché: tellement que pour porter les hommes à icelles , il est besoin de les persuader & non forcer : & pour cet effect vser d'exhortations amiables, & non de rudes commandements , leur remonstrer leur deuoir auec douceur , afin de les esmouuoir par amour , & non pas les menacer auec rigueur afin de les fleschir par crainte ; dont nous voyons en Ezechiel ch.34 que l'Eternel mesme se plaind contre les Pasteurs d'Israel de ce qu'ils auoyent manqué en cette sorte à la prattique de ce deuoir, disant, Vous auez maistrisé mes brebis auec seuerité & rigueur . Neantmoins quoy que cela soit fort veritable , & necessaire de tenir cette methode pour l'ordinaire , si est-ce qu'il y a des temps & des personnes tellement disposees qu'ils se detourneront plustost de quelque mal par la crainte de la peine ; & se voyants viuement menacés d'icelle , que par toutes les douces semonces qu'on leur sçauroit adresser: d'où aduient que quoy que la Parole de Dieu contienne des promesses gracieuses pour esmouuoir les pecheurs par amour , si est-ce que les menaces qu'elle denonce ont quelquesfois autant ou plus de force pour les esmouuoir par crainte , l'apprehension de de defaillir leur donnant des dispositions à leur deuoir , & leur faisant receuoir auec respect & obeissance les exhortations qui leur sont faites à icelui.

Nous en auons ici auiourd'huy vn exemple memorable en la personne des habitans de Niniue , és paroles dont ie viens de vous faire lecture , où le Prophete Ionas ayant denoncé le dernier iugement qui deuoit estre desployé contre cette ville à son entiere destruction, suiuant la charge expresse qu'il en auoit receu de la part de l'Eternel : & lui ayant marqué vn certain temps auquel cela deuoit estre accompli , afin qu'ils prinssent garde à eux cependant , & taschassent de prevenir leur ruine par les moyens conuenables ; la denonciation de cette menace toucha tellement leur cœur, que les voila en mesme temps en estat d'humilité pour arrester le courroux de Dieu par repentance , & destourner cet orage de dessus leurs testes , qui estoit preparé à leurs vices afin de les punir,ainsi que ces paroles nous le tesmoignent , lors que l'Esprit de Dieu ayant marqué la charge que l'Eternel donna à ce sien Prophete d'aller crier contre cette ville , il continue le recit en cette sorte, Lors Ionas commença d'entrer en la ville le chemin d'une iournee ; si cria, & dit , Encore quarante iours & Niniue sera renuersee : & les hommes de Niniue creurent à Dieu, & publierent le ieusne , & se vestirent de sacs depuis le plus grand d'entr'eux iusques au plus petit .

Tres chers freres, l'Escriture Saincte contenant de bons & mauuais exemples , nous vous en auons mis à ce matin vn mauuais deuant les yeux, à l'imitation des peintres qui representent les vices auec leur laideur sur vn tableau afin d'obliger vn chascun à les abhorrer , & non pour vous donner occasion de l'ensuiure,pour faire comme les corbeaux qui s'attachent aux charongnes & laissent les bestes viuantes. L'endurcissement des Iuifs vous ayant esté proposé en ma premiere predication comme vn crime detestable, qui obligea l'Eternel à les abandonner à la dureté de leur cœur ; & main- maintenant en voici vn autre du tout bon & digne de louange , pour vous obliger à vous conformer à icelui en cette occasion d'humilité où nous vous trouuons, & destourner par ce moyen les iugemens de l'ire de Dieu que nos pechés ont prouoqué & prouoquent encore tous les iours ; estant chose certaine que si nous voulons reussir en notre dessein,nous ne saurions mieux faire que ce que ceux de Niniue ont fait se voyants menacés de ruine afin de subsister bienheureux : face doncques ce grand Dieu que sa Parole touche auiourd'huy aussi viuement nos cœurs, & que leur exemple frappe tellement nostre veuë,que nous en deuenions pareillement repentans ; differents en cela du Cameleon, duquel on rapporte qu'il reçoit toutes sortes de couleurs qui se presentent à lui , excepté la rouge,symbole de la honte, & la blanche symbole de la vertu. Et partant afin d'estre portés à cela d'autant plus efficacieusement , nous vous deduirons tout le contenu de ces paroles par ces deux generales considerations, moyennant la faueur du ciel: Premierement nous verrons la procedure de Ionas enuers ceux de Niniue : Secondement le profit qu'ils ont fait de sa parole.

Pour le premier , l'Esprit de Dieu le conçoit en ces termes , Lors Ionas commença d'entrer dans la ville , le chemin d'vne iournee; si cria , & dit , Encore quarante iours & Niniue sera renuersee . Niniue estoit vne ville d'Assyrie situee aupres du fleuue du Tygre,laquelle Assur edifia sortant de la terre de Sennaar, comme il est rapporté , Genes. chap. 10. Voire c'estoit la capitale du Royaume, & où estoit le siege des Rois Assyriens, qui auoit la monarchie de l'vniuers, grande en estendue s'il y en auoit point en toute la terre , veu qu'il est remarqué au chap. troisiesme de ce liure, que c'estoit vne ville de trois iournees de chemin ; A quoy les Autheurs profanes adjoustent qu'elle auoit quatre cents huictante stades de tour , qui reuiennent à trente petites lieuës ; Aussi estoit-elle fortifiee de quinze cents tours , & enrichie de toutes les despouïlles pouïlles de l'Orient, grandement peuplee par dessus les autres : puis qu'il est remarqué chap.4. qu'il y auoit en icelle plus de six vingts mille petits enfans qui ne sçauoyent point la difference qu'il y auoit entre leur main droite & la main gauche ; Il est vray qu'elle n'estoit pas comprinse dans l'alliance de Dieu , comme n'estant pas dans le destroit de l'habitation de son peuple. Ains au contraire elle en estoit dehors , & par consequent vne ville ennemie , qui auoit allumé son ire en diuerses façons , & irrité sa Iustice par la malice de ses deportements. Et c'est ce qui fait ttouuertrouuer estrange d'abord l'enuoy de ce sien Prophete vers elle , & qui le rend d'autant plus remarquable : Mais à cela nous pouuons dire que quoy qu'elle ne fust pas comprinse dans le benefice de son alliance,neantmoins il lui a voulu enuoyer ce prescheur de repentance , non seulement afin que par leur conuersion ils fussent comme les premices des Gentils qui deuoyent estre vn iour appelés à la cõmunion du salut eternel;mais aussi afin de faire hõte aux Iuifs qui estoyent les depositaires de ses oracles,& le peuple qui se glorifioit de son alliance , en ce qu'oyants tous les iours les exhortations qui leur estoyent faites à l'amendement de vie par les Sacrificateurs & Prophetes que Dieu leur enuoyoit , ils se mocquoyent de sa parole , & persistoyent dans vne impenitence obstinee de leurs crimes , cependant que ceux- ci s'humilierent par repentance à la premiere predication qu'ils ouïrent, dont vous voyez en S. Luc chap. 11 que Iesus Christ mesme parlant de l'endurcissement des Iuifs de son temps , dit que ceux de Niniue se leueront au iugement auec les hommes de cette generation, & la condamneront.

Voici doncques ce Prophete qui ayant receu charge de l'Eternel d'aller porter sa Parole parmi eux, entre dans la ville le chemin d'vne iournée, & se prend à crier ; En quoy nous trouuons qu'il s'acquitte dignement de sa commission , & y remarquons trois choses notables qui regardoyent l'execution d'icelle : la premier est la fidelité , veu que que c'estoit le commandement expres que l'Eternel lui auoit fait de crier, comme il appert du chapitre 1. tout ainsi qu'à son Prophete Esaïe chap. 58.lors qu'il l'enuoya vers Ierusalem, sa volonté estant que ses seruiteurs ne cachent point la Parole qu'il leur a commise pour la garder sous vn lasche silence; ainsi qu'il en print à Ieremie,lequel ayant esté frappé par Phasçur preuost de la maison de l'Eternel , se resolut de ne prescher iamais plus en son nom ; ains qu'ils la mettent au contraire en euidence , & la facent entendre à ceux ausquels elle est adressee , considerans qu'ils sont comme les cornets d'Israel pour faire retentir leurs voix : iusques là, que Ieremie chap. 20.ayant resolu de se taire , il confesse lui mesme qu'il a senti comme vn feu qui le brusloit au dedans, & a prononcé du depuis cette sentence , Maudit celui qui fera la besongne de l'Eternel frauduleusement ,chap.48 de ses propheties. La seconde chose qui paroist en ce cri c'est le zele dont il estoit porté en l'exercice de sa commission: car le zele estant vne passion mixte composee de douleur & d'amour: de douleur,pour le mal qui interesse la gloire de Dieu ; & d'amour , pour le bien qui sert à l'illustration d'icelle : & toutes les affections de l'ame ayants leur siege au cœur, il est certain que ce cœur estant embrazé de zele,qui est le sainct feu de nos ames , il enfle le gosier , ouure la bouche , & deslie la langue des seruiteurs de Dieu pour prononcer auec action les choses qu'ils desirent estre entendues pour le seruice de son nom. C'est pourquoy Iesus Christ estant animé de cette saincte passion, comme le Prophete Dauid l'auoit declaré en sa personne au Ps.69. disant , Le zele de ta maison m'a mangé ; il tesmoignoit particulierement ce sien zele en criant lors qu'il enseignoit dans le temple , ainsi que cela se void, Iean chap. 7.la troisiesme est la hardiesse: car il se void par experience que les gens timides & peu resolus n'ouurent qu'à demi leur bouche lors qu'il est question de parler en des occasions importantes ; en telle sorte qu'à peine peuuent peuuent-ils estre ouïs de ceux ausquels ils parlent , tant leur voix se trouue foible & estranglee par la force de la peur ; au lieu que ceux qui ne craignent rien publient haut & clair ce qu'ils ont à dire , afin de se faire ouir, desireux de respondre au but de leur vocation. Courage admirable , & lequel lui venoit sans doute de l'Esprit de Dieu qui le fortifioit , comme estant employé à vne commission dangereuse, & où toutes les apparences estoyent que sa parole lui feroit receuoir du desplaisir , comme ayant à faire à vn peuple incognu, orgueilleux , vicieux & profane : l'Eternel qui l'enuoyoit estant vn bon maistre qui n'abandonne iamais ses seruiteurs au besoin , suiuant la promesse qu'il en faisoit au Prophete Ieremie lors qu'il l'enuoya vers les Iuifs pour prophetizer contre eux,disant , Ne crain point de te trouuer deuant eux , car ie suis auec toy pour te deliurer : ainsi que cela nous est marqué au chap.1. de ses propheties.

Et certes considerans l'estat de ces habitans de Niniue,nous trouuõs qu'il estoit bien necessaire qu'il criast , voir qu'estans destitués de la cognoissance de Dieu , & esleués en vne prosperité excessiue , les idolatries y estoyent extremes , & les vices à leur comble , selon que l'Eternel mesme le fit cognoistre à ce sien Prophete, lors qu'il lui donna cette commission , disant , chap. 1. Leue toy , & t'en va en Niniue la grande ville , & crie contre elle : car leur malice est montee deuant moy . Leur condition estant par consequent iustement semblable à celle de Sodome & de Gomorrhe , lors que Dieu les voulut consumer par le feu du ciel , lui mesme leur ayant rendu ce tesmoignage , disant , que leur cri estoit augmenté , & leur peché fort aggraué ; voire que leur cri estoit paruenu iusques à lui , comme il se void chap. 18.de la Genese. Et ce qui rendois leur condition plus desesperee , c'est que chargés de pechés ils n'en sentoyent pas la pesanteur: souïllés de vices, ils n'en cognoissoyent pas la laideur, ains viuoyent dans vne securité charnelle , & reposoyent en leurs delices d'vn d'vn sommeil beaucoup plus profond que celui d'Adam lors qu'il perdit sa coste sans le sentir: & par consequent vn peuple qu'vne voix basse & languissante n'eust pas peu esveiller. C'est en effet l'estat des pecheurs qui sont destitués de la cognoissance de Dieu,la corruption hereditaire d'Adam tenant tous leurs sens & toutes les facultés de leur ame assoupies pour ne sentir pas les maux qui les estranglent;en telle sorte que quoy que Dieu les esclaire par les œuures de la nature & de la prouidence, quoy qu'il parle à eux par la bouche de toutes les creatures , ils n'y voyent ni n'y entendent non plus que les aueugles & les sourds: & quoy que les iugemens soyent prests de fondre sur eux, & qu'ils commencent à estre desployés pour les accabler , ils ne les craignent ni ne les sentent,ains sont en cela iustement semblables à Ionas lequel dormoit profondement au fonds du nauire tandis que l'orage le battoit , & que les autres estoyent en prieres , crians vn chascun vers son Dieu pour euiter le naufrage;non plus qu'ils ne preuoyent pas leurs maux, ainsi sont capables d'estre surpris en leurs pechés par iceux sans y penser; tout ainsi que Sisara lors que Iahel lui perça la temple de la teste auec vn clou pendant qu'il dormoit , apres lui auoir donné du laict à boire, comme il est remarqué cha. 4 du liure des Iuges.

Ce Sainct Prophete doncques criant dans la ville de Niniue , en executant sa commission de la part de l'Eternel, voici la denonciation qu'il leur faisoit, Encore quarante iours & Niniue sera renuersee . Où paroissent quatre choses notables, & le dessein que l'Eternel auoit contre cette ville,les pechés de laquelle estans grands , il auoit resolu d'armer le bras de sa iustice pour en faire vne vengeance exemplaire par les punitions extremes de son indignation : en telle sorte qu'il ne leur donnoit que quarante iours de delay,apres lesquels ils deuoyent receuoir le salaire de leurs demerites , par la ruine de leur estat, la desolation de leurs maisons,la perte de leurs biens , & la destruction entiere de leurs corps qui deuoyent estre tre enseuelis dans les ruines de la ville, afin qu'il n'en fust iamais plus memoire sur la terre,que pour faire voir qu'ils auoyent autresfois esté. C'est en effect comme cela qu'il a accoustumé de traitter souuentesfois les villes les plus florissantes du monde,à raison de leur impieté & souueraine peruersité:tesmoin Ierusalem , en laquelle ne fut laissee pierre sur pierre, suiuant la prediction de Iesus Christ , Matth. chap. 24. Et s'il est question d'en alleguer d'autres , où est maintenant la ville de Laodicee? celle de Thebes, Carthage , Corinthe, Athenes, & Ephese, qui ayans esté grãdement illustres , & porté leur reputation par tout l'vniuers , il n'en reste rien maintenant que quelques vieilles masures, & le seul nom enregistré dans les histoires , les iugemens espouuantables du ciel estans tombés sur elles pour vne iuste vengeance de l'enormité de leurs crimes ? il est vray que la denonciation que le Prophete fait de la destruction de Niniue n'estoit pas absoluë , comme l'euenement le monstra; ains elle contenoit vne condition tacite,moyennant laquelle cela deuoit estre , & non autrement : c'est à dire, qu'elle seroit renuersee s'ils ne se repentoyent : Car c'est ainsi que les Prophetes ont accoustumé de parler : l'Eternel faisant dire aux pecheurs par leur bouche ce qu'ils ont merité, & ce qui leur doit arriuer pendant vn tel temps,en cas qu'ils ne preuiennent pas ses iugemens par amendement de vie, afin de les euiter : auquel propos vous voyez au chap.38. d'Esaïe , qu'Ezechias Roy de Iuda estant malade,le Prophete lui va tenir ces propos , disant, Dispose de ta maison,car tu t'en vas mourir, & ne viuras plus ; & neantmoins ayant reclamé la grace de Dieu auec des larmes ameres d'vne serieuse repentance qu'il respandit deuant sa face la teste tournee vers la paroi , vous voyez qu'il suruesquit. Que si tel estoit le dessein de l'Eternel en cette denonciation du Prophete contre Niniue , aussi fait-il paroistre entieremẽt en icelle sa bonté admirable,de les en aduertir auant que de le vouloir mettre en execution ; car il est certain que s'il eust voulu proceder der contr'eux auec tout le droict que sa iustice lui donnoit, il eust peu desployer ses vengeances sur leurs testes criminelles subitement & sans leur rien dire , comme il fit enuers ceux de Sodome , leur enuoyant le feu du ciel qui les surprint auant qu'ils eussent le temps de songer à eux pour se retirer. Procedure par consequent remarquable, & en laquelle nous voyõs qu'il obserue lui mesme en leur faueur la loy militaire qu'il auoit donnee iadis à son peuple, Deut. 20. disant, Quand tu t'approcheras d'vne ville pour la combattre , tu lui presenteras la paix . Car ce cri qu'il enuoye maintenant faire à ces gens estoit comme vne sommation à repentance , & vne declaration, que s'ils ne vouloyent pas fleschir sous son empire par la reception & obeissance de ses loix , ils esprouueroyent les rigueurs de son iuste courroux : mais que s'ils venoyent aussi à se recognoistre , ils subsisteroyent en leur estat comme ils faisoyent,iouïssants de ses bonnes graces , & participants aux effets de sa clemence à leur totale felicité. Et pleust à Dieu que nous qui sommes son peuple eussions prins garde à cela lors qu'il nous a enuoyé ses seruiteurs pour crier contre nos pechés : & certainement nous n'eussions pas veu les maux qui nous sont arriués à cause de nostre endurcissement : Car comme vn vieux edifice craquette auant qu'il tombe, comme la fumee deuance le feu , comme les esclairs precedent le tonnerre ; ainsi Dieu ayant resolu de nous visiter par la verge de ses chastimens, nous a plusieurs fois aduertis auant que mettre la main à l'œuure, & menacer plustost que frapper : ne pouuans pas nous excuser qu'il n'ait ouuert la bouche à ses fideles seruiteurs pour nous faire entendre que le peché gisoit à la porte , & que si nous n'amendions nostre train nous tomberions en desolation : Mais laissants à part ce discours , qui estant honteux pour nous, ne peut qu'aigrir nos douleurs sans esperance d'effacer les playes que le laps du temps a comme cicatrizees ; ie trouue ici en troisiesme lieu vn support du tout remarquable , duquel Dieu auoit auoit vsé enuers ces gens ici par le passé , les ayant espargnés iusqu'a lors, comme le Prophete le tesmoigne quand il dit , Encore quarante iours : Car il n'y a point de doute qu'ils n'eussent merité desja depuis long temps de ressentir les effects de l'indignation du ciel , veu qu'ils auoyent esté tousiours meschants , ayans conuerti les biens que Dieu leur faisoit en dissolution contre lui , & abusé entierement de leur prosperité : & neantmoins le ciel ne les auoit pas escrasés de ses foudres, la terre ne s'estoit pas ouuerte pour les engloutir ; ains il les auoit tousiours esclairés d'vn mesme Soleil auec les meilleurs de la terre , & enuoyé sa pluye sur leurs champs pour les faire fructifier : en telle sorte que leurs pechés n'auoyent pas peu empescher qu'il ne leur eust tousiours fait du bien, misericorde s'estant glorifiee en leur faueur contre iugement: Ce qui verifie par consequent d'vne façon bien authentique les titres qu'il se donnoit lui mesme, Exode chap. 34. disant, Qu'il est tardif à colere , & abondant en gratuité: Ainsi le voyons nous encore tous les iours par experience : car quoy que les idolatries, les impietés, les vices & les iniquités regnent dans les royaumes, villes , maisons , & parmi les particuliers du monde vniuersel , tout subsiste pourtant ; iusques là , que ceux qui offensent plus griefvement sa Majesté diuine par la malice de leurs deportements, se trouuent iouïssants des biens les plus auantageux de la nature : & tout cela pour les rendre vn iour d'autant plus inexcusables , pour n'auoir pas rapporté à sa gloire leur florissante prosperité , ou pour les conuier mesme à repentance par les richesses de sa benignité , de sa patience & de sa longue attente,comme disoit l'Apostre à ceux de son temps , Rom.chap.2. De maniere que son support paroist en cela du tout admirable , lui qui a les yeux tellement nets qu'il ne peut point voir le mal, ainsi qu'en parle le Prophete Habacuc chap.1. Voire adjoustant encore quarante iours à son support passé , auant que vouloir faire vengeance de l'iniquité de cette ville,disant , Encore quarante rante iours & Niniue sera renuersee, il fait voir en outre en cela sa grande benignité. de leur donner vn temps raisonnable de pensement ; different certes en cela de Dauid, lequel ayant apprins le refus que Nabal auoit fait de lui donner des viures pour ses gens, & se sentent viuement offensé d'icelui , il ceignit incontinent son espee , & s'en alloit tout promptement pour tirer raison de ce tort, 1. de Samuel chap. 25. Et c'est comme cela que Dieu proceda à l'endroit des gens du premier monde, où toute chair ayant corrompu sa voye, il leur donna cent & vingt ans de terme pour se recognoistre auant que d'enuoyer le deluge qui les engloutit: S.Pierre nous disant à ce propos , que sa patience les attendoit , Epist.1. chap.3. C'est ainsi qu'il auoit tasché de ramener vne certaine femme nommee Iesabel en l'Eglise de Thyatire , comme il est remarqué au ch.2. de l'Apocalypse , où nostre Seigneur Iesus Christ prononce ces paroles,disant, Et ie lui ay donné du temps afin qu'elle se repentist de sa paillardise, & elle ne s'est point repentie . Ce qui tesmoigne par consequent que Dieu ne se plaist pas volontiers à la destruction de ses creatures , mais qu'au contraire il en souhaitte l'amendement, puisqu'il differe ses iugements, & leur donne du temps pour songer à eux mesmes lors qu'il est prest de les punir. Et c'est comme cela que l'Eglise d'Israel le confessoit lors de sa desolation extreme, Lamenta.ch.3. Car ce n'est pas volontiers, disoit-elle,que Dieu afflige & contriste les fils des hommes . D'où aduient qu'ayant esté obligé par la malice extreme des Iuifs à les enuoyer captifs en Babylone , il en fait lui-mesme cette lamentation en cette sorte , disant, A la mienne volonté que tu eusses esté attentif à mes commandements , & ta paix eust esté comme vn fleuue, & ta iustice comme les flots de la mer ; son nom n'eust pas esté destruit ni effacé de deuant moy : comme il se void en Esaïe cha.48.

Nos pechés estans grands & en grand nombre, il y a longtemps , mes freres , que nous auons merité d'estre mis à l'interdit , & n'a pas tenu à nous que les derniers iugements de l'ire l'ire de Dieu ne soyent venus sur nos testes pour en estre entierement accablés, veu que nous n'auons cessé d'irriter son courroux & brauer sa iustice par vne totale impenitence & obstination au mal , nonobstant les graces singulieres qu'il nous a fait , & les sollicitations continuelles par lesquelles nous auons esté conuiés à vn sainct amendement de sa part par le ministere de ses Pasteurs : cette chaire ici pouuant rendre vn tesmoignage authentique de cette verité pour nous conuaincre de desobeissance, & nous condamner comme rebelles,qui auons mesprisé les oracles du ciel qui ont resonné sur icelle , & nous sommes mocqués des admonitions salutaires qui nous y ont esté adressees par le passé , à quitter nos vices , & à mener vne vie nouuelle, qui marquast vne saincte reformation en la prattique de nos mœurs. Et neantmoins nous voici encore exempts des maux que nous auons merité , & possedants plus de biens que nous n'auions sujet d'esperer. Ce grand Dieu que nous auons tant offensé , nous ayant supportés par vne misericorde toute particuliere , & nous supportant encore en sa grande bonté , attendant que nous reuenions à nous-mesmes dans la iouïssance de ces continuelles faueurs. Toutesfois si nous voulons auoir des yeux pour regarder , nous recognoistrons assez par l'estat des affaires du monde que si nous ne sommes pas las de l'offenser, il l'est pourtant de nous tolerer, & que sa patience est presque paruenue iusqu' au bout : car quoy qu'il n'enuoye pas extraordinairement vn Prophete parmi nous , comme iadis en Niniue, pour crier que dans vn certain temps nous serons destruits,si est-ce que nous n'auons pas manqué d'aduertissements tendans à cela , & faudroit estre bien aueugle pour ne les voir pas, ou sourd pour ne les pouuoir pas ouïr. Les desolations extremes qui affligent les estats de dehors ; ces guerres sanglantes qui rauagent le plus beau de la Chrestienté ; ces calamités ciuiles qui accablẽt mesme ceux de notre profession és royaumes voisins , que sont-ce ie vous ie vous prie qu'autant de voyes que Dieu nous monstre pour nous faire comprendre que si nous ne prenons garde à nous il nous en arriuera tout autant ? que sont-ce qu'autant de menaces qu'il nous fait de nous destruire, comme s'il nous adressoit en particulier les paroles que nostre Seigneur Iesus Christ mit en auant au chap. 13. de l'Euangile selon Sainct Luc , lors que parlant à ceux qui lui raccontoyent le traittement cruel que quelques Galileens auoyent receu de Pilate , il leur disoit , Cuidez-vous que ces Galileens-là fussent plus pecheurs que tous les autres Galileens , pourtant qu'ils ont souffert telles choses ? non , vous di-ie , mais si vous ne vous amendez , vous perirez tous semblablement . Mais que sont-ce encore qu'autant d'aduertissements que Dieu nous donne de l'arrest qu'il a conceu contre nous , nous donnant le temps d'y penser à bon escient , afin que nous n'ayons pas sujet de nous plaindre lors que le mal arriuera ? ô que nous n'auons pas manqué de Ionas pour nous porter cette parole: mais vueille l'Eternel que nous ayons des oreilles pour ouïr auant que le decret enfante , & sur tout auiourd'huy qui est vn iour d'aduertissement pour preuenir les malheurs que nos conducteurs ont preueu comme des sages & experts pilotes, qui representent la tempeste dans le plus grand calme , & pouruoyent aux moyens propres , afin d'y pouuoir resister. Ne nous flattons pas doncques , mes freres , & ne pensez pas que ce soit ici des paroles qui ne vous appartiennent pas , comme si nous voulions vous espouuanter sans sujet , ains tenir pour tout asseuré que Dieu menace indubitablement en affligeant les autres , & nous donner vn certain temps pour deuenir sages & faire nostre profit du dommage d'autruy auant qu'il face passer cette coupe iusques à nous pour en boire de la lie à nostre totale confusion , veu que si nous examinons soigneusement nos consciences , nous trouuerons que nous l'auons bien merité, & serons par consequent capables de nous faire le procez nous mesmes, & nous condamner ner iustement , pour en apprehender l'euenement : car penserions-nous auoir tousiours la paix puis que nous faisons la guerre continuellement à Dieu par nos vices ? Ne ressemblons pas ces peruers de Iuda qui oyants les menaces que les Prophetes leur faisoyent des iugements de Dieu , disoyent impudemment , Cela n'aduiendra pas , le mal ne viendra pas sur nous , nous ne verrons pas l'espee ni la famine , Ieremie chap. 5. veu qu'ils esprouuerent tout le contraire suiuant la menace que l'Eternel leur en fit incontinent, disant , Ainsi a dit l'Eternel le Dieu des armees , pource que vous auez proferé cette parole-là, voici ie m'en vai faire venir contre vous vne nation de païs lointain, dit l'Eternel. C'est une nation robuste, vne nation ancienne , vne nation de laquelle tu ne sçauras pas la langue, & elle mangera ta moisson & ton pain que deuoyent manger tes fils & tes filles , & reduira à pauureté par l'espee tes villes munies esquelles tu te confiois . Et partant puis que Dieu nous tesmoigne encore tant de bonté que de nous aduertir en nous menaçant , nous donnant du temps comme à ceux de Niniue , auisons à ne le mespriser pas , secouans pour cet effect cette securité charnelle dans laquelle nous viuons , & faisans estat que n'estans pas meilleurs que les autres , les mesmes maux nous peuuent iustement arriuer. O si comme vne frayeur extraordinaire a fait leuer d'autresfois des hommes en sursaut, celle des iugements de Dieu pouuoit donc exciter auiourd'huy nostre stupidité dormante ! Certainement nous serions en vn estat bienheureux ; car comme ceux qui s'esveillants pendant la nuict voyent le feu se prendre à quelque coin de leur maison , accourent incontinent à l'eau afin de l'esteindre ; ainsi si nous pouuions bien voir le brasier ardent de l'ire de de Dieu que nos pechés ont allumé , indubitablement nous aurions recours aux larmes ameres d'vne serieuse repentance pour esteindre les flammes , & l'empescher de venir iusques à nous, afin de n'en estre pas consumés : estant chose certaine que c'est le seul remede qui qui nous reste,& duquel nous puissions attendre du soulagement ; Dieu ayant cette repentance tellement agreable qu'il destourne à mesme temps les orages dont il menaçoit les hommes, & laisser tomber les verges qu'il tenoit entre les mains pour frapper dés qu'il void qu'ils en apprehendent les coups, & se mettent en estat d'humilité pour reclamer ses compassions.

Nous auons ici vn bel exemple qui nous y conuie , veu que Ionas ayant crié dans la ville , Encore quarante iours & Niniue sera renuersee , le S. Esprit nous dit en suite que ceux de Niniue creurent à Dieu, & publierent le ieusne, & se vestirent de sacs depuis le plus grand d'entr'eux iusques au plus petit . Actions vrayement notables, & qui nous font voir l'effect de la predication de ce Sainct Prophete , lequel reluit en icelles d'vne façon du tout admirable : & d'autant plus qu'il n'y auoit aucune apparence qu'vn si grand peuple , nourri dans l'idolatrie , plongé dans le vice , accoustumé à l'iniquité , & se plaisant dans les delices de la chair & du monde eust peu fleschir si promptement à la premiere voix du ciel par laquelle il estoit menacé ; veu qu'il est certain que comme ceux qui habitent pres des precipices des grosses eaux sont sourds,qu'aussi il est malaisé que la Parole de Dieu entre si promptement dans les oreilles eslourdies du bruit du monde,& estourdies par le courant des conuoitises : & neantmoins comme les murailles de Ierico tomberent au son des cornets de belier , voici les forteresses de Satan,de la chair & du monde,qui tombẽt au son de la voix de ce Prophete criant au milieu de la ville; les cœurs de tous les habitãs s'abattãs par repentance en la presence de ce grand Dieu qui les menaçoit ; iusques là , qu'il est remarqué dans l'histoire que le Roy mesme se leua de son throsne & osta de dessus soy son vestement magnifique , & se couurit d'vn sac , & s'assit sur la cendre ; changement merueilleux, qui fait paroistre veritable la loüange par laquelle l'Apostre recommande la vertu puissante de la Parole de Dieu, Heb.chap.4. disant, qu'elle est viuante viuante & d'efficace , & plus penetrante que nulle espee à deux trenchants , qu'elle atteint iusques à la diuision de l'esprit & de l'ame,des iointures, & des mouëlles , & est iuge des pensees & intentions du cœur. Aussi est-ce le tesmoignage que l'Eternel lui rendoit, Ierem. chap.23. disant, Ma parole n'est-elle pas tout ainsi qu'vn feu , & comme vn marteau qui debrise les pierres ? Mais examinons particulierement les actes de ces gens ici. Nous trouuons qu'ils sont en nombre de deux , l'vn qui regarde la Loy , l'autre qui regarde la repentance:pour le premier, il est dit qu'ils creurent à Dieu, c'est à dire , que recognoissans ce Prophete leur estre enuoyé de la part de Dieu , ils receurent sa Parole comme procedee de son conseil , & adjousterent foy à icelle , demeurans certainement persuadés qu'ayants merité d'estre destruits par leur infame conuersation, ils le seroyent indubitablement, s'ils n'appaisoyent ce grand Dieu qui les en menaçoit par la bouche de ce sien seruiteur : en quoy ils se tesmoignent bien differents de ces peruers des dix lignees d'Israel,lesquels ayants ouï les menaces de leur destruction qui leur estoyent faites par les Prophetes, ils s'en mocquoyent, & n'en croyoyent du tout rien , disans , comme il est rapporté en Esaïe chap. 28. Nous auons traitté accord avec la mort, & auons intelligence avec le sepulchre ; quand le fleau desbordé trauersera il ne viendra pas sur nous . Et certes ayans sujet d'admirer en cela leur foy , nous trouuons qu'il y a trois choses qui la rendent du tout admirable , & leur condition precedente qui estoit vn estat d'ignorance de ce Dieu auquel ils croyent maintenant , & duquel ils n'auoyent iamais plus ouï parler par forme d'instruction : car il est certain que cette ignorance estant naturelle en leur entendement, elle leur donnoit vne totale indisposition à la foy de sa parole , veu qu'il faut necessairement cognoistre la verité & puissance de celui qui parle pour donner son consentement à ce qu'il dit , & se laisser persuader , soit à ses menaces,soit à ses promesses , pour en craindre ou en esperer l'accomplissement, sement, l'homme estant vn animal raisonnable qui n'est pas emporté en ses mouuements sans intelligence comme les bestes,ains ayant vn entendement pour cognoistre plustost que sa volonté ne se porte à l'action. C'est pourquoy vous voyez au chapitre 5. de l'Exode, que Pharao se mocque des semonces que Moyse lui faisoit de la part de l'Eternel , de laisser aller son peuple , sur ce qu'il n'auoit pas sa cognoissance, disant , qui est l'Eternel , que i'obeisse à sa voix ? ie ne cognois point l'Eternel , & mesme ie ne laisserai point aller Israel . La seconde estoit la qualité de celui qui parloit à eux de la part de Dieu , qui estoit vn homme estranger & incognu , sans auoir autre lettre de creance de sa part que sa seule parole; Car c'est vne chose euidente , que pour adjouster foy aux paroles que quelqu'vn nous rapporte de la part d'vn autre, il faut par mesme moyen croire que celui-là est enuoyé par lui: d'où aduient que nostre Seigneur Iesus Christ donnant commission à ses Apostres pour aller prescher l'Euangile par toute la terre , annonçant la vie à tous ceux qui croiroyent , & la mort à ceux qui seroyent incredules , il les reuestit du don de miracles , afin que , n'appartenant qu'à Dieu de donner pouuoir de faire des miracles , ils peussent faire paroistre par iceux que leur vocation estoit veritablement de Dieu , & amener par ce moyen d'autant plus facilement les hommes à la foy de leur parole pour croire à icelle comme à vne Parole de Dieu. Au lieu que Ionas n'auoit rien de cela , ains se contentoit seulement de les menacer par sa simple denonciation , disant , Encore quarante iours & Niniue sera renuersée . La troisiesme regarde la chose qu'il annonçoit ; car quelle apparence y auoit-il qu'vne puissante ville telle que celle-là , le siege de la monarchie, le refuge des estrangers , la force du royaume, la gloire de la nation, les delices du païs , deust estre renuersee dans si peu de temps , veu mesme que c'estoit pour lors que l'empire des Assyriens florissoit plus que iamais , comme il se remarque par les histoires , & qu'il qu'il n'y auoit point d'ennemis en campagne pour leur donner sujet d'apprehension ? Adjoustons à cela que les pecheurs adonnés au vice se trouuent tellement stupides, qu'oyans parler des choses pour lesquelles ils ont de l'auersion , comme contraires à leur felicité temporelle , ils ne peuuent pas se persuader facilement qu'elles leur doiuent arriuer,ains se flattent au contraire dans leurs pensees , & sur tout lors que les apparences ne se rencontrent pas ; tesmoin ce qui est escrit en Ieremie chap. 36.où nous voyons qu'vne de ses propheties ayant esté leuë en presence du Roy Iehojakim & de ses principaux Seigneurs , tendante à la ruine de Ierusalem ; il est dit que ni le Roy ni ses seruiteurs n'en furent point effrayés , & n'en deschirerent point leurs vestements , qu'au contraire le Roy commanda d'empoigner Ieremie & Baruc son Secretaire : & neantmoins voici ceux-ci qui n'estans pas accoustumés à ouïr la Parole de l'Eternel , entendans cette denonciation extreme qui resonne à leurs oreilles , Encore quarante iours & Niniue sera renuersee , ils creurent à Dieu.

Ici pourtant ne faut-il pas penser que cette foy qui se trouua dans leur cœur à cette rencontre fust vn effect de leur franc arbitre : comme si ayants eu le pouuoir de croire ou ne croire pas, leur volonté s'estoit portee à cet acte par ses forces naturelles, en faisant acquiescer l'entendement à cette parole pour la reputer veritable , & la receuoir comme telle par le pouuoir que elle a sur lui : car c'est à faire aux anciens heretiques Pelagiens & demi Pelagiens de parler ainsi , & dont ils ont esté blasmés & condamnés par l'orthodoxe antiquité auec iuste raison , veu que la nature de l'homme est tellement corrompue , qu'outre les tenebres qui occupent son entendement pour ne pouuoir pas discerner le vray d'auec le faux , le bien d'auec le mal , sa volonté est entierement deprauee , n'ayant aucune inclination pour les actions salutaires , ains estant toute portee au mal , tellement que tant s'en faut qu'il ait quelque disposition à la foy , pour croire croire à la Parole de Dieu lors qu'elle lui est annoncee , soit par forme de promesse , soit par forme de menace, qu'au contraire il ne peut que resister à icelle & s'en mocquer tout à fait , au lieu de la receuoir;tesmoin la sentence de l'Apostre au chap.3. de la 2. Epistre aux Corinthiens , disant , que nous ne sommes pas suffisants de penser quelque chose de nous comme de nous mesmes . Aussi est appelé le cœur de l'homme vn cœur de pierre dans l'Escriture , & Ieremie le Prophete chap. 17. nous dit qu'il est desesperément malin ; tellement qu'il en faut necessairement venir là , pour dire que ce fut Dieu mesme qui accompagna la parole du Prophete de sa grace celeste , en telle sorte que frappant leurs oreilles par le son de sa voix au dehors , il toucha aussi à mesme temps leurs cœurs au dedans par la vertu efficacieuse de son Esprit , leur faisant comprendre en leur entendement que cette parole n'estoit pas du Prophete , pour la mespriser , ains que c'estoit la sienne, pour la considerer auec respect, & fleschissant aussi à mesme temps leur volonté par vn changement efficacieux, afin de la receuoir comme telle par obeissance de foy , & c'est ce que S. Paul nous apprend, Ephes.chap.2. lors qu'il dit , que la foy est vn don de Dieu , d'où vient le dire de Moyse aux enfans d'Israel, chap.29. du Deuteronome , L'Eternel ne vous a point donné cœur pour entendre , ni yeux pour voir , ni oreilles pour ouïr , iusques à ce iourd'huy . Autrement Ionas eust eu beau prescher & crier parmi ces gens, certes ils n'auroyent iamais adjousté foy à sa parole, ains au contraire ils l'auroyent mesprisé, reietté,battu , chassé , ou mesmes tué , l'oyants, ainsi parler contr'eux, comme estans tout à fait vicieux & destitués de la crainte de Dieu , veu que c'est ainsi que les habitans de Ierusalem mesme traittoyent d'ordinaire leurs Prophetes , lors qu'ils leur annonçoyent choses fascheuses : à raison dequoy elle estoit appelee la ville sanguinaire , ville qui aimoit à respandre le sang , & les Iuifs meurtriers des Prophetes . Et c'est ce qui est capable de de nous oster l'estonnement que nous pourrions cõceuoir de la promptitude de leur foy , voyans qu'à mesure qu'ils ont ouï cette denonciation , Encore quarante iours & Niniue sera renuersee , ils ont creu à Dieu , & ce d'autant plus qu'il y en a eu ailleurs des milliers qui ayants ouï plusieurs menaces qui leur estoyent faites de la part de l'Eternel, n'ont iamais peu se persuader qu'elles deussent auoir leur accomplissement : car Dieu ayant vne puissance infinie, il n'a pas besoin de temps pour faire ses œuvres comme les hommes : ains comme nous voyons en la creation, que disant la parole , la chose estoit à mesme instant , que la lumiere soit , & la lumiere estoit : Ainsi en la conuersion des pecheurs , qui est vne seconde creation , il n'a que dire dans le chaos de leur ignorance , que la lumiere soit , & les voila à mesme temps illuminés pour cognoistre les choses appartenantes à leur salut , & fleschir sous son authorité : c'est pourquoy vous voyez Actes chap. 2. que S.Pierre ayant presché aux Iuifs il y eut trois mille ames qui creurent en vn iour , receuants d'vn franc courage la parole qu'il annonçoit : car la foy estant vne illumination de l'entendement , il en va d'elle comme de l'illumination de l'air , laquelle nous voyons se faire en vn instant.

Ce n'est pas tout , ains si ces gens de Niniue ont creu à Dieu , menaçant de ruine dans quarante iours par la bouche de son Prophete , aussi ont-ils tesmoigné leur foy par leurs actions au dehors , s'humilians à mesme temps en la presence de Dieu qu'ils ont recognu iustement courroucé, & puissant pour les punir , ainsi que cela nous est rapporté ensuite,lors qu'il est dit, qu'ils publierent le ieusne , & se vestirent de sacs depuis le plus grand d'entr'eux iusques au plus petit : & ce fut l'ordre que le Roy mesme donna , comme il est dit dans l'histoire , Ionas lui ayant sans doute fait entendre que c'estoit la maniere en laquelle estans vrayement repentans au dedans , ils se deuoyent humilier en la presence de Dieu au dehors pour destourner son courroux, suiuant suiuant la prattique obseruee parmi son peuple , lors qu'ils estoyent menacés de quelque orage , & ils estoyent en apprehension de tomber dans quelque insigne malheur : plus sage par consequent en cela qu'Achab Roy d'Israel , lequel oyant que Michee lui prophetisoit des choses fascheuses, au lieu d'en faire son profit pour tascher de les preuenir par repentance , il s'indigne contre lui & le fait mettre en prison , 2. Chronic. chap. 18. Or laissant ici à part le traitté du ieusne , ie vous dirai seulement qu'il estoit prescrit par les Prophetes sous l'ancien Testament, comme vn exercice d'humilité , en telle sorte que ceux qui ieusnoyent ne pretendoyent pas satisfaire à la Iustice de Dieu pour leurs pechés , & faire vne œuure meritoire , attendu que Dieu ne peut estre satisfait par les hõmes pecheurs , ni obligé à leur bien faire , quoy que la superstition oblige plusieurs auiourd'huy de penser autrement , contre les enseignements de l'Escriture ; ains leur dessein estoit de se confesser par là indignes de viure, & tresdignes de mourir , voire de faire vne protestation solemnelle de cela , pour rendre par ce moyen leurs prieres plus agreables deuant Dieu ; d'où vient le dire d'Esdras, chap.8. Et ie publiai le ieusne aupres du fleuue d'Ahana , afin de nous humilier deuant l'Eternel nostre Dieu . Et pour les sacs dont ils se sont couuerts , nous trouuons que c'estoit pareillement vne ceremonie dont les Iuifs vsoyent en ces mesmes rencontres pour tesmoignage d'humilité , comme le remarque Iosephe leur historien , liu. 10 de ses Antiquités, chapitre 1. Au lieu que l'orgueil a accoustumé de porter les hommes à se couurir d'habillements somptueux , afin de paroistre aux yeux de leurs prochains & acquerir par ce moyen de la gloire :en telle sorte qu'ils protestoyent par là renoncer à toute vanité mondaine , & tesmoignoyent recognoistre qu'ils estoyent entierement dignes d'estre exposés à la honte & au mespris de tous par leurs deportemens passés. Tellement que voici vn grand peuple abattu , & en vn estat estat d'humilité du tout remarquable contre toutes apparences : car qui eust iamais creu que des gens si riches , si puissants,si orgueilleux, si meschants, qui auoyent serui durant toute leur vie au diable , au monde , au peché, & à la chair,pour contenter leurs passions, & assouuir leurs conuoitises , eussent peu estre reduits en vn estat où la pieté paroissoit , la crainte de Dieu , l'humilité, la repentance ; où se voyoit le mespris du monde,l'adieu de Satan,le renoncement de la chair,pour suiure desormais les sainctes loix du ciel , & plier sous l'authorité de ce grand Dieu qui les auoit menacés ? Estoit-ce pas vn spectacle admirable de voir trembler tãt d'ames en la presence du vray Dieu qu'elles auoyent ignoré & offensé iusqu'à lors ? reclamants sa grace , & s'attendans à ressentir ses compassions ? Car ne pensez pas qu'il en fust comme de la repentance d'Achab , lequel oyant les menaces qui lui estoyent faites par le Prophete , Il deschira ses vestements, & mit vn sac sur sa chair, & ieusna : s'humiliant par ce moyen par hypocrisie, afin d'euiter le mal present : ains il appert par la suitte de l'histoire que ce n'estoit pas des apparences, ains des signes d'vne vraye repentance , le cœur estant vrayement humilié au dedans comme leurs corps l'estoyent au dehors , prattiquans par ce moyen l'exhortation que l'Eternel donnoit aux Iuifs par la bouche de Ioel le Prophete, disant , Retournez-vous à moy de tout vostre cœur , & en ieusne , & en pleur , & auec lamentation , chap. 2. Car il est dit en effet au verset dernier de ce chapitre , que Dieu regarda à ce qu'ils auoyent fait , comment ils s'estoyent destournez de leur mauuaise voye , & Dieu se repentit du mal qu'il auoit dit qu'il leur feroit , & ne le fit point .

Et c'est iustement comme cela qu'il y faloit proceder. Car comme on baisse la teste pour euiter les canonnades qu'on void venir , aussi faut-il s'humilier pour eschapper les punitions dont on se void menacé ; & de fait si on dit du lion qu'il deschire en sa fureur ceux qui lui veulent faire teste , & espargne au contraire ceux qui s'abbatent tent deuant lui;aussi pouuõs nous asseurer que l'Eternel fait le mesme enuers les pecheurs , pardonnant aux humbles, & punissant les orgueilleux. Il fait comme la foudre,laquelle fracasse ordinairemẽt les chesnes haut esleués , & espargne au contraire le tin, la marjolaine, & ces autres petites herbes qui rampent sur la terre. C'est ce que nous voyons 2. Rois ch. 22. où il tient ces propos à Iosias Roy de Iuda, Pource que ton cœur s'est amolli,& que tu t'es humilié deuant l'Eternel quand tu as ouï ce que i'ay prononcé contre ce lieu ici & sur les habitans d'icelui ; c'est qu'ils feroyent en desolation & malediction.Et pource que tu as deschiré tes vestemens & as pleuré deuant moi,& moi aussi ie t'ay exaucé,dit l'Eternel . D'où vient le dire de S. Pierre, Ep.1. ch.5. Soyez parés par dedans d'humilité,pource que Dieu resiste aux orgueilleux, mais il fait grace aux humbles . Et certes ils estoyent conuiés à cet estat d'humilité par la nature de la menace qui leur estoit faite:car si les colomnes des cieux s'esbranlent & s'estonnent aux menaces du Dieu fort, Job ch.26. qu'est-ce que ne doiuent faire les hommes,qui ont des yeux pour voir & des oreilles pour ouïr? Il se peut bien faire, & ne se void que par trop , qu'vn homme demeurera dans son peché sans rien apprehender,tandis que Dieu ne le resveille pas en son endurcissement par quelque voye extraordinaire , comme nous en auons l'exemple en la personne d'Achab,de Manassé & plusieurs autres. Mais lors que le lion rugit qui est-ce qui ne fremira?& qui n'apprehendera sa ruine, oyant la voix tonnante de Dieu,pour dire dans les frayeurs d'vne conscience tremblottante,Ha miserable!& qu'ai-ie fait?quels malheurs n'ai-ie pas attiré sur mon ame par mes infames desportemẽs? On dit de la biche,qu'estant en peine de se deliurer de son faon,elle se descharge facilement, oyant le bruit du tonnerre; ainsi que le Prophete semble mesme le tesmoigner au Ps.29.lors qu'il dit que sa voix est bien si forte,qu'elle la fait auorter: & c'est ce que les menaces de Dieu doiuent produire enuers les pecheurs,le bruit d'icelles les deuant effrayer en telle sorte,qu'ayans conceu le peché,ils se iettent dehors par repentance,afin de se mettre en estat de salut.Aussi est-ce l'ordre dre que Dieu mesme prescrit, & ce qu'il requiert des pecheurs , si tant est qu'ils vueillent euiter ses iugemẽs;estant chose certaine que comme l'orgueil a chassé l'homme du ciel & l'a priué de toutes ses faueurs,qu'aussi il veut que ce soit l'humilité qui le remette en la iouïssance de l'vn & de l'autre , & qu'ainsi le mal se trouue gueri par son cõtraire,comme és maladies du corps:car Dieu ne peut pas regarder en haut, attendu qu'il n'a rien au dessus de soy; ni à costé,veu qu'il n'a rien d'esgal:tellement qu'il n'y a que les choses basses , les cœurs humbles & abbatus, qui soyent & puissent estre l'objet de ses compassions. C'est ce qu'il nous declaroit lui mesme assez appertement, Esa.chap.66.lors qu'il s'escrioit en cette sorte, A qui regarderai-ie sinon à l'esprit contrit & humilié, & qui tremble à mes paroles ? d'où nous voyons 2.Chron.chap.7. qu'il en fait cette promesse expresse,disãt Si ie ferme les cieux, & qu'il n'y ait point de pluye ; & ie commande aux sauterelles de consumer la terre,& si i'enuoye la mortalité parmi mon peuple; & que mon peuple,sur lequel mon Nom est reclamé,s'humilie,& face requeste,& cerche ma face,& se destourne de son mauuais train , adonc ie l'exaucerai des cieux,& pardonnerai leurs pechés,& guerirai leur terre . O sainte humilité que tu es donc efficacieuse! ô vertu excellẽte que tu es salutaire ! Certes ces gens le trouuerent bien comme cela , lors qu'ayans merité d'estre destruits par leurs pechés, ils se maintindrent pourtant debout, nonobstant la menace de leur destruction , apres s'estre humiliés de la sorte en ieusne & vestement de sacs; l'Eternel ayãt accepté leur humilité pour destourner de dessus leurs testes les iugemens qu'il auoit resolu de leur enuoyer, tant il a cette vertu agreable au salut & consolation des humains. Ici donques voyons- nous l'exemple d'vne vraye conuersion, telle qu'elle est commandee de la part de Dieu,puis qu'ils creurent à lui & se repentirent deuant sa face. Ces deux vertus , assauoir la foy & la repentance, estans celles qui font la conuersion entiere; d'où auient que Iesus Christ commençant d'exercer son ministere entre les hommes pour appeler les pecheurs au salut,sa premiere leçon fut cõçuë en ces ces termes , Amendez-vous, & croyez en l'Euangile : aussi estoit-ce le sommaire de toutes les predications de S.Paul, selon qu'il le declare lui mesme, Act.ch.20. disant, qu'il testifioit tant aux Juifs comme aux Grecs la repentance qui est enuers Dieu, & la foy en Jesus Christ nostre Seigneur : tellement que voici des gens totalement transformés par vn changement subit & du tout admirable , voire plus admirable que celui de l'eau en vin en Cana de Galilee,par la puissãce diuine de nostre Seigneur Iesus Christ ; veu que si l'eau n'auoit pas de la disposition naturelle à cette cõuersion,elle n'y portoit pas aussi de la resistance:au lieu des peruerses habitudes de ces gens qui resistoyent totalemẽt à cette œuvre,outre la repugnãce naturelle qu'il y auoit entre leurs inclinatiõs & ces actes d'humilité:ce ne sont donc plus des loups rauissans, des lions rugissans,des boucs puants en vice;ains ce sont des agneaux en debonnaireté, abbatus de crainte,au lieu de demeurer esleués en fierté ; humiliés de cœur, au lieu de l'orgueil qui les auoit enflés iusqu' à lors;recognoissans leurs crimes,au lieu de l'endurcissement dans lequel ils auoyent vescu;demandans grace,au lieu de l'insolence par laquelle ils auoyent braué la iustice diuine. En vn mot,adorans & tremblans deuant le Dieu d'Israel , au lieu des fausses diuinités apres lesquelles ils auoyent idolatré.

Et c'est ici où nous deuons rougir, nous di-ie qui faisons profession d'estre le peuple de Dieu : car voila vne seule predication qui conuertit tant de milliers de personnes en vn moment , les rendans croyans & repentans; & cependant mille predications ne peuuent pas nous conuertir auiourd'huy d'vn seul vice auquel nous sommes adonnés;ains quoy que Dieu ioigne d'ordinaire à sa parole la verge de ses chastiments,nous deuenõs tous les iours pires;semblables à ceux dont il est parlé en l'Apocalypse chapit. 16. lesquels au lieu de profiter de leurs maux,il est dit, qu'ils blasphemerent le Dieu du ciel , & ne se repentirent point de leurs actes : tellement qu'il ne faut pas douter si ayans auiourd'huy vn exemple si memorable deuant les yeux nous venons à persister dans nostre corruption, au au lieu de l'imiter, il ne nous tourne vn iour à condamnation,lors qu'il sera question de comparoistre deuant Dieu, ainsi que nostre Seigneur le declaroit touchãt les Iuifs, Matth. chap.12. disant, Ceux de Niniue se leuerent au iugement auec cette nation, & la condamneront , pourtant qu'ils se sont amendés à la predication de Ionas . Et partant si nous croyons aux menaces que Dieu nous fait de nous chastier,(comme nous sommes obligés d'y croire ) & si nous sommes effrayés des maux qui trauaillent ceux de dehors,souhaitans que ils ne passent pas iusques à nous;auisons, mes freres, nous humilier deuant Dieu, à l'exemple de ces gens , & sur tout de cœur, comme nous auons nos corps abbatus par l'exercice du ieusne , n'attendans pas que ses iugements nous accablent, puis qu'il nous donne du temps afin de les euiter,voire vn temps de paix s'il y en a point en aucun royaume de la terre habitable : car en effect nous trouuons dans l'Escriture saincte que Dieu a accoustumé de vanger le mespris de ce temps par les plus seueres punitions de sa iustice,ainsi que Ierusalem nous en peut faire foy , à laquelle Iesus Christ faisoit cette denonciation, disant , O si toy aussi eusses cognu , voire au moins en cette tienne iournee,les choses qui appartiennẽt à ta paix , Luc chap. 19. Car les iours viendront sur toi que tes ennemis t'assiegeront de tranchees, & t'enuironneront,& t'enferreront de tous costés: Et te raseront toi & tes enfans qui sont en toi, & ne laisseront en toi pierre sur pierre , pourtant que tu n'as pas cognu le temps de ta visitation . Que si toute sorte de gens prennent vtilement le temps qui est propre à leurs affaires,les mariniers celui du vent & des marees , les laboureurs la saison des semẽces,les voyageurs celui du iour, prenons donc pareillement celui-ci qui est le nostre , & que Dieu nous offre en ses grandes compassions, nous souuenãs que l'occasion qui est la fiche du temps, est cheuelue par deuant , & chauue par derriere , pour dire qu'il la faut prendre lors qu'elle se presente,sous peine de ne la pouuoir plus attraper lors qu'elle nous sera eschappee. Pour cet effect ne nous contentons pas d'auoir demeuré ce iourd'huy dans ce temple sans rien manger, veu que les plus meschans en peuuent fai- faire autant par hypocrisie : ains resoluons- nous de ieusner à peché durant le reste de nos iours , en telle sorte que nostre vie soit vn ieusne perpetuel , nous abstenans comme estrangers & voyagers des conuoitises charnelles qui guerroyent contre l'ame , suivant l'exhortation de S.Pierre, 1.Epist. ch.2. & mortifians nos membres qui sont sur la terre, paillardise,souïllure,appetit desordonné,& auarice,qui est idolatrie , suiuant l'exhortation de S. Paul, Col. chap.3. C'est en effect le vrai ieusne que Dieu requiert de nous,comme il le tesmoignoit à son peuple, chap.58.d'Esaïe ,disant, Est-ce là le ieusne que i'ay choisi,que l'homme afflige son ame un iour? Est-ce en courbant la teste comme le jonc; & estendant le sac & la cendre? appelleras tu cela ieusne & iour acceptable à l'Eternel? N'est-ce pas plustost ici le ieusne que i'ay choisi,que tu desnouës les liens de meschanceté ? Ce sera par ce moyen que nous serons vrayement repentans & humiliés deuant la face de Dieu,comme ceux de Niniue ; en telle sorte que comme ils eschapperent la ruine dont ils estoyent menacés, pour s'estre humiliés, ainsi ferons-nous les maux que nos pechés sont capables d'attirer sur tout l'estat en general & sur le corps de l'Eglise en particulier , & subsisterons au contraire paisiblement pour glorier son S. Nom en la continuation & augmentation de ses gracieuses faueurs : veu que si l'Empereur Antonin fit iadis vn Edict en faueur des Chrestiens , Euseb.lib.4.ch.12. ayant veu le zele qu'ils auoyent tesmoigné enuers Dieu parmi les malheurs du temps , il pourra arriuer que le Roy qu'il a pleu à sa diuine Majesté esleuer sur nous en fera vn autre en nostre faueur , pour rendre nostre condition meilleure , en adjoustant des nouuelles graces à celles que nous auons receu de ses predecesseurs, voyant l'affection que nous auons tesmoigné à conseruer la paix dans l'estat, & ressentant les effets bien-heureux d'icelle en la benediction de Dieu. Que nos prieres soyent donques auiourd'huy comme autant de parfums dans l'encensoir de la foy pour destourner les playes, les presentans deuant Dieu par le mouuement d'vne sérieuse repentance afin de l'appaiser : Et cependant que ceux de religion contraire ayants publié des Iubilés, bilés, taschent de gagner les Indulgences, inuoquent les Saincts,font dire des Messes, visitent les Eglises pour obtenir la paix generale , qui sont des remedes inutiles , comme inuentés par les hommes: offrons donc auiourd'huy à Dieu,le Seigneur de gloire,& le chef des armees, le sacrifice d'vn cœur repentant , froissé par la douleur amere de nos pechés , abbatu par la crainte de ses iugements, & embrazé de zele pour lui rendre le seruice raisonnable qu'il demande de ses enfans : c'est en ce faisant que nous reussirons heureusement,& verrons auec ioye les fruicts de nostre ieusne : c'est comme cela que nous conseruerons la paix dans le royaume, & attirerons la benediction du ciel sur la personne sacree de nostre Roy & de la Reyne regente , sur tous ses Estats & entreprinses ; veu que le bon heur des Rois depend de la sagesse de leurs sujets , tout ainsi que leur malheur prouient ordinairement de l'impieté & malice d'iceux: & finalement c'est ce qui nous donnera vn accez fauorable au throne de la grace de Dieu,lors qu'etant question de desloger de la terre,il faudra comparoistre deuant lui:où nous presentans comme des gens reformés,despouïllés des vices, & reuestus des vertus,auec vn sainct desplaisir de l'auoir tant offensé, il nous embrassera de ses compassions, & nous ayant prononcé la sentence de nostre absolution par la remission de nos pechés , il nous introduira en sa gloire, où nous ne ieusnerons plus , ains serons au contraire eternellement rassasiés par la beneficence de l'Agneau qui nous paistra, & rendra par ce moyen nostre condition parfaitement heureuse : là serons nous dõc à l'abri de toutes les tempestes du monde,là demeurerons-nous en vne perpetuelle paix,sans crainte;là verrons nous tous nos ennemis vaincus sous nos pieds : si que possedans tout ce que nous sçaurions souhaitter,nous n'aurons plus besoin de prier pour demander , ains recognoissants de graces passees nous benirons eternellement le Dieu de gloire par le sacrifice de nos louanges : comme aussi dés maintenant & à tousiours , à lui Pere , Fils & S.Esprit, soit louange, honneur, & gloire. Ainsi soit-il.