Sermons de Iehã Caluin sur
LES DEVX EPISTRES DE S.
Paul à Timothee,recueillis par l'escriuain ordinaire pour
le bien & l'edification de l'Eglise du Seigneur.

sainct Paul vse en sa preface: il dit , Paul Apostre
de Iesus Christ selon la cõmißion qui luy est
donee de Dieu nostre Sauueur, & du Seigneur Iesus
Christ nostre esperance . Nous auõs mõstré ci
dessus , traittant les epistres aux Thessaloniciens,
chap.2.13, que sainct Paul mõstre par son
exemple que nul ne doit estre escouté en l'Eglise
de Dieu,sinõ estãt enuoyé. Car il ne faut
point q͂ nostre foy soit attribuee aux hommes
mortels ni aux creatures. Il n'y a q͂ Dieu seul
qui domine sur nos ames,& faut que nous receuions
de luy toute la doctrine de nostre salut.
Cependant,il ne descend pas du ciel en forme
visible pour parler a nous, & ne nous enuoye
pas aussi ses Anges,mais il veut que nous
soyons enseignez par le moyen des hommes.
Pour ceste cause si no9 voulons obeir a Dieu,
il nous faut receuoir sa Parole qui no9 est preschee
par ceux ausquels il a commis ceste charge
& office.Car ceux qui se vantent de vouloir
seruir a Dieu,& cependant mesprisent sa Parole ,
sous ombre qu'elle leur est apportee par la
bouche des hommes,monstrent bien qu'il n'y
a qu'hypocrisie en eux. Et de faict,il ne faut
point plaider là dessus, puis que nous voyons
que Dieu a establi cest ordre , c'est ascauoir q͂
il veut gouuerner son Eglise par la predicatiõ
de l'Euãgile,& qu'il veut que les hõmes soyẽt
ministres de cela. Il faut que grans & petis se
rangent a ceste regle qui leur est donnee, & laquelle
sera ferme iusques a la fin du monde.
Tant y a que sainct Paul se nommant Apostre,
a voulu yci declarer en premier lieu, que les
hommes indifferemment ne doyuẽt pas estre
escoutez , sinon qu'ils ayent approbatiõ qu'ils
parlẽt au nom de Dieu , & de nostre Seigneur
Iesus Christ. Au reste,il monstre aussi q͂ si nous
voulons faire hõmage a Dieu, si nous luy voulons
estre suiets,que nous deuons receuoir sa
Parole quand elle nous est preschee par la bouche
des hommes qu'il a enuoyez. Cependant
il ne dit pas simplement qu'il est Apostre,mais
il dit, De nostre Seigneur Ies9 Christ , voire pour
ce que celuy-la nous a este ordonné de Dieu
son Pere cõme souuerain docteur , voire vnique.
Tous ceux dõc qui se meslẽt d'enseigner,
il faut qu'ils parlẽt au nom de nostre Seigneur Mat.17.6.
Iesus Christ : car c'est de luy seul qu'il est dit,
Escoutez-le. Quand ceste voix a este ouye du
ciel, ꝗl faut escouter Ies9 Christ,ç'a este pour
clorre la bouche a toutes creatures , q͂ nul ne
presume d'auancer ce qu'il aura forgé en son
cerueau, que nul ne pretẽde d'estre maistre ou
docteur,car il faut que cela soit reserué au Fils

ont l'office d'ãnoncer la parole de Dieu, voudront
mettre en auãt leurs inuẽtions propres,
ce sera faire rõpre a l'Eglise la foy qu'elle doit
a son mari,c'est a dire au Fils de Dieu.Car voyla
aussi en quoy S. Paul mõstre q͂ la chastete de
l'Eglise cõsiste,c'est quãd elle ne se desbauche
point de la simplicité de l'Euãgile ( dit-il ).Car 2. Cor.II.3.
si tost q͂ nous prestõs l'aureille a des doctrines
estrãges,c'est cõme si vne femme auoit presté
l'aureille a vn maquereau pour la seduire.Ainsi
donc notons biẽ q͂ les hõmes n'ont pas ceste
cõmission pour gouuerner l'Eglise de Dieu a
ceste cõdition q͂ la dignité de Iesus Christ soit
amoindrie,ne q͂ cela luy en porte preiudice aucũ,
mais plustost c'est afin qu'ils se rãgẽt au Docteur
vnique & des grãs & des petis,qu'õ se tiene
a sa parole qu'il a apportee au nom de Dieu
son Pere,&cependãt toutesfois qu'en toute humilité
& reuerẽce nous obeissions a la doctrine
qui nous est preschee par les hõmes: q͂ si no9
n'en tenons conte, nous ne faisons poĩt iniure
aux creatures mortelles,mais nous monstrons
vne rebellion manifeste contre Dieu & cõtre
son Fils vnique. Maintenant il nous faut noter
les titres q͂ S.Paul attribue yci & a Dieu &
a nostre Seigneur Iesus Christ.Il dit, Dieu nostre
Sauueur , & Iesus Christ nostre esperance .
Il est vray q͂ ce mot de Sauueur souuentesfois
en l'Escriture saincte se dõne au Fils de Dieu:
pource que c'est luy qui a parfait & accompli
tout ce qui est requis a nostre salut.Il a espãdu
son sang,afin q͂ nous soyons lauez & nettoyez
de nos macules. Il a effacé la malediction qui
estoit sur no9,il no9 a deliurez & affrãchis de
la seruitude de mort,il a aboli le peche. Nous
voyons dõc qu'il nous faut chercher nostre salut
en nostre Seigneur Iesus Christ , & q͂ c'est a
bon droict qu'il est nõmé nostre Sauueur.Mais
aussi ce n'est point sans cause q͂ S.Paul intitule
ainsi en ce passage Dieu le pere. Et pourquoy?
Voyõs d'où c'est q͂ Iesus Christ nous est venu.
Il nous a este enuoyé de Dieu son Pere, cõme
l'Escriture le porte, q͂ Dieu a tãt aimé le mõde,
qu'il n'a poĩt espargné son Fils vnique,mais l'a Ieh. 3. 16.
&1. Ieh. 4.
9.
liuré a la mort pour nous.Pourtant quand no9
aurõs contẽplé nostre salut en la personne de
nostre Seigneur Iesus Christ , il no9 faut venir
a la source & fõtaine dõt il no9 procede , c'est
ascauoir de ceste amour q͂ Dieu a portee au gẽre
humain.Voyla pourquoy S.Paul nõme Dieu
nostre Sauueur:signifiant par ce mot q͂ toutesfois
& quãtes q͂ no9 pensons au biẽ qui nous a
este apporté & acquis par nostre Seigneur Iesus
Christ, q͂ no9 esleuiõs nos esprits plus haut,
& q͂ nous cognoissions q͂ Dieu ayãt pitie de la
perditiõ en laq͂lle estoit toute la lignee d'Adã,
y a voulu pouruoir,& y a dõné ce remede,c'est
ascauoir q͂ nostre Seigneur Iesus Christ nous
est venu retirer des abysmes de mort esquels
no9 estions:mais cepẽdant Iesus Christ est appelé
nostre esperance , afin q͂ nous scachions q͂
c'est en luy qu'il nous faut appuyer , & auoir
tout notre repos.Car cõmẽt pourriõs-no9 apprehẽder
le salut q͂ Dieu no9 a dõné,si ce n'est q͂
nous ayõs appointemẽt auec luy par le moyẽ
de nostre Seigneur Iesus Christ:veu q͂ cepẽdãt
q͂ nous regarderõs a la maieste de Dieu,il faut
que nous soyons espouantez. Et voila qui a
esté cause de faire chercher aux Papistes tant
de patrons & d'aduocats , tant de moyens,

cõmun.Car si nous separons Dieu d'auec Iesus
Christ , nous ne pouuons auoir aucun acces
a luy,pource q͂ sa maieste est trop haute.Nous
sõmes yci cõme aux abysmes de mort. Il faut
dõc qu'il y ait ce moyẽ d'vnion en la personne
de Iesus Christ , ou autremẽt Dieu ne no9 sera
iamais propice,q͂ no9 ne pourrons pas l'inuocquer,
n'attẽdre nul biẽ qui soit de luy,iusques
a tãt q͂ nostre Seigneur Iesus Christ no9 apparoisse,
& qu'il se mette là pour nous cõduire a
Dieu son Pere,& qu'il approche de no9,en no9
testifiãt q͂ Dieu nous sera prochain en sa persõne.
Or deuãt q͂ passer plus outre quãt aux trois
mots qui sont yci mis, Grace, & misericorde,&
paix :nous en auõs desia exposé les deux,grace
& paix,&auons dit en sõme q͂ ce mot de grace
emporte q͂ Dieu nous aime , & qu'il se declare
propice enuers nous. Le mot de paix emporte
en general toute prosperite.Or par cela il no9
est signifié q͂ nous sõmes mal-heureux iusques
a tãt q͂ Dieu se soit recõcilié auec nous,& qu'il
no9 ait receus en son amour, voire quãd nous
auriõs tout ce qu'il est possible de souhaiter,&
q͂ le mõde no9 estimera tant heureux que merueilles,
nous aurõs beau no9 applaudir,tãt y a
q͂ no9 serõs tousiours miserables iusques a tãt
q͂ nous soyõs asseurez q͂ Dieu nous aime , & q͂
il nous reçoit pour ses enfãs.Et pourquoy?car
il faut q͂ tous les biẽs dõt nous iouissons en ce
mõde nous soyẽt cõuertis a malheur, & qu'ils
nous soyẽt bien cher vẽdus,iusques a tant que
Dieu nous ait receus en sõ amour.Mais au cõtraire,
sõmes-nous aimez de Dieu?sõmes nous
fondez en sa grace? il nous enuoyera ce qu'il
scaura nous estre propre.Cõme nous voyõs q͂
il persecute ceux qui sont reiettez de luy:& encores
qu'il permette qu'ils ayẽt des biẽs selon
le mõde,si est-ce qu'il n'en ont poĩt vne vraye
iouissance , pource qu'ils sont tousiours en trouble:
mais a l'opposite il enuoyera a ses enfãs
ce qu'il cognoist leur estre propre & vtile,
& s'ils ont faute & indigẽce il les consolera en
sorte qu'ils se pourront glorifier au milieu des
miseres:cõme dit S.Paul, q͂ quand nous auons
ceste certitude de l'amour de Dieu , que no9 auõs 2.Cor. II.
30.
nos ames qui se reposent en luy,nous pouuons
non seulement nous glorifier de l'esperãce
qu'il nous dõne de la vie celeste,mais en ceste
vie presente,scachãs qu'il nous aime,encores
que nous soyons affligez nous sommes resiouis,
quãd nous scauõs qu'il cõuertira le tout
a nostre salut,puisqu'il nous dõne desia ce sentimẽt,
qu'il en ha le soin. Voyla cõme les miseres
seruirõt aux enfãs de Dieu, & par ce moyẽ
ils se pourront glorifier en icelles. Maintenãt
donc nous voyõs cõme la grace de Dieu est le
cõmencemẽt de tout bien, & de toute felicité.
Et ce n'est point sans cause que S. Paul les conioint.
Et par cela aussi nous sommes admonestez
de ne point mettre la charrue deuant les
bœufs,quãd nous demãdons a Dieu ce ꝗ nous
est propre.Mais voyci l'ordre q͂ nous auõs a tenir,
c'est qu'en premier lieu il plaise a Dieu de
nous receuoir en sa grace,& puis de nous enuoyer
les choses qui nous sont necessaires &
vtiles.Il est vray q͂ nostre nature tẽdra tout au
contraire , tout ainsi qu'vn malade sera plus
pressé de sa passion qu'il ne sera point de la cause
du mal.Ainsi quand nous prions Dieu,nous

mais sainct Paul apres auoir parlé de la grace
qui nous a este manifestee , & que iournellelement
Dieu nous communique en la persõne
de son Fils par l'Euangile , monstre que cela
vient de ce qu'il luy a pleu nous aimer par sa
bonte gratuite. Voyla en somme quant a ce
passage. Venons maintenãt a ce que dit sainct
Paul : Il appelle Timothee son vray fils en la
foy . Or ceci de prime face pourroit estre trouué
estrange,qu'vn homme soit pere spirituel,
veu que nostre Seigneur Iesus Christ a defendu Mat.23.9.
cela,disant , Qu'il ne nous faut point auoir
de peres en terre , d'autant qu'il n'y a que celuy
qui est au ciel qui merite cest honneur-la.
Mais tout ainsi que Dieu estant Pere & de nos
ames & de nos corps fait cest honneur aux hõmes
mortels que son titre leur est cõmun:aussi
quãd il luy plaist d'ẽuoyer les hõmes pour no9
attirer a la foy,ils nous sont peres spirituels.Il
est vray qu'il semble encores que ceci ne conuiene
point auec ce qui est dit en l'epistre aux Heb.12.9.
Hebrieux. Car là il y a vne comparaison faite
des peres charnels auec le Pere de nos ames,
( qui n'est qu'vn ) comme de choses opposites :
mais le tout s'accordera tresbiẽ quãd
nous aurons entendu commẽt c'est q͂ Dieu est
nostre Pere, & cõme les hõmes le sõt. Ce nom
de Pere est tant honorable , qu'il n'apartient
qu'a Dieu seul,mesmes au regard des corps.Et
ainsi,quand nous disons que ceux qui no9 ont
engẽdrez selõ la chair, sõt nos peres,c'est vne
façõ de parler impropre car vne creature mortelle
ne merite pas ceste dignite si haute & si
excellente:mais tant y a que Dieu par sa bõte
encores esleue les hommes en ce degré , qu'il
veut qu'ils soyent appelez peres : & c'est afin
qu'ils se cognoissent tant plus obligez a luy.
Or il n'y a pas grande difficulte quant a la vie
presente , qu'on appelle peres charnels ceux
qui ont engendré des enfans. Mais il semble
que Dieu soit le seul Pere de nos ames, en telle
sorte q͂ cela ne doyue point estre applicqué
aux hõmes:& tant y a qu'il y a vne mesme raison.
Pourquoy?Il est vray que c'est Dieu seul ꝗ
nous engendre par sa parole,laquelle se nomme 1. pier.1.23
semence de vie: mais cependant il appelle Isa.54.15.
& Gal.4.27.
l'Eglise nostre mere.Car tout ainsi qu'vne mere
conçoit & qu'elle porte ses enfans,& qu'elle
les nourrit , ainsi Dieu ayãt tousiours sa parole
en son Eglise,veut que nous soyons & engẽdrez
par icelle,& nourris & esleuez,iusques
a ce que nous soyons venus en aage d'homme,
comme sainct Paul en parle. Voyla donc l'Eglise
qui est appelee nostre mere celeste,& l'Escriture Ephe. 4.15
est pleine de cela.Et sainct Paul declarãt
ce qui en a este dit aux Prophetes,monstre
que c'est par la parole de l'Euangile , qui est la
semẽce de vie, q͂ nous sommes faits enfans de
Dieu.Pour cela l'Eglise est nommee nostre mere
au 4. des Gal.Or par vne mesme raison ceux
ausquels cette charge est cõmise de porter l'Euangile,
sont appelez peres , quand ils engendrent
en Iesus Christ par la semence de vie incorruptible,
& qu'ils nourrissent les ames,& q͂
ils les esleuent iusques a ce qu'elles soyent venues
a perfection. Comment est-ce que nous
sõmes faits enfans de Dieu? C'est par la parole
de l'Euãgile.Et ceste parole-la d'où no9 est elle
proferee, sinon du costé des hommes? Et ainsi
[si donc]

nous voulons estre tenus pour enfans de Dieu,
que l'Eglise soit nostre mere , & que les Ministres
soyent nos peres : & tous ceux qui ne
veulent point se ranger là , qu'ils s'en aillent
( comme i'ay dit ) auec Satan en enfer chercher
leur maison : car ils n'ont ne lieu ne place
en l'Eglise de Dieu.Et au reste,d'autant que
il y en a beaucoup qui font semblant d'estre fideles ,
& qui pretendront le nom de ceux qui
auront este reformez par l'Euangile , & toutesfois
qu'il n'y aura qu'hypocrisie en eux,voyla
pourquoy sainct Paul appelle Timothee son
vray fils en la foy . Il adiouste cela pour le discerner
d'auec les enfans qui estoyẽt bastars.
Car le mot dont vse yci sainct Paul ne se peut
assez exprimer , il emPorte cõme fils naturel,
vn droit fils. Et sainct Paul auoit-il des enfans
qui ne fussent pas vrais & legitimes en la foy?
Ouy biẽ:non pas que la faute veinst de son costé,
mais pource que beaucoup auoyent fait
semblant de receuoir l'Euangile par sa bouche,
& puis apres qu'on ne voyoit que malice
en eux & hypocrisie, il les desauouẽ pour
ses enfans , & dit qu'ils ne sont point vrais &
legitimes. Apprenons donc que ce n'est point
assez que nous ayons este enseignez en l'Euangile,
& que nous ayons fait profession d'y
adherer, & que nous ayons ouy par la bouche
des hommes ce que Dieu nous aura commandé,
mais il faut que nous demouriõs vrais enfans,
que nous auisions bien de tousiours suyure
le droit chemin sans en decliner en façon
que ce soit. Car si tost qu'on commence a se
desbaucher , & qu'on laisse la droite ligne,
que reste-il sinon qu'on deuiene tout bastard,
au lieu qu'on estoit du nombre des enfans de
Dieu,& qu'il auoit exalté l'homme en cest hõneur
inestimabler? Aduisõs qu'en la personne
de Timothee sainct Paul nous a voulu instruire,
que si nous auons receu l'Euangile, il nous
y faut tellement persister que la bonne semence
qui aura este plantee en nous , ne soit abbastardie
ne corrompue , mais qu'elle persiste
iusques a ce qu'elle produise son fruict. Et
quand sera-ce? Apres que Dieu nous aura retirez
de ce monde , & qu'il nous fera sentir le
fruict, & la iouissance de nostre redemption
en son royaume celeste. Or nous nous prosternerons
deuant la face de nostre bon Dieu , en
cognoissance de nos fautes. Le priant qu'il
luy plaise nous en purger , & nous en toucher
tellement au vif que nous apprenions de renõcer
a tout ce qui est du monde , & de nostre
chair, & que nous mettions peine de venir a
luy , voire & en telle sorte qu'il nous reçoyue
cõme ses enfans.Et puis qu'il luy a pleu nous
attirer a soy par la cognoissance de sa verite,
qu'il luy plaise nous conduire iusques en la
fin & nous tenir la main forte afin que nous ne
soyons iamais destournez de la saincte vocation.
Ainsi nous dirons tous , Dieu tout puissant
pere celeste,&c.