SERMONS
SVR LE CANTIQVE
DES CANTIQVES, DE
Salomon.

Nostre ayde soit au nom de Dieu qui
a fait le ciel & la terre,Amen.

Mes freres,qu'vn chacun de vous se presente deuant
la face du Seigneur , auec confession de ses fautes
& pechez,suyuant de son cœur mes paroles.

Seigneur Dieu , Pere Eternel & tout-puissant,nous
confessons & recognoissons sans feintise deuant ta
saincte Maiesté , que nous sommes poures pecheurs.
conceus & nais en iniquité & corruption,enclins à mal
faire , inutiles à tout bien:& que de nostre vice nous
transgressons sans fin & sans cesse tes saincts commandemens :
enquoy faisant nous acquerons par ton iuste
iugement ruine & perdition sur nous. Toutesfois,
Seigneur , nous auons desplaisir en nous-memes de
t'auoir offensé,& condamnons nous & nos vices,auec
vraye repentance,desirãs que ta grace subuienne à nostre
calamité.

Vueilles donc auoir pitié de nous, Dieu & Pere tres-
benin & plein de misericorde, au nom de ton Fils Iesus
Christ nostre Seigneur. Et en effaçant nos vices &
macules, elargi nous & augmente de iour en iour les
graces de ton sainct Esprit : afin que recognoissans de
tout nostre cœur nostre iniustice,nous soyons touchez
de desplaisir , qui engendre droite penitence en nous

laquelle nous mortifiant à tous pechez , produise
fruits de iustice & innocence , qui te soyent agreables,
par iceluy Iesus Christ nostre Seigneur.Amen.

Nous inuoquerons nostre bon Dieu & Pere , le
supplians, comme toute plenitude de Sagesse gist
en lui , qu'il lui plaise nous illuminer par la grace de
son sainct Esprit , pour auoir la vraye intelligence de
sa Saincte Parole,affin qu'elle ne soit point corrompue
par nostre sens & entendement charnel,mais que
nous estãt fidelemẽt exposee, & receue en noz cuœurs
par vne vraye & viue foy,nous soyons aprins par icelle
de renoncer à nousmesmes, pour mettre plenement
nostre fiance en lui, pour l'honorer & seruir comme
il apartient, lui rendãs la crainte & l'honneur que doiuent
vrays enfans a leur pere,& seruiteurs à leur Maistre,
puis qu'il lui a pleu nous faire cest hõneur de nous
aduouer au nombre de ses seruiteurs & enfans : ce que
nous lui demanderõs au nom & a la faueur de nostre
Seigneur Iesus Christ son Fils,ainsi qu'il lui a pleu nous
enseigner & commander de le prier, en disant Nostre
Pere qui es és cieux. Ton nom soit sanctifie. Ton regne
aduiene. Ta volonte soit faicte en la terre comme au
Ciel. Donne-nous auiourdui nostre pain quotidien. Pardonne
nous noz offenses , comme nous pardonnons à ceux
qui nous offensent. Et ne nous indui point en tentation,
mais nous deliure du malin. Car à toy
appartient le regne,la puissance &
la gloire aux siecles des
siecles. Amen .
[Ce qui]

Cãtique des Cantiques de Salomon.

Ce liure tant en l'Eglise ancienne
Israëlitique,que en la Chrestienne
à tousiours esté tenu
d'vn commun consentement
non seulemẽt du nombre des
liures dictez par le S.Esprit , & qui doyuent
estre la regle de nostre Foy: mais aussi specialement

comme l'vn des tresexcellents & plus
spirituels : & toutesfois n'a pas esté manié ni
leu en l'Eglise,cõme chacun des autres: mais
a esté reserué pour estre proposé à ceux qui
seroyent les plus auãces en la cognoissance
de Dieu, & de iugement plus ferme.Premierement,
pource qu'il est escrit d'vn style entierement
allegorique & ænigmatique, cest à
dire nous donne à entendre les choses spirituelles
par similitude & figure prinse des choses
naturelles & corporelles. ce qui n'est pas
donné à tous ni de bien entendre de soymesmes,
ni de bien comprendre tousiours par vn
autre,pour en bien faire son profit.Secondement,
pource que ceste Allegorie est entierement
fondee sur la conionction de mariage,
en laquelle consideree humainement dés le
commencement iusqu'à la fin , il se trouue
beaucoup de grãds defauts & imperfectiõs de
la part des hõmes, ce qui est aduenu, depuis
que le peché est entré au monde. Oultre cela
on ne sait que trop combien le monde est de
long temps adonné à toutes ces ordures &
lasciuetés, qui sont autant de pollutions des
caresses & chastes dilections maritales : esquelles
combien qu'il y ait beaucoup de default,
qu'il est bõ besoin que le Seigneur couure
& suporte par sa grande bonté, toutefois
cela n'ẽpesche pas que selõ le dire de l'Apost.
Hebr.13,4. le mariage ne soit honorable entre
[tre]

tous, & la couche d'icelui sans macule.
Voila pourquoy quelques vns considerans
les malheurtés de ce mõde, & qu'en ce Cantique
il y a plusieurs manieres de parler,selon
que portoit la simplicité du temps auquel ce
liure a esté escrit, desquelles il seroit aisé d'abuser,
ont fait difficulté de l'interpreter en
l'Eglise,craignans qu'il ne s'en ensuyuist plus
de desauantage que d'edification. Les autres
passans bien plus auant, on esté si hardis ou
plustost outrecuidés, que de vouloir rayer ce
liure d'entre les escrits canoniques , comme
estãt du tout profane, & comme si Salomon
l'auoit composé au milieu de ses desbordemens.

Quant aux premiers de ces deux,ils sont à
louer,entant qu'ils ne trouuent pas bon que
chacun se iette ni soit introduit temerairement
au maniemẽt de ce liure suyuant le dire
de l'Apostre , 1. Cor.3,2. qu'il faut commencer
par le lait pour venir finalemẽt à la viande
pure & solide:Ce qui a esté aussi songneusement
obserué en ceste Eglise & ailleurs,par
les fidelles Pasteurs:Mais quãt aux autres qui
ont osé condamner ce liure, ils ne sont non
plus à escouter que ceux qui se dressent directement
contre le S.Esprit par vne arrogance
du tout desmesuree:veu que non seulemẽt
de tout temps l'Eglise ancienne & nouuelle
en a iugé tout autrement , ayant esté ce liure

songneusement exposé par les anciens docteurs
Grecs & Latins : voire mesmes traicté
& manié comme du tout contemplatif,
és monasteres entre les moines , plus
qu'aucun autre liure, quoy qu'ils fissent deslors
profession d'estre eslõgnez de toute pensee
de femme & de mariage. Dauantage ceste
mesme Allegorie du mariage est poursuyuie
bien amplement & a mesme fin es autres
liures tenus pour diuins & sacrés d'vn commun
consentement perpetuel , comme au
Pseaume 45, qui est comme vn sommaire de
tout ce Cantique, & en Esa.62.1. & 6. Ierem.
cha.3 Ezech.16& 23. Osee1.&2. Matth.25.
& Ieh.3.29. Rom.7.1,2 Cor.II, 2. & sur tout
Ephes. 5. ou il vse des mesmes mots que Adam
en la premiere institution du mariage:
ascauoir , que l'Eglise est faite Chair de la
chair de Iesus Christ , & os de ses os, ce qui
est , dit il , vn grand secret : Bref le S. Esprit
en l'Apocalypse 17. est l'expositeur du commẽcement
de ce liure: Et ne se faut non plus
arrester à ce que quelques vns disent pour se
persuader que ce liure ne soit canonique, ascauoir ,
Que nul passage d'iceluy n'est allegué
au Nouueau Testamẽt. Car , premierement
oultre ce que i'ay dit du 45. Pseaume
qui est le sommaire de ce liure , les similitudes
prises du mariage en S. Paul, & en l'Apocalypse
dernier chapitre en sont puisees,
[&]

& faudroit par mesme raison condãner d'autres
liures du Viel testament , receus sans
contredict.

2 Il faut donc tenir vn moyen en l'exposition
de ce liure , le traitant ou & ainsi qu'il
appartient en l'Eglise de Dieu, en laquelle
Dieu ne veut estre tenu caché, ni tellement
secret rien de ce qu'il nous enseigne par
les Prophetes & Apostres , qu'on se contente
de le voir enregistré , sans regarder &
cõsiderer que cest:ainsi que les payẽs ont fait
de leurs fausses religions, craignãs que leurs
abus fussent decouuerts, si on sçauoit leurs
mysteres : & comme nous voyons encores
auiourd'hui qu'il se pratique en la faulse Eglise,
en laquelle on defend la lecture des saintes
Escritures en langue vulgaire:au lieu que
les Prophetes & Apostres dés le commencement
du monde ont parlé & escrit en langage
commun & intelligible à tous, pour estre
entendus de tous.Bien est vray cependãt
que le S. Esprit n'a pas vsé d'vn mesme style
par tout , mais à parlé quelquefois tout clairement,
& quelquefois obscuremẽt, en telle
sorte toutesfois (comme quelqu'vn des Anciens
à pieça remarqué) que l'obscurité est
attrempee de la clarté:afin d'aiguiser le desir
de s'enquerir de ce qu'on n'entend pas du
premier coup,& pour nous mieux faire priser
les secrets de sa sapience,apres qu'il nous

a donné le don de science & d'intelligence
par vne songneuse diligence en la lecture &
conference des passages des escritures. C'est
ce que nous esperons faire , moyennant la
grace de Dieu obtenuë par vos prieres , en
l'exposition de ce liure:attendu qu'ily a desia
enuiron cinquante ans que Dieu a de nouueau
comme remis sus son Iubilé , & fait reluire
sa sainte lumiere en ce lieu , tellement
que rien ne nous doit estre nouueau en tel
cas, comme si nous estions encores petits
enfans de sens,au lieu que ce nous doit estre
vne grãd honte,si nous ne sommes du nombre
de ceux desquels il est parlé Heb.5. ascauoir,
qu'ils sont exercés à discerner le bien &
le mal.

3 AV reste pour l'intelligence de ce liure,
il est requis de scauoir qui a meu le S. Esprit
de choisir & poursuyure si auant ceste similitude
du mariage,lequel n'est pas,comme i'ay
dit,sans grandes imperfections,si le Seigneur
vouloit prendre les choses à la rigueur. C'est
en somme,d'autant qu'il ne se trouue entre
les hommes aucune liaison si Diuine quant à
l'obligation,ny si estroicte & ferme quant à
l'effect,que le mariage. Car en tous autres
traités & contracts par lesquels les vns s'obligent
aux autres,il est question des biens
de ce monde & qui sont hors des personnes:
ou s'il est questiõ du corps, l'obligation n'est
[point]

point reciproque, ains autant au desauãtage
de l'vn , qu'a l'auantage de l'autre : mais au
Traité de mariage,premieremẽt le Seigneur
y entreuient comme principal autheur de
sorte que ce lien est indissoluble si Dieu luy
mesmes ne parle, rompant le liẽ par la mort
ou autre sienne ordonnance. Et puis l'obligation
des personnes est si reciproque , que
pas vne des deux parties n'est à soymesme,&
toutes les deux deuiennent comme vne seule
personne par la conionction maritale.Qui
plus est l'effect en est plustost diuin qu'humain ,
ascauoir la generation des hommes,
comme par maniere de dire,Dieu par ce contract
se seruaut des hommes ainsi que d'instrumens
à faire ce qui luy est propre , ascauoir
a faire engẽdrer des hommes , desquels
son Eglise est composee. Car combien que
ceste ordonnance de Dieu , Croissez & multipliez,
s'estende generalement a tous animaux.
y estans les hommes compris: si est-ce
qu'ainsi que la creatiõ de l'homme , & quant
au masle & quant à la femelle,est toute aultre
que celle des aultres animaux,aussi fault il
conclutre que Dieu conduit & amene à son
effect la suite du genre humain de pere en
fils,d'vne façon speciale & particuliere par la
conionction maritale , ordonnee & beniste
specialement par l'inspiration de son Esprit
& inuocation de son nom.

Le S:Esprit donc nous voulant representer
ce qui nous est de soymesmes incomprehensible,
ascauoir, la tresestroite liaison spirituelle
de Iesus Christ auec l'ame fidelle,
pour engendrer en l'esprit des croyans,(desquels
l'assemblée s'appelle l'Eglise)la cognoissance
de verité auec tous bõs & saints mouuements
& effects , pour viuifier puis apres
chascun fidelle tout entier, & par cõsequent
toute ceste Eglise,& assemblee en la vraye
vie eternelle , n'a peu choisir vne similitude
plus propre ni vn plus vif patron & modelle
de ceste conionction.

C'est la raison aussi pour laquelle sa parole
receüe & fructifiante par Foy est par S.Pierre
appellee semence incorruptible.A cela tẽd
aussi ceste seconde generation qui se fait par
l'esprit , de laquelle parle amplement nostre
Seigneur Iesus Christ auec Nicodeme Ieh.3.
Ce que ie veux bien encore vous declarer &
deduire plus amplemẽt, comme estant ce secret
le fondement de nostre salut.

4. Chacun donc est contraint de confesser
que tout bien vient de Dieu , soit que nous
considerions l'essence que toutes creatures
ont receue de Dieu,soit que nous ayons esgard
aux diuerses qualitez & entretenement
d'icelles: Cela nous est signifié par l'Apostre
Act.17. disant, qu'en Dieu nous sommes,&
auons mouuement,&viuons, comme si par
[maniere]

maniere de dire , Dieu le Createur s'insinuoit
dedans ses creatures,pour nous mieux
monstrer ceste vertu & efficace diuine qui
se desploye en icelles, selon la mesure & duree
qu'il lui plaist : combien qu'a parler proprement ,
son essence diuine ne soit dedans
ni dehors le monde , mais comprenne tout
incomprehensiblement.Mais il y a deux autres
manieres de conionctions de Dieu voire
d'vnions auec l'homme , bien differentes
de celle dont nous venons de parler, & d'vn
effect d'autre consequence : asauoir en premier
lieu, celle de l'Eternel fils de Dieu auec
vn vray corps & vne vraye ame humaine au
ventre de la tresheureuse vierge Marie , par
vnion personnelle, incomprehensible aux
Anges mesmes,par laquelle,la Parole qui est
le fils eternel & coessentiel du Pere , à esté
faite chair, Ieh.1,14.de sorte que des lors ceste
personne qui est appellee Iesus Christ , Matth.
1,16.est vray Dieu & vray homme,sans separation
ni confusion aucune des deux natures,
qui est ce grand secret duquel parle
l'Apostre 1.Tim 3. Et de ceste ci depend vne
troisiesme coniunction de nostre Immanuel
auec les croyans,par laquelle toute personne
fidelle , & par consequent toute l'Eglise qui
en est composee, est spirituellement comme
mariee auec Iesus Christ, & faite chair de sa
chair & os de ses os : non pas que le corps de

Iesus Christ soit reellemẽt dans nostre corps,
ou son ame dans nostre ame (ce que ne peut
porter la verité de la substance de son corps
ny de son ame, comme aussi telle cõionction
n'appartiẽt aucunemẽt à ce mystere du tout
spirituel & tendant à vne vie spirituelle)mais
dautãt qu'ainsi qu'vn corps humain,l'ame
y estant naturellemẽt coniointe , viuifie tous
les mẽbres de ce corps , pourueu qu'ils soyẽt
liez & conioints ensemble selon la structure
du corps: ainsi Iesus Christ , comme espoux
spirituel de son Eglise , par la force de son S.
Esprit,& par le moyen de sa nature humaine,
selõ laquelle il symbolize auec nous , se ioint
de si pres & si puissamment à nous , moyennant
la foy qui l'apprehende,qu'ils nous viuifie
à vie eternelle , besongnant en nostre entendement
& volonté,pour y reparer peu à
peu l'image de Dieu effacee par le peché,pour
finalemẽt nous faire participãs en perfection
de son immortalité glorieuse , au dernier
iour, auquel est reseruee la consommatiõ de
ce saint & spirituel mariage. C'est de là que
l'Apostre a puisé ces manieres de parler qu'il
a apprises de Iesus Christ mesmes , asçauoir ,
que nous sommes en Iesus Christ , Rom.8,1.
& que Iesus Christ est en nous:Rom.8,10.
qu'il vit en nous,& nous en luy:Gal.2,20. &,
qu'il habite en ses saints Ieh.14, 23.comme
aussi à mesme fin Iesus Christ se compare à
[vn]

vn sep, & nous aux sermens fructifians:Ieh.15.
& son corps est appellé nostre viande, & son
sang nostre bruuage Ieh.6. dautant qu'ainsi
que corporellement par le manger & le boire
ceste vie presente est conseruee en nous,
ainsi c'est d'vn seul Iesus Christ s'insinuant en
nous,en la maniere que j'ay dicte, & par maniere
de dire receu mangé & digeré par la
Foy de l'homme interieur,que nous tirons la
vraye vie eternelle. En l'expositiõ de ce liure
donques, il n'est pas question d'apporter vn
esprit sensuel , mais il faut qu'auec Salomon
nostre ame conçoyue ce mari & ce mariage,
& tout ce qui en est dit, d'vne façon eslõgnee
de toutes pensees charnelles & pollues,nous
souuenans de ce qui est dit par l'Apostre , ascauoir,
Que celuy qui adhere au Seigneur est
fait vn esprit auec luy 2.Corin.6.& par le Seigneur:
Que celuy qui est né de l'esprit est esprit
Ieh.3.

Or pour entendre plus specialement la
deduction de ce Cantique , il nous faut scauoir
qu'il est escrit en maniere de dialogue,
y estant introduites plusieurs personnes parlantes
& respondantes les vnes aux autres auec
vn admirable artifice , ascauoir , vne espouse
adressante quelquefois sa parole à d'autres
filles, & vn espoux pareillement accompagné
de ses amys. ce que nous voyons aussi
s'obseruer en la celebration des fiancailles &

espousailles bien & honnestement reiglees:
L'espouse c'est la compagnie des croyãs, qui
se nomme l'Eglise, representee cõme en vne
seule personne , (comme aussi il est dit, que
les fidelles n'ont qu'vn cœur & vne ame Act.
4,32.) en laquelle compagnie toutesfois Salomon
en introduit vne comme parlant au
nom de toute sa suitte. Mais oultre cela , veu
la distinctiõ qu'il met aucunement entre cesteci
qui parle cõme Royne & dame, & les
aultres filles de Ierusalem, (suyuant aussi ce
qui en est escrit Pseaume 45) nous pouuons
entendre par ces aultres filles,tant ceulx qui
sont en l'Eglise plustost de nom que deffect,
que ceux qui sont vrayemẽt des fideles,mais
sõt encores biẽ nouueaux,&,cõme petis enfans
suyuẽt leur mere,qui est cõme vne Royne
suyuie de ses filles & damoiselles. Dautrepart
l'espoux cest nostre Seigneur Iesus
Christ,par les amis duquel au traité de ce mariage
nous entendons premierement les esprits
bienheureux desquels Iesus Christ de
tout temps s'est seruy & se sert pour l'edification
de son Eglise, comme il est dit Pseaume
34.& Heb.1.comme aussi toute l'Escriture
nous en monstre les effects:auec lesquels
faut conioindre principalemẽt ces excellents
architectes du Temple spirituel de l'Eglise,ascauoir
les Prophetes & Apostres Ephes.2. &
Apoc.21. & consequemment les Pasteurs &
[docteurs]

docteurs trauaillans fidellement à preparer
ceste sainte Espouse,comme en parle l'Apostre
2.Cor.II. & à l'assemblage des saints,
Ephes.4. Il faut dauantage noter qu'ainsi
qu'au mariage il y a trois degrez,ascauoir en
premier lieu la stipulation, que nous appellons
les fiançailles,durant lesquelles les parties
s'appellent le fiancé & la fiancee: puis la
celebration solennelle du mariage,au iour de
laquelle on les appelle l'Espoux & l'Espouse:
ou le marié,& la mariee: & finalemẽt la consommation
du mariage , apres laquelle on
parle de mari & de femme:ainsi en ce mariage
spirituel le fils de Dieu a premierement
comme fiancé son Eglise par la promesse faite
à Adam de sa semence de la femme, laquelle
semence briseroit la teste du serpent.
Ce qu'il à puis apres reconfermé à Abraham
Isaac & Iacob. Mais il a encores passé plus auant,
quand par l'establissement de la sacrificature
Leuitique & autres ombres des
promesses euangeliques , (le corps & substance
desquelles estoit en Christ Coloss.2)
il a comme espousé sa fiancee , mais seulemẽt
en absence & comme par procureurs. Voyla
pourquoy ceste espouse est premierement
introduitte par Salomon, comme rauie en
l'attente & desir de la presence reelle & pertsonnelle
de cest espoux,lequel l'ayant en plusieurs
sortes cõsolee & fortifiee par trescertains

tesmoignages & sa bienueilance, puis
apres se vient rendre iusques à elle , predisant
Salomon par cela prophetiquement la
manifestation du fils de Dieu en chair & sa
conuersation reelle au milieu des siens , mais
seulement pour vn petit de temps , remettant
l'entiere celebration & consommation
de ceste sainte & plus que sainte conionctiõ
au dernier iour és cieux , alors que Dieu sera
tout en tous:1 Cor.15. & apparoistra ce
qu'est l'Eglise,qui le verra tel qu'il est 1.Ieh.2.
& 3. C'est donc a ceste premiere & seconde
iournee actuelle de l'Espoux que cest'Espouse
aspire auec vn ardeur merueilleuse suyuant
ce qui est dit en S.Matth.13.chap.& par S.Pierre
du desir des anciẽs Prophetes 1.Pierre 1.
& plus expressement encores par S. Paul,desirãt
de desloger pour estre desia auec Iesus
Christ. Philipp.1.comme sont tous les vrays
fidelles , demandans en leur priere ordinaire
l'auenement de son regne, voire auec gemissements
inenarrables Rom.8.n'oubliant pas
cependant Salomon de parler des persecutions
qui deuoyẽt auenir à l'Eglise,voire par
les siens mesmes,& la vocatiõ des Gentils,auec
les consolations tresfermes & tresexcellentes,
l'Espoux entretenant son Espouse par
la reiteration de ses trescertaines promesses
accompagnées de grandes benedictiõs spirituelles,
qui sont à son Eglise cõme les arres
[du]

du second aduenement tresglorieux.

6 Tel est donc le sommaire & le but de ce
Cãtique,appellé Cantique des Cantiques,&
pour son excellẽce entre tous les autres contenus
en l'Escriture,tãt s'en faut qu'il en doyue
estre reietté:ou bien dautãt qu'il est comme
composé de plusieurs Cantiques , à cause
des personnes qui se respondent l'vne à l'autre.
Et afin qu'on ne doutast de l'autheur,ou
plutost de l'escriuain de ce traitté:il est dit expressement
qu'il est de Salomõ, Salomon di-
ie,remply de la sapience de Dieu,& non pas
qu'il l'ait composé durant sa folie: en la faute
mesme duquel nous nous deurions bien mirer,
prians le Seigneur nous faire la grace de
profiter tellemẽ ten la lecture de ce S.Cantique,
que nous surmontions en cela Salomon
mesme , en gardant songneusemẽt en nostre
cœur ce que Salomon a laissé escouler : sinon
que nous disions que sur sa vieillesse (ce qui
se peut aussi recueillir aucunement du liure
de l'Ecclesiaste,) il ait eu le don de repentance,
combien que l'escriture n'en face aucune
expresse mention : & que pour le moins ses
idolatries ayent encor duré plusieurs siecles
apres luy.

7 Quoy qu'il en soit , sans nous arrester à
ce poinct,considerans l'ordre des trois liures
de Salomon nous pouuons dire qu'és Prouerbes
il a enseigné aux hommes tellemẽt la

vraye conduite de ceste vie , que ça esté d'vne
façon familiere & comme vn maistre parlant
en vne escole à ses disciples : Puis apres
en l'Ecclesiaste il nous a menez cõme du plat
pays à vne haute montagne,nous faisant voir
d'vn lieu eminent,les diuers destours,par lesquels
tous les hommes s'esgarẽt, les vns d'vne
façõ & les autres d'vne autre,monstrãt au
trauers de ses labyrinthes quel est le vray chemin
pour n'estre surpris de la vanité de ce
monde, & pour vser tellement de ceste vie,
qu'elle soit le chemin qui nous conduise à la
vraye & permanence felicité. Mais finalemẽt
en ce Cantique ceux qu'il a ainsi doublement
instruits , sont esleuez par lui, cõme iusques
par dessus les nues, & comme rauis à la consideration
des biens celestes, comme s'ils estoyent
desia habitãs des cieux : ou pour le
moins si desia ils frappoyẽt à la porte d'iceux.
Ce qui a esté rapporté par quelqu'vn des anciens
par allegorie au Temple du Seigneur
basti par le mesmes Salomon , auquel il y auoit
premieremẽt le paruis general du peuple,
à quoy on peut cõparer le liure des Prouerbes :
puis qu'il y auoit le lieu saint des Sacrificateurs,
& finalement le Sanctuaire,appellé
le Saint des Saints. Ainsi donc pouuons
nous dire que l'Eglise est comme amenée à
l'entrée du lieu saint par l'Ecclesiaste,& de la
introduite par ce Cantique iusques à estre
[preste]

preste d'entrer iusques au Sanctuaire apres
Iesus Christ son espoux,qui y est entré le premier,
pour nous dedier la voye Hebr.9. &
nous y apprester logis , Ieh. 14. auquel suyuant
la requeste qu'il a faite pour ceste espouse
à Dieu son Pere , elle soit aussi receue
en son temps Ieh.17.

8 Il resteroit maintenant de venir au texte
du Cantique , ce que nous ne commencerons
pour ceste heure. Auisons de faire nostre
profit de ces choses,suppliant celuy qui
nous a fait tant de graces de nous auoir introduits
en son Eglise hors des pollutions du
monde & de tant d'idolatries & superstitions,
qu'il nous donne son S. Esprit pour
bien contempler & entendre sa sainte doctrine
qui nous est enseignee en sa maison
pour profiter de plus en plus en la cognoissance
& vraye crainte d'iceluy, considerans
l'abysme de sa grãde misericorde, en ce qu'au
lieu de nous reietter selon nos merites, il luy
à pleu nous nettoyer de tant d'ordures pour
nous dedier & consacrer du tout à luy,cõme
vne vierge chaste & pudique, ne contristans
point son S. Esprit de purification , mais au
contraire souffrans qu'il besongne en nous
puissammẽt de foy en foy,en attendant sa seconde
venue,qui fera l'accomplissemẽt de ce
qu'il nous faut esperer auiourd'huy. Suyuãt
ceste saincte doctrine nous luy demanderõs

grace & misericorde comme sensuit.

DIeu tout-puissant Pere celeste , nous recognoissons
en nous-mesmes & confessons , comme la
la verité est , que nous ne sommes pas dignes de leuer
les yeux au ciel pour nous presenter deuant ta face:
que nons ne deuons pas tant presumer , que nos oraisons
soyent exaucées de toy , si tu regardes ce qui est
en nous.Car nos consciences nous accusent, & nos pechez
rendent tesmoignage contre nous:& nous sauons
que tu es iuste iuge,qui ne iustifies pas les pecheurs &
iniques : mais punis les fautes de ceux qui ont transgressé
tes saincts commandemens. Ainsi,Seigneur,en
considerant toute nostre vie , nous sommes confus en
nos cœurs, & ne pouuons autre chose , sinon nous abbattre
& desesperer comme si nous estions desia és abysmes
de mort. Toutesfois, Seigneur,puis qu'il t'a
pleu par ta misericorde infinie de nous commander
que nous t'inuoquions, mesme du profond des enfers,
& d'autant plus que nous defaillons en nous-mesmes,
que nous ayons nostre refuge à ta souueraine bonté:
puis aussi que tu nous a promis de receuoir nos requestes,
& supplications,nõ point en considerant quelle
est nostre dignité, mais au Nom & par le merite de
nostre Seigneur Iesus Christ, lequel tu nous as cõstitué
intercesseur & aduocat : renonçant à toute fiance humaine,
nous prenons hardiesse en ta seule bonté, pour
nous adresser deuant toy,& inuoquer ton sainct Nom,
pour obtenir misericorde.

Premierement, Seigneur, outre les benefices infinis
que tu distribues communément à tous hommes de la
terre,tu nous as fait tant de graces speciales, qu'il nous
est impossible de les reciter, ne mesme suffisamment
comprendre.

Singulierement qu'il t'a pleu nous appeller à la cognoissance
de son sainct Euangile , nous retirans de la
miserable seruitude du diable , où nous estions , nous
[nous]

nous deliurant de la maudite idolatrie , & des superstitions,
où nous estions plongez,pour nous conduire
en la lumiere de ta verité. Et neantmoins,par ingratitude
& mescognoissance , ayans oublié les biens que
nous auons receus de ta main,nous auõs decliné, nous
destournans de toy apres nos concupiscences,& n'auõs
pas rendu l'honneur ne l'obeissance à ta saincte Parole
telle que nous deuiõs:nous ne t'auõs point exalté & magnifié
comme il appartenoit : & combien que tu nous
ayes tousiours fidelement admonnestez par ta Parole,
nous n'auons point escouté tes remonstrances, nous auons
donc peché,Seigneur,nous t'auons offensé,pourtant
nous receuons confusion sur nous & ignominie,
recognoissans que nous sommes grieuement coulpables
deuant ton iugement : & que si tu nous voulois
traiter selon que nous en sommes dignes, que nous ne
pouuons attendre que mort & damnation. Car quand
nous voudrions nous excuser , nostre conscience nous
accuse,& nostre iniquité est deuãt toy pour nous condamner.
Et de fait , Seigneur, nous voyons comment
par les chastimens , qui nous sont desia aduenus , tu as
esté à bon droit courroucé contre nous. Car puis que
tu es iuste & equitable , ce n'est pas sans cause que tu
afliges les tiens. Ayans donc esté batus de tes verges,
nous recognoissons que t'avons irrité à l'encontre de
nous. Et maintenant nous voyons encores ta main leuee
pour nous punir : car les glaiues dont tu as accoutusmé
d'executer ta vengeance , sont maintenant desployez,
& les menaces que tu fais contre les pecheurs
& iniques, sont toutes appareillées.

Or quand tu nous punirois beaucoup plus rigoureusement
que tu n'as fait iusques à ceste heure, & que
pour vne playe nous aurions à en receuoir cent , mesme
que les maledictiõs desquelles tu as autresfois corrigé
les fautes de ton peuple d'Israel, tomberoyent sur
nous , nous confessons que ce seroit à bon droit , & ne
contredisons pas que nous ne l'ayons bien merité.

Toutesfois , Seigneur , tu es nostre Pere , & nous ne
sommes que terre & fange : tu es nostre Createur, &
nous sommes les œuvres de tes mains: tu es nostre Pasteur,
nous sommes ton troupeau: tu es nostre redempteur,
nous sommes le peuple que tu as racheté: tu es
nostre Dieu, nous sommes ton heritage. Parquoy ne
te courrouce point contre nous , pour nous corriger
en ta fureur. Que tu n'ayes point memoire de nostre
iniquité, pour la punir, mais chastie nous doucement
en ta benignité. Pour nos demerites tõ ire est enflammee,
mais qu'il te souuienne que ton Nom est inuoqué
sur nous , & que nous portons ta marque & ton enseigne.
Entretiẽ plustost l'œuvre que tu as commencee en
nous par ta grace , à fin que toute la terre cognoisse
que tu es nostre Dieu & Sauueur. Tu sais que les morts
qui sont és enfers,& ceux que tu auras desfaits & confondus ,
ne te loüerons point : mais les ames tristes &
desolees,les cœurs abbatus,les consciences oppressees
du sentiment de leur mal , & affamees du desir de ta
grace,te donnerõt gloire & louange. Ton peuple d'Israël
t'a prouoqué à ire plusieurs fois par son iniquité,
& tu l'as affligé par ton iuste iugement : mais quand il
s'est reduit à toy,tu l'as tousiours receu à pitié.Et quelques
grieues que fussent ses offenses , pour l'amour de
ton alliance que tu auois faite auec tes seruiteurs Abraham,
Isaac & Iacob,tu as destourné tes verges & maledictions,
lesquelles leur estoyent preparees,tellemẽt
que leurs oraisons n'ont esté iamais repoussees de toy.
Nous auons par ta grace vne alliance beaucoup meilleure ,
que nous te pouuons alleguer : c'est celle que
tu nous as faite , & establie en la main de Iesus Christ
nostre Sauueur,laquelle tu as voulu estre escrite de son
sang,& ratifiee par sa mort & passion. Pourtant,Seigneur
renonçans à nous-mesmes,& à toute fiance humaine,
nous recourons à ceste Alliance bien-heureuse,
par laquelle nostre Seigneur Iesus t'offrãt son corps
en sacrifice, nous a reconciliez à toy. Regarde donc,
[Seigneur,]

Seigneur , en la face de ton Christ,& non pas en nous?
à fin que par son intercession ton ire soi appaisee, &
que ton visage reluise sur nous en ioye & en salut : &
d'oresenauant vueilles nous receuoir en ta saincte
conduite,& nous gouuerner par ton Esprit , qui nous
regenere en vne meilleure vie , par laquelle Ton nom
soit sanctifié. Ton regne aduiene. Ta volonté soit faite en la
terre comme au ciel. Donne-nous auiourd'hui nostre pain
quotidien. Et nous pardonne nos offenses , comme nous pardonnons
à ceux qui nous ont offencez. Et ne nous indui point
en tentation: mais deliure nous du malin. Car à toy est le
regne,la puissance,la gloire és siecles des siecles,Amen .

Et combien que nous ne soyons pas dignes d'ouurir
la bouche pour nous-mesmes , & pour te requerir en
nostre necessité : neantmoins puis qu'il t'a pleu nous
commander de prier les vns pour les autres, nous te
prions pour tous nos poures freres & membres , lesquels
tu visites de tes verges & chastimens: te suppliãs
de destourner ton ire d'eux, nommémẽt pour N.& N.
Qu'il te souuiene,Seigneur qu'ils sont tes enfans comme
nous,& s'ils t'ont offensé,que tu ne laisses point de
poursuyure sur eux ta bonté & misericorde , laquelle
tu as promise deuoir estre perpetuelle enuers tous tes
fideles. Vueilles donc regarder en pitié toutes tes Eglises,
& tous les peuples que tu as maintenãt affligez,
ou par peste,ou par guerre,ou par famine : les personnes
batues de tes verges,soit de maladie,prison ou poureté ,
les consolant tous , selon que tu cognois qu'ils
en ont besoin,& en leur faisant profiter tes chastimens
à leur correction, les confermer en bonne patience &
moderer ta rigueur : & en la fin, en les deliurant, leur
donner pleine matiere de se resiouir en ta bonté , &
benir ton sainct Nom. Singulierement qu'il te plaise
d'auoir l'œil, sur ceux qui trauaillent pour la querelle
de ta verité, tant en general qu'en particulier , pour
les confermer en constance inuincible , les defendre,
leur assister en tout & par tout , renuersant toutes les

pratiques & complots de leurs ennemis & les tiens,tenant
leur rage bridee , les rendant confus en l'audace
qu'ils entreprenent contre toy & les membres de ton
Fils. Et ne permets que la Chrestienté soit du tout desolee,
ne permets que la memoire de ton Nom soit
abolie en terre: ne permets que ceux sur lesquels tu as
voulu ton Nom estre inuoqué perissent: & que les
Turcs,Payens,Papistes, & autres infideles se glorifient
en te blasphemant.

Nous te prions aussi , Pere celeste, pour tous Princes
& Seigneurs tes seruiteurs , ausquels tu as commis le
regime de ta iustice , & singulierement pour les Seigneurs
de ceste cité , qu'il te plaise leur communiquer
ton Esprit seul bon & vrayement principal,iournellement
leur augmente tellement que recognoissans en
vraye foy Iesus Christ ton Fils nostre Seigneur estre le
Roy des rois,& Seigneur sur tous seigneurs,comme tu
luy a donné toute puissance au ciel & en la terre , ils
cerchent de le seruir & exalter son regne en leur domination:
gouvernãt leurs sujets, qui sont les creatures
de tes mains,& brebis de ta pasture,selõ ton bon plaisir:
à fin que tãt ici que part toute la terre,estãs maintenus
en bonne paix,nous te seruions en toute saincteté
& hõnesteté:& estans deliurez de la crainte de nos ennemis,
te puissions rendre loüange en toute nostre vie.

Aussi nous te prions,Pere veritable & Sauueur,pour
tous ceux que tu as ordonnez Pasteurs à tes fideles,&
ausquels tu as commis la charge des ames,& la dispensation
de ton sacré Euangile : que tu les conduises par
ton S.Esprit,à fin qu'ils soyent trouuez fideles & loyaux
Ministres de ta gloire,ayans tousiours ce but, que
toutes les pures ouailles esgarees soyent recueillies
& reduites au Seigneur Iesus Christ , principal Pasteur
& prince des Euesques : à fin que de iour en iour elles
profitent & accroissent en luy à toute iustice & saincteté.
D'autrepart vueilles deliurer toutes tes Eglises
de la gueule des loups rauissans, & de tous mercenaires,
[res.]

qui cerchent leur ambition ou profit, & non point
l'exaltation de ton sainct Nom tant seulement, & le
salut de ton troupeau.

Apres nous te prions,Dieu tres-benin & Pere misericordieux ,
pour tous hommes generalement : que
comme tu veux estre recognu Sauueur de tout le mõde,
en la redemption faite par ton fils Iesus Christ,que
ceux qui sont encore estranges de sa cognoissance , estans
en tenebres & captiuité d'erreur & ignorãce, par
l'illumination de ton S.Esprit,& la predication de ton
Euãgile,soyẽt reduits à la droite voye de salut:qui est
de te cognoistre seul vray Dieu,& celuy que tu as enuoyé
Iesus Christ. Que ceux qu tu as desia visitez par
ta grace,& illuminez par la cognoissance de ta Parole,
croissẽt iournellemẽt en bien, estãs enrichis de tes benedictiõs
spirituelles,à fin que tous ensẽble t'adorions
d'vn cœur & d'vne bouche,& dõnions hõneur & hommage
à ton Christ nostre Maistre, Roy & Legislateur.

Nous le prierons aussi qu'il luy plaise nous augmenter
la foy , dont nous faisons confession de cœur & de
bouche.en disant,
Ie croy en Dieu le pere tout-puissant, createur du ciel &
de la terre. Et en Iesus Christ son seul fils, nostre Seigneur:
qui a esté conçeu du S.Esprit:est nay de la vierge Marie: a
souffert sous Ponce Pilate: a esté crucifié, mort & enseueli:
est descendu és enfers : le troisieme iour est resuscité des
morts:est monté au Ciel:est aßis à la dextre de Dieu le pere
tout puissant , & de là viendra iuger les viuans & les
morts. Ie croy au S.Esprit. Ie croy l'Eglise uniuerselle,la
communion des saincts: la remißion des pechez: la resurrection
de la chair:la vie eternelle. Amen .

Ici le pseaume ordonné se chante,& icelui acheué,le
ministre congediant l'Eglise , adiouste ceste benediction,
prinse des Nomb.6.

Le Seigneur vous benie & vous conserue. Le Seigneur face
luire sa face sur vous, & vous soit propice. Le Seigneur
tourne son visage vers vous , & vous maintiene en bonne
prosperité, Amen .