SERMONS SVR
L'HISTOIRE DE LA
Passion & sepulture de nostre Seigneur Iesus
Christ,descrite par les quatre Euangelistes.

COMBIEN que toute la La satisfaction pour nos pechez, ne doit pas estre restrainte à la mort de Christ.
vie de nostre Seigneur
Iesus Christ, c'est à dire,
cõme parle S. Luc Act.
1.1. tout ce qu'il a fait &
enseigné , à commencer
dés lors qu'il estoit au
vẽtre de la vierge Marie sa mere,ait esté vne
perpetuelle souffrance , & satisfaction pour
nos pechés:ce neantmoins sa mort ayãt esté
le plus rude combat qu'il ait soustenu , & la
closture de son obeissance , comme cela est
expressément noté par l'Apostre Philipp.2.8
& Colos.2.14&15.& ailleurs en tant de passages ,
que nous renuoyent specialement au
sang d'icelui respandu pour nous : il s'ensuit
qu'entre toutes les histoires Euãgeliques ceste-

ci nous est la plus necessaire,cõme aussi
le sainct Esprit a voulu qu'elle ait este tres-
amplement enregistree par tous les quatre
Euangelistes, comme celle qui doit estre entendue
& meditee iour & nuict,voire et tous
moments,par les vrais Chrestiens.

L'vsage & l'abus des ieusnes de deuãt Pasques. Comment & pourquoy on a osté ceste coustume. Voila pourquoy en l'Eglise Chrestienne de
toute ancienneté ce temps mesme de l'annee
auquel nous sommes, a esté cõme dedié
à la declaration d'icelle,& mesmes s'y preparoit-
on par quelques ieusnes & autres exercices
de pieté,dont sont venus ces mots de
Septuagesime , Sexagesime , Quinquagesime,
& de Caresme, selon que les vns s'y addonnoyent
de meilleure heure & plus longtemps
que les autres,cõme l'histoire ancienne
Ecclesiastique nous mõstre. Mais les consciences
estoyent libres en cela,& le tout estoit
conioinct auec la doctrine pure, & sans
superstition,iusques à ce que Satan , nonobstant
l'aduertissemẽt expres de l'Apostre Coloss.
2.18&23. se seruant en partie de l'ambition,
en partie de l'ignorance de quelques Euesques ,
qui sont tantost entrés en l'Eglise
apres le deces des Apostres, comme l'auoit
tant expressément predit Sainct Paul, Actes
20.29. &30.& ont finalemẽt abusé de la simplicité
du pauure peuple destitué de vraye
pasture,a chãgé tout ce qu'il y auoit de bien:
premieremẽt en quelques abus,& finalemẽt
[en vne]

en superstition , voire impieté, entant que
toute la vraye doctrine de la Penitẽce y est
entieremẽt renuersee,& le fruict de la mort
& passion du Seigneur du tout aneanti,auec
vne superstition plus que Pharisaïque. C'est
donc à bon droit que ces grãds personnages
& hõmes de Dieu, suscités de nostre temps
suyuant l'exemple d'Ezechias en ce qu'il fit
du serpẽt d'airain, quoy qu'il eust esté dressé
& conserué auec edification lõg temps par
le vouloir de Dieu, cõme il est escrit au 2.des
Rois. 18. 4. ont raclé tout cela , redressans ,
au lieu de ceste adstriction des consciences à
certains nombres de iours, & à distinctiõ,de
viandes, la doctrine de la penitence Chrestienne,
la sobrieté,le vray ieusne, & sur tout
les fruicts & effects de la mort & passion du
Seigneur. I'ay donc choisi volontiers ceste
histoire à exposer à la maniere accoustumee
de ceste Eglise : mais vn peu plus tost que de
coustume,a fin d'auoir tãt plus de loisir de la
considerer & exposer par le menu:nous estãt
cela plus necessaire que iamais,pour estre fortifiés
& soustenus en ceste tant rude espreuue
de guerre , source d'infinies miseres & calamités,
desquelles il plaist à Dieu nous visiter
par ses paternels iugemens,à nostre grãd
auancement , si nous en sauons faire nostre
profit, selon l'intention du Seigneur,en tous
ses chastimens paternels:mais au contraire à

nostre ruïne, & desolation entiere, si nous ne
pensons de plus pres à nous humilier sous sa
main puissante, au lieu d'abuser d'vne si longue
& plus que tres-patiente patience , accompagnée
de tant de miraculeuses assistances
qui nous a faites depuis vn an, auec
l'estannement , mesmes de ses ennemis &
les nostres.

Comment il nous faut appliquer ceste histoire Or n'est-ce pas tout de faire mention de
la mort & passion du Seigneur,ni de l'appeller
Sauueur & Redempteur:amis il faut que
cela se face cõme il appartiẽt,auec vne intelligence
de ce tres-haut mystere , autant que
Dieu le nous a declaré , penetrant en crainte
& toute reuerence iusques au fond de ce secret
pour en bien sauourer tant l'amertume,
quant à celui qui a souffert ces choses, que
l'innumerable douceur que nous en deuons
tirer pour nous viuifier à iamais. Et di cela expressémẽt,
à fin que nous sachions qu'il nous
faut apporter à la lecture & declaration de
ceste histoire , non par vne simple cõpassion
humaine , de voir le iuste des iustes si cruellement
traitté:ni vne simple detestatiõ des
meschãs pour se colerer cõtre les Iuifs , contre
Iudas , contre Caiphe & Pilate:combien
que ceste histoire ne puisse estre leuë sans
qu'on n'en soit iustement passionné:mais vn
cœur touché iusques au vif du sentiment de
nos fautes que le Seigneur a portees sur le
[bois]

bois auec telles angoisses:vne vraye detestation
& recognoissance de sa vie passee : vn
vray desir d'amendement:vne apprehension
tres-ardente de la hauteur , largeur , & profondeur
de ceste incomprenable dilection de
Dieu , ayant donné son Fils vnique pour nos
pechés.pour vne rãçon si precieuse:& de ceste
incomprehensible bonté du Fils de Dieu,
ayant plus aimé ses ennemis que soy-mesmes ,
iusques à la mort , voire la mort de la
croix: & finalement ce vray & ferme appaisement
de nos consciences , en ayant trouué
nostre paradis au profond mesme des enfers,
iusques ausquels ce grand & seul Sauueur
des hommes s'est abbaissé,pour nous
esleuer auec soy iusques par dessus les cieux.

Et pour paruenir à cela,deuant que d'entrer Cinq poincts prealables ausquels il faut rapporter ceste histoire.
au fil de l'histoire,nous traitterons prealablement
par ordre certains poincts,ausquels
il faut rapporter toute ceste exposition,
à sçauoir:Qui est celui qui souffre : Les
causes qui ont esmeu le Seigneur à nous sauuer
par ce moyen : En quel esgard il est dict
qu'il a souffert : Ce qu'il a souffert pour nous:
& finalement les diuerses fins , qu'il en faut
recueillir.

Quant au premier poinct donq , qui est Iesus Christ est l'unique vray fils de Dieu
le fondement sur lequel il nous faut bastir
tout le reste , suyuãt le dire du Seigneur, Iehan.
17.à sçauoir que la vie eternelle gist en

la cognoissance du Pere, qui est le seul vray
Dieu , & de celui qu'il a enuoyé,à sçauoir Iesus
Christ , & de ce que dit l'Apostre 2.Corinthiens
1.20.à sçauoir que toutes les promesses
de Dieu sont verifiees & fermes en
Iesus Christ:le sõmaire en est que celui,dõt il
est questiõ en toute ceste histoire de ses souffrãces ,
est l'vnique Fils de Dieu , nõmé Iesus
Christ,comme nous le cõfessons au sommaire
de nostre foy, qui s'appelle le Symbole Apostolique.

Ceste verité a esté combatue pieça par quatre blasphemes. Mais ce poinct doit estre d'autãt mieux &
plus clairement exposé qu'estãt de tres-grande
consequence,il a esté de tout temps combatu
par Satan & diuers heretiques , dés le
temps mesmes des Apostres. D'autant donc
que la Deïté est vne essence du tout spirituelle ,
inuisible,bref,du tout infinie,les vns
ne pouuans accorder ce mystere auec leur
entendement humain , & voyans que quelquefois
les Anges,les Magistrats,voire mesmes
les fideles sont appelés enfans de Dieu,
& mesmes qu'Israël est appelé , le Fils aisné
de Dieu , Exod.4.22. ont enseigné que Iesus
Christ estoit appelé Dieu , non pas qu'il fust
Dieu par ceste Deïté essentielle, mais à cause
de son excellence par dessus toutes les autres
creatures. Les autres n'estans en non moindre
erreur , mais se fouruoyans par vn autre
destour,ont dit que Iesus Christ estoit bien
[vray]

vray Dieu essentiellement,mais qu'ainsi que
Dieu & les Anges sont souuent apparus en
diuerses formes,ainsi le Fils de Dieu s'estoit
monstré comme homme en apparence,pour
se rendre plus familier , & non pas qu'il eust
vne nature vrayement & essentiellement
humaine. Et ces deux heresies estant redarguees
par presqu'infinis passages expres tant
du viel que du nouueau Testament , ont esté
pieça condamnees,non pas cõme simples erreurs,
mais cõme renuersantes le fondement
de la foy & de l'esperãce de nostre salut,comme
nous dirons ci apres. Mais Satan ayant esté
dechassé de ces deux costés , n'a pas laissé
d'assaillir ceste verité par deux autres endroits,
ayant suscité ceux qui ont bien confessé
la Deïté & l'Humanité essentielles de
Iesus Christ, mais iointes & vnies ensemble
par vne meslinge,tant des deux essences que
de leurs proprietés naturelles : & d'abondant
ceux qui au lieu de les mesler , les ont
des-vnies,enseignans que la Deïté , sur tout
depuis le Baptesme de Iesus Christ, a assisté
à Iesus Christ hõme, ainsi qu'aux Prophetes
& autres excellentes personnes , mais d'vne
vertu speciale & tres-excellente : à raison
dequoy ce surnom de Dieu lui a esté donné:
lesquelles heresies ont esté pieça conuaincues,
& anathematisees es Conciles generaux,
& vrayement Chrestiens,par la pure
parole de Dieu.

Response au premier blaspheme. Et de faict,l'vn de ces blasphemes estant
posé , le fondemẽt de nostre salut est renuersé
de fond en comble.Car quant à la premiere
de ces heresies blasphematoires & vrayement
enragees , si Iesus Christ n'est autre
chose qu'vne creature , quelque excellente
& diuine qu'on la face,ceux-là seroyent idolatres
qui mettent leur esperance en lui,&
qui l'inuoquent: & ne nous pourroit ni pardonner
nos pechez, ni ressusciter nos corps,
ni nous donner la vie eternelle,estant toutes
ces choses incommunicablement propres à
l'essẽce diuine.Et comment serions-nous baptisés
en son nom aussi biẽ que du Pere & du
sainct Esprit? comment seroit-il appelé Fils
vnique de de Dieu? comment auroit-il esté
dict qu'il estoit desia quand toutes creatures
eurent commencement , Ieh. 1.1? comment
auroit-il fait toutes choses qui ont esté faites,
Ieh.1.3? cõmẽt,s'il n'estoit que creature,
auroit-il peu porter la fureur de Dieu son
Createur sans en estre englouti? comment se
seroit-il ressuscité soy-mesmes? bref, comment
seroit-il nostre Iesus , c'est à dire,Sauueur?

Respõse au second. Et quãt à la seconde heresie , s'il n'a vestu
nostre nature humaine qu'en apparẽce, nous
sommes donc encore redeuables à la malediction
de Dieu,& toutes ses souffrances
n'auront esté qu'illusions, & par consequent
[nostre]

nostre redemption sera toute phantastique
& imaginaire.

Il en faut conclurre autant du troisieme Respõce au troisiesme
blaspheme , par lequel la Deïté est rendue
muable & chãgée & diminuée en soy-mesmes:
& nostre nature humaine est esleuee outre
vne qualité, qui la trãs-formeroit en Deïté,
dont s'ensuyuroit que Iesus Christ ne seroit
ni vray Dieu, ni vray homme,mais vne
tierce essence , composée de la meslinge des
deux.Chose qui le nous rendroit du tout inutile
, comme aussi elle est si monstrueuse &
detestable,qu'elle ne merite pas mesmes d'estre
refutée , quoy qu'elle ait abusé infinies
personnes,ensorcelés par vn mal-heureux
Moine.

Et quant à la quatrieme, si elle estoit veritable Respõse au quatrieme.
il y auroit deux Fils , à sçauoir , vn Fils
de Dieu à part , & vn fils de la vierge Marie à
part,dõt ni l'vn ni l'autre ne nous seroit Sauueur
à part : au lieu que la Deïté ne nous sauue
que moyennant la satisfaction de l'humanité:
& les souffrances de l'humanité ne peuuẽt
auoir la force de nous estre viuifiãtes que
par la Deïté, non point separée, mais coniointe
& vnie de la façon que nous dirons
tantost.

Il faut dõc opposer à toutes ces faussetés Sommaire de la verité opposee aux precedents blasphemes.
ceste seule & pure verité:Que le seul & vnique
Fils de Dieu coeternel & coessẽtiel auec

le Pere & le sainct Esprit , & la seconde personne
entre les trois personnes (qui sont vn
seul & mesme Dieu , non pas diuisées en essence ,
mais distinctes par leurs proprietés
personnelles) ceste vnique personne , di-
ie , du fils de Dieu , selon la volonté de
Dieu son Pere , & par l'operation du sainct
Esprit,au temps ordõné diuinemẽt,& predit
par les Prophetes , s'est vni à nostre nature
humaine, composée d'vn vray corps , formé
de la substance de la vierge Marie, & d'vne
tres pure & tres-saincte ame humaine , tellemẽt
& de si pres, que chacune nature retirãt
son essence & ses proprietés essentielles,
sans aucun meslinge,il est vray Dieu, comme
il estoit,& auec cela vray homme en tout &
par tout semblable à nous horsmis peché:
comme estãt selon le corps tiré & formé de
la substance de la saincte Vierge, & par consequent
vray Dieu & vray homme en vnité
de personne , comme nous en verrons tres-
expres tesmoignages en ceste histoire plus
qu'en nulle autre : pour nous estre fait sapience ,
iustice , sanctification & redẽption,
1.Corinthiens 1.30.Pour reuenir dõc à nostre
question , c'est ce seul Fils de Dieu, à qui appartiennent
ces souffrances , comme à celui
qui a pris nostre chair pour estre nostre pleige
enuers Dieu son Pere,& nostre rançon entiere
en corps et en ame.Et qui sera l'esprit,
[voire]

voire mesme Angelique,qui puisse comprendre,
ni la langue,qui puisse exposer ceste vniõ
personnelle de celui , qui estant en forme de
Dieu sans rapine, c'est à dire vray Dieu essentiel,
se soit ainsi vni à la forme de seruiteur,
c'est à dire,à nostre vrayement & essentiellement
humaine nature, abbaissee iusques à la
mort, voire à la mort de la croix?qui pourra,
di-ie , comprendre comme l'Eternel Fils de
Dieu a voulu se faire en vnité de personne,
fils d'Adam conçeu au ventre d'vne Vierge,
n'y ayant pas encore seize cents ans que l'infini
Createur se fit ainsi vni a la creature:l'inuisible
auec le visible : le Tout-puissant auec
le plus infirme de tous les hõmes:bref la vie
à la mort:mystere plus qu'esmerueillable aux
Anges mesmes & plus que tres-grand,comme
specialement l'appelle l'Apostre 1. Timot.
3.16. & Ephes.3.18. que la chair & le sang
ne nous reuele point, mais le Pere, Matth.16.
17. par le Fils qui est au sein du Pere, Ieh.1.18.
& dont il est venu pour nous annoncer en
personne ce secret Rom.16.25.comme il auoit
promis par la bouche de ses Prophetes dés
le commencement, Luc.1.70.&1.Pier.1.11.&
2.Pier.1.21.

Ie vien maintenant au second poinct mis Les causes qui ont esmeu Dieu à nous sauuer par ce moyẽ & comme
en auãt par moy, à sçauoir aux causes qui ont
esmeu le Pere à nous donner son Fils , le Fils
à mettre iusques à sa propre personne pour

ils les faut mediter pour nostre salut. nous , le sainct Esprit tant à l'operation de ceste incarnation , qu'à nous faire entendre
ceste tant pretieuse verité.Et que puis-ie,ou
doy-ie dire sur cela,sinon que c'est luy-mesmes,
c'est sa sapience incomprehensible, c'est
sa bonté inestimable , c'est l'abysme de ses
misericordes qui a induit le Pere à no9 donner
tel decret , le Fils & le sainct Esprit ,s'y
rengeãs de ceste mesme volonté , comme ils
font vne mesme essence , & inseparables en
leurs operations. Car qu'y auoit-il en l'homme
ni dedans ni dehors,qui peust obliger le
Createur à sa creature , quand mesmes elle
fust demouree en son integrité , attendu que
la conformité qui se trouuoit lors entre Dieu
& son image qui rendoit l'homme agreable à
son Createur entre toutes les creatures d'ici
bas, ne procedoit que de la mesme seule gratuité
qui l'auoit esmeu à le creer & façonner
à son image? Mais l'homme,par sa seule
ingratitude volõtaire,s'estãt tellement desfiguré
qu'au lieu que le Createur ne voyoit
rien en luy qui ne luy fust agreable,n'y a rien
peu voir depuis ce temps la qui ne l'offensast:
qui pourra dire, sans mẽtir,que Dieu ait rien
veu ni preueu en ceste pauure & miserable
creature,qui le deust esmouuoir en sorte
quelconques à luy vouloir bien? ou plustost
qui ne le deust esmouuoir à l'exterminer du
tout?& cõment les tenebres de l'entẽdemẽt
[de l'hom-]

de l'hõme,la peruersité de sa volõté,l'ordure
de ce pauure corps pourroyẽt ils auoir induit
la Lumiere , la Bonté , la Pureté à aimer vne
creature si corrõpue? voire à l'aimer iusques-
là de l'adiondre a soy de si pres, qu'en la personne
de son Fils , par le moyen de ceste tant
admirable vnion dont nous auõs parlé , ceste
humaine nature n'est pas seulement refaite
à l'image de son Createur en toute perfectiõ:
mais il se peut & doit dire que cest homme-
là est deuenu le vray,seul,coessentiel,& coeternel
Fils de Dieu son Pere : & ce non pas
afin que nostre nature en cest homme-là
seul fust esleuée en ceste gloire par dessus
les Anges mesmes,iusques à sa dextre,Philip.
2.9. mais aussi à fin que tous ceux qui seroyẽt
incorporés en icelui pour estre ce corps mystique,
qui s'appelle l'Eglise,dont cestui-là est
le Chef , soyent faits ses coheritiers selon
leur mesure en gloire eternelle, eph.4.16. &
5.30.suyuãt la requeste que luy-mesmes en a
faite, Ieh.17.24. & que l'arrest en sera pronõcé
au dernier iour: Matth.25.34. estant mesmes
pour cela Iesus Christ appelé par l'apostre,le
Fils aisné entre plusieurs freres, Rom.8.28.estãs
assis desia par esperãce es lieux celestes auec
luy, Eph. 2. 6. en attendant que ce que
nous sommes soit du tout apparent. 1. Ieh.3.
2.Que dirons-nous donc ici sur cela,mes freres,
sinon que c'est ici le secret des secrets de

Dieu? ici est ouuerte la plus que tres-haute
hautesse de sa bonté , laquelle seule celui qui
est specialement & à si bon titre appelé le
gardiẽ des hommes,Iob.7.20. 1.Timoth.4.
2. à trouuee en soy-mesmes pour tant aimer
ses ennemis , Rom.6.8. qu'il n'a pas mesme
espargné son propre Fils pour leur salut,
Rom.8.32. Ieh.3.16. voire mesmes iusques à
s'embraser de sa plus ardente & terrible fureur,
en prenant nostre cause contre nos ennemis,
Isa.37.32. & Zach.8.2. oubliant nos
pechés, & se souuenãt de son alliance, Luc.
1.72. par la teneur de laquelle il est dit qu'il
benira ceux qui beniront la saincte race de
Abraham,& maudira ceux qui la maudiront.
Gen.12.3.Et qui a induit l'vnique Fils de Dieu
de vouloir le mesmes pour s'aneãtir, en prenant
forme de seruiteur Philip. 2.7. pour estre
mesprisé & desbouté d'entre les hõmes,
nauré pour nos forfaicts,froissé pour nos iniquités,
& faire venir sur soy l'iniquité de
nous tous, Esa.53.3. & versets suyuans? qui l'a,
di-ie,fait s'abbaisser iusques à estre en ceste
chair qu'il a prise pour nous , plustost vn ver
qu'vn homme, Psea.22.7? voire iusques à estre
fait malediction pour nous Galat.3.12.sinon
la mesme volonté de Dieu son Pere , & ceste
inenarrable dilection enuers ceux là mesmes
qui le crucifioyent? Luc.23.3? qui la esmeu à
si grãde compassion sur le pauure peuple destitué
[stitué]

de Pasteur,Matt.9.36.& sur la ville de
Ierusalem,ne recognoissant le temps de sa visitation
Luc.19.44? Et quelle autre cause
aussi peut auoir induit le sainct Esprit,par lequel
le Pere & le Fils comme par leur coëssencielle
& coëternelle puissance ont executé
ce secret , à estre nostre regenerateur Ieh.
3.6. nostre docteur Ieh.16.13. & consolateur
Ieh.14.&15.&16. iusques à nous mettre au
cœur ce qu'il nous faut demander par souspirs
inenarrables, Rom.8.25. & à nous faire
crier à plene bouche,Abba,c'est à dire Pere.
Galat.4.6? C'est donc en somme la seule infinie
gratuité de Dieu,dõt est procedée nostre
redemption.Mais quel en a esté l'obiect?nostre
misere ayant esmeu sa misericorde. Et
comment cela, veu que toute nostre misere
procede du peché, qui est l'obiect de la iuste
fureur de Dieu? C'a esté d'autant qu'il luy a
pleu,monstrant en cela vne plus qu'incomprehẽsible
sapience, de considerer en nous
nostre plus que pauure & miserable estat, &
non point la cause d'iceluy, à sçauoir nos pechés
& nos iniquités,lesquelles il a voulu en
toute rigueur & seuerité chastier en nostre
pleige & respondant,lequel seul s'est trouué
assez fort pour porter ce fardeau , sans demourer
sous le faix,cõme estãt non seulemẽt
homme , mais aussi vray Dieu & tout-puissant.
A parler donc propremẽt,mes freres,ce

n'a point tant esté ni Satan,ni Iudas, ni Caïphe,
ni les Iuifs, ni Pilate, ni les bourreaux,
qui ont crucifié celuy qui de vengeur s'est
fait Sauueur : mais ce sommes nous , nous,
di-ie,mes freres qui l'auons apres tant d'autres
souffrances fait lier & garrotter , condamner
pour blasphemateur , & coulpable
de lese maiesté diuine & humaine,mocquer,
souffletter,foitter,crucifier , percer , entrer
en la mort , la plus cruelle & ignominieuse,
& mesmes maudite de Dieu en la Loy, Deut.
21.23. & Galat.3.13. voire poussé iusques en la
cauerne du sepulchre. Nous condamnõs bien
donc Satan,& tous ceux desquels il s'est serui
en vne si execrable meschanceté , dont ils
porteront le cõble de la peine,quand ils verront
sur son throne de gloire celuy qu'ils ont
percé,Zach.12.10.&Ieh.19.37.Mais c'est contre
nous que nous-nous deuons despiter:sont
nos pechés & nos iniquités que nous deuõs
detester : c'est nostre ingratitude , rebellion
& endurcissement que nous deuons apprendre
à cognoistre telles qu'elles sont,pour no9
abbaisser iusques aux enfers , en ayant honte
de nous-mesmes, en nous contemplant en
ce crucifié , & non pas en ce faux masque de
tresfaux plaisir , duquel le peché nous abuse
& ensorcelle.Et s'il y a auiourd'huy peuple
au monde qui ait besoin de ceste doctrine
& de penser à soy de pres,gemir & souspirer
[& de-]

& demander à Dieu maintenant ou iamais
ce cœur brisé & froissé , qui est le premier
poinct de vraye repentance , Psea.51.19: c'est
à nous, à nous, di-ie, peuple de Geneue, d'y
penser tres-viuement. Car à qui pourroit
mieux appartenir qu'à nous ceste tant lamentable
complainte du Seigneur par son
Prophete Mich.6.3? Mon peuple , que t'ay-ie
fait,& en quoy t'ay-ie trauaillé? respon-moy.
Car de quelle seruitude d'Egypte, auõs-nous
esté deliurés? quels Moyses & quels Aarons
nous ont esté enuoyés de Dieu ? de quelle
paillardise d'Egypte sommes-nous sortis?
quelle mer rouge de persecutions auõs-nous
passée?nous,di-ie,qui auõs esté tirés & conduits
par la main de Dieu, des bordeaux de
tant de nations,non point en vn desert, mais
tout droit en vne terre de Gosen , affluente
de ses vrayes delices , & là où mesmes nous
auons esté & sommes corporellement nourris
par trop delicatement? Et cependant que
peut trouuer le Seigneur en ceste vigne tant
bien cultiuee,sinon des lãbrusches,& fruicts
tresamers , maintenant que le Seigneur , apres
auoir tant attendu nous fait bien entendre,
si nous auons des aureilles,qu'il y est
venu vendanger , non point si nous ne pensons
à nous de plus pres auec le serpillon,qui
cueille les bons raisins, pour en faire de bon
vin , mais auec l'espee , laquelle tenant en sa

main flamboyante , & la nous faisant voir,
non point de loin, comme par ci deuant,
mais iusques deuant nos murailles , sommes
nous si sourds que nous ne l'oyons point encores
prononcer ce qu'il a predit,& finalemẽt
executé en sa ville ancienne, disant, Isa.
5.3. & vers. suyuans,Habitans de Ierusalem,&
vous hõmes de Iuda,iugez,ie vous prie,entre
moy & ma vigne.Qui auoit-il plus à faire à
ma vigne , que ie ne luy aye fait ? pourquoy
ay-ie attendu qu'elle produisist des
raisins , & qu'elle a produit des grappes sauuages ?
maintenant donc que ie vous face entendre,
ie vous prie , ce que ie m'en vay faire
à ma vigne. I'osteray sa closture & elle sera
broutee:ie despeceray sa cloison , & elle sera
foulée,& la reduiray en desert,tellement
qu'elle ne sera plus taillée,ni foussoyée,& les
rõces & espines y monteront , & commanderay
aux nuées qu'elles ne facent plus tomber
de pluye sur elle.Confessons donc, mes
freres , confessons que les sangliers sont entrés
par nostre faute en ceste vigne, Pse.80.
14.& disons,O Dieu des armees retourne,ie
te prie,regarde des cieux,& voy,& visite ceste
vigne. Et quels sont ses sangliers? l'auarice,
la desfiance,la gourmandise , la paillardise,
la desloyauté, l'iniustice , la fierté , le
meurtre , bref,tous les fruicts de la chair,qui
sont recités, Galat.5.19.&vers.suyuans. quoy
[que]

que le Seigneur admoneste , crie, chastie , &
toutesfois en telle douceur,iusques ici que la
misericorde , voire miraculeuse , a surmonté
le iugement. Quand auons nous donc assez
crucifié nostre Seigneur Iesus Christ? quand
considererõs-nous que dira de nous vne grãde
partie du monde, que ie puis dire auoir sa
veuë iettée sur vne ville de Geneue? & si les
hommes , & nostre propre cœur nous condãnent,
que fera celuy qui est assis sur le throne,
& trop plus grand que nostre cœur , 1.
Ieh.3.20.& qui a desia comme ouuert a bouche
pour donner son arrest , n'ayant pas
seulement attendu trois ou quatre ans a receuoir
le fruict de ce figuier, Luc.13.7? quand,
di-ie , aurons-nous honte & pitié de nous-
mesmes? quand honorerons-nous celuy qui
nous a tant aimés , & reuerons-nous celuy
deuant la Maiesté duquel les Anges mesmes
couurent leur face? Dieu vueille , mes
freres, que ce soit dés maintenant , sans attendre
que l'huis nous estant clos, comme
nous fermons les aureilles aux remonstrances
de nostre Dieu , quoy que tant de miracles
ayent esté faits parmi nous , il ne nous
soit respondu comme il est escrit Matth.7.23.
Ie ne vous cognoy point, despartez vous de
moy,vous qui faites le mestier d'iniquité.
Le Seigneur Dieu nous en vueille garder par
sa tresgrande, voire infinie misericorde , &

nous face plustost la grace par le moyẽ , d'vn
bon & vray amendement , de voir l'obligation
de nos pechés , rayee & bissee en la
croix du Seigneur , & l'ẽtiere quittance d'iceux
escrite de son propre sang, à la gloire
de son sainct Nom , & consolation de tous
ses pauures enfans.