LA PREMIERE HOMELIE
sur le cinquantetroisiesme chapitre de la
prophetie d'Esaie, vers.1.

Qui est-ce qui a creu à nostre predication?

QVAND l'Apostre S. Paul dit au 2.
chap.de la 1.aux Corint. au 2. vers.
Qu'il ne veut sçauoir autre chose
que Christ, & icelui crucifié , il
nous enseigne , que la parfaite , &
entiere cognoissance de toute la
Philosophie celeste, que les Chrestiens
appellent Theologie, consiste
en la cognoissance de Christ crucifié,c'estadire,comme
le mesme Apostre interprete, mort pour nos pechez,
& resuscité pour nostre iustification:dautant que
toute la cognoissãce que nous pouuõs auoir de Christ,
ne nous apporte aucun prouffit , sans la mort & resurrection
d'icelui. La cognoissance , & apprehension de
Christ, nous est alors vtile & prouffitable, quand nous
le cognoissons, & embrassons par vne vraye & viue foi,
pour nostre Sauueur, & Redempteur : lequel ayant par
sa mort appaisé l'ire de Dieu, & nous ayant reconciliez
à lui par l'effusion de son sang , nous a deliurez de la
mort, & obtenu vie eternelle. Voila pourquoi,quand
nous parlons du moyen de nostre salut , nous le constituons
en ceste seule mort de Christ;sous laquelle neantmoins ,
nous ne laissons pas de comprendre l'obeïssance
entiere , & parfaite , que Christ a rendu à Dieu son
Pere , en toute sa vie ; & aussi sa resurrection , laquelle
a suiui sa mort. Mais pource que la mort qu'il a enduré,
a esté comme le comble, & la perfection de son obeissance,

par laquelle il faloit que nostre desobeissance fust
satisfaite , ainsi que l'Apostre monstre , tant au 4. des
Rom. 19. vers. qu'au 2. des Philip.8.vers. disant, qu'il s'est
rendu obeissant iusques à la mort de la croix: voila
pourquoi , venans iusques au souuerain degré de ceste
obeissance, par laquelle salut nous est aquis, nostre foi
se repose sur ceste mort , laquelle l'Esprit de Dieu nous
propose pour le seul repos de nos ames , & de nos consciences:
pource aussi que c'est le seul, & vnique moyen,
par lequel Dieu a esté satisfait , & payé de l'obligation
de mort , par laquelle nous estions redeuables à son iugement.
L'Escriture saincte,& sur tout le nouueau Testamẽt,
nous enseigne plusieurs autres choses de Christ;
mais cependant, dautant que l'accomplissement du salut
gist en cela,finalement, l'Esprit de Dieu, par la bouche
des Euangelistes, & Apostres,qui ont esté specialement
designez , & ordonnez tesmoings de ces choses,
nous ramene la. Or combien que cest office, & charge,
leur ait esté particulierement donnee par Christ , &
qu'ils s'y soyent aussi fidelement employez , toutesfois,
pource qu'Esaye a parlé si clairement, & ouuertement,
non seulement de la naissance , & du regne de Christ,
mais aussi de sa mort, & de sa resurrection,&, specialement,
en ce cinquante & troisieme chapitre de sa Prophetie,
que nul des Euangelistes ne l'a surpassé en cela;
&, que, pour ceste occasion , il a aussi bien acquis nom
d'Euangeliste que de Prophete:voila pourquoi, si nous
voulons estre instruits , & enseignez de ce qui appartient
a la mort , & resurrection de Christ , il faut que
nous lisions , & considerions soigneusement , ce qui est
escrit par le Prophete en ce passage:auquel il declare la
condition du regne de Christ;l'Estat de sa personne,telle
qu'elle est venue,& a esté en ce monde:Sa petitesse,&
son abiection,& les causes pourquoi il a esté ainsi vil,&
contemptible : Ses souffrances , passions, & mort, auec
les causes pour lesquelles il l'a souffert , & enduré : Les
biens , & les fruicts excellens qui en sont prouenus , &
[desq]

desquels nous sommes faits participans : bref , sa resurrection,
son exaltation, & l'excellence de sa victoire par
dessus tous ses ennemis : qui sont en somme toutes les
choses que nous deuons cognoistre de Christ,& apprehender
en lui, par vne vraye, & viue foi , pour obtenir
salut. Ce n'a point esté sans vne prouidence admirable
de Dieu,que l'eunuque de Candacé fut trouué par Philippe
sur ce passage,lesquel seruit d'argument,& de matiere
excellente,pour lui enseigner Christ. Dauantage,
il n'y a passage en l'Escriture , qui nous serue plus pour
adoucir, & oster le scandale,que la croix de Christ nous
apporte. Or,pour le bien entendre,il ne le faut pas passer
legerement,mais il faut diligemment, & soigneusement
esplucher, mascher, & ruminer, toutes les belles,
& excellentes doctrines lesquelles y sont contenues ; &
obseruer aussi l'art,& la methode,que tient le Prophete
à les proposer. Car,comme ce Prophete est,entre tous
les autres,iugé,& estimé eloquent,aussi semble il,qu'en
ce passage surtout,pour ce qu'il traite de la substãce du
salut des hommes , il se soit estudié d'enrichir les choses
( quoi que d'elles mesmes elles le soyent assez ) par vn
artifice,& vne eloquence merueilleuse:laquelle,si on ne
considere , il est certain , qu'on perdra beaucoup de la
substance de ce passage, & n'en rapportera-on, par maniere
de dire,qu'vn corps sans ame. Apres que le Prophete
a declaré au 13. vers. du chap. precedent , qu'au
faict de la deliurance du peuple , le seruiteur de Dieu se
porteroit heureusement , & seroit exalté, & esleué fort
haut,il commence, des le 14. vers. suiuant, à parler de la
matiere , laquelle il traite en ce chap. c'estassauoir , de
l'abiection , & aneantissement de ce Seruiteur , disant,
que plusieurs s'estoyent esbahis de ce qu'il estoit ainsi
defait de visage plus que nul,& deformé par dessus tous
les enfans des hommes.Or combien que les paroles du
Prophete,en ce 13.vers.se peuuent,premierement,& aucunement,
rapporter à Cyrus, par lequel le peuple a esté
deliuré de la captiuité de Babylone , toutefois, dautant

qu'il n'est pas seulement parlé la d'vne simple deliurance
de ceste captiuité , mais d'vne beaucoup plus
grande,assauoir de la deliurance mise en auant par Zacharie
en son Cantique,laquelle deuoit estre faite par
le Messias , il faut que nous rapportions les paroles du
Prophete au Christ promis en la Loi , & es Prophetes.
Comme aussi il y a plusieurs choses en ce chapitre , lesquelles,
quoi que les Iuifs gazouillent,ne se peuuent atribuer
a Cyrus,ni autres quelconques,fors qu'a Christ:
comme quand il est dit, qu'il a esté nauré pour nos forfaicts,
& que la correction de nostre paix est sur lui,qu'il
n'a point fait d'iniquité, & qu'il ne s'est point trouué
de fraude en sa bouche. Nous tenons donc pour tout
certain,& resolu, comme aussi nul des Chrestiens ne le
reuoque en doute , que le Prophete traitte & parle du
Christ en ce chapitre. Cependant,dautant que la description
qu'il en fait, est merueilleusement estrange, &
semble du tout contraire à la nature & condition de ce
qu'il veut proposer, voire mesme contraire à ce qu'il auoit
dit en ce 13.vers.du chap. precedent,de l'exaltation
& esleuement de ce Seruiteur , tellement qu'il sembleroit
qu'en ce cinquante troisiesme chap. il parlast d'vn
autre Seruiteur que de celui duquel il a parlé au 13.vers.
du chap. precedent , combien que toutefois il ne parle
que du mesme , mais consideré selon la diuersité des
temps:voila pourquoi il s'escrie des l'entree de ce chap.
Qui est ce qui a creu,& qui croira à nostre predication?
comme s'il vouloit dire, Nous enseignons vne chose
laquelle les hommes ne croiront point , assauoir , que
cestui-la , lequel nous est promis pour Roy, & Liberateur,
doit estre vil, contemptible, & reietté;sans forme,
beauté,ni figure quelconque. y a il chose plus contraire
à la nature , & condition d'vn Roy que cela? comme
sont aussi toutes les autres circonstances , desquelles le
Prophete orne le Christ en ce chapitre , & pour raison
desquelles, comme dit S.Paul la 1.des Corinth. au 1.
chap.23.vers.il a esté folie aux Gentils, & scandale aux
[Iuifs]

Iuifs. Le Prophete,donques,par ceste exclamation declare
ce qui doit aduenir touchant nostre Seigneur Iesus
Christ, c'estassauoir, que ce qu'il en presche, & enseigne,
ne sera point receu , ou pour le moins de bien
peu de personnes : que le Christ venant sera reietté , &
ne sera pas aduoué pour tel qu'il se propose, assauoir,
Sauueur, & Liberateur: & preuient , par ce moyen, le
scandale qui pourra reussir d'vne telle reiection. Il est
vrai que la sentence du Prophete passe bien plus loin;
dautant quelle s'estend en general à toute la doctrine
preschee par lui , & taxe l'incredulité du peuple de son
temps,comme s'il eust voulu dire,Il y a long temps que
nous preschons,mais cependant, qui est-ce qui a creu à
nostre predication? Ce n'est pas que nous n'ayons fait
nostre deuoir, & que la matiere que nous auons presché
ne merite d'estre entendue, mais cela procede de la dureté,
obstination , & incredulité du peuple : comme il
est certain , qu'Esaye n'auoit pas esté lasche en sa charge,
ains auoit employé toute la diligence,requise & necessaire
pour la fidele execution d'icelle; & cependant,
il voit si peu de fruict de tout son trauail , qu'il s'escrie,
que nul n'a receu sa predicatiõ.Il estoit Prophete,voire
excellent entre les autres, tant en race, qu'en eloquence:
sa vocation confermee, & verifiee par vne vision notable,
comme elle est descrite au 6.chap. de sa Prophetie;
& en laquelle il a continué l'espace de soixante ans,
& dauantage. Qui est ce donc, qui ne dira qu'il a eu vne
iuste occasion de reprendre, & taxer ainsi aigrement
ceste infidelité?Et qui est-ce d'entre nous qui ne la condamnera?
Au reste, le Prophete parlant par l'Esprit de
prophetie,n'a point voulu seulement taxer l'incredulité
de son temps ; mais preuoyant que ceste incredulité
continueroit, a aussi voulu laisser en main des autres
Prophetes & seruiteurs de Dieu , qui suiuroyent apres
lui, & seroyent ses successeurs, non seulement en charge,
ains aussi en l'espreuue,& experience d'vne telle rebellion,
& incredulité,ceste vehemente & aspre censure ;

afin que par icelle ils peussent foudroyer sur la teste
des incredules : comme nous voyons que nostre Seigneur
Iesus s'en est serui,pour reprẽdre l'incredulité de
son temps,ainsi qu'il est escrit au 12.chap.de l'Euangile
selon S.Iean vers.38. Et l'Apostre S.Paul aussi,comme
il est escrit au 10.des Rom..Et dautant que nous voyons
encores au iourdhui que le monde continue en ceste
incredulité, & rebellion, nous auons iuste matiere d'vser
de ceste reprehension. Il est vray qu'on dira , que
nous ne sommes pas Esaye,Christ,ni S.Paul,& qu'il ne
se faut point estonner, si eux, estans si grands, & si excellens
personnages , & proposans au monde vne doctrine
si excellente,on eu iuste occasion de reprendre si
aigrement l'incredulité. Il n'y en a pas vn aussi de ceux
de ce temps,qui ne face le proces, & ne condamne l'infidelité
des Iuifs ; comme il ne faut point douter que
ceux qui ont esté du temps de Christ , n'ayent taxé , &
condamné ceux qui ont esté repris par Esaye , ainsi que
nostre Seigneur Iesus leur reproche au 26.chapitre de
S.Math. Vous dites,si nous eussions esté aux iours de
nos peres,nous n'eussions pas esté leur compagnons au
sang des Prophetes ; mais, cependant , tout ainsi qu'ils
ont continué en la cruauté de leurs peres, voire mesme,
comme dit Christ, en ont empli la mesure,encore qu'ils
les condemnassent , aussi le monde d'auiourdhui continue
en l'infidelité reprise par Esaye, & par Christ, &
condamnee par eux mesmes. Ie confesse que nous ne
sommes pas Esaye, Christ, ne S.Paul, & que nous sommes
merueilleusement eslongnez de leur excellence;
aussi ne reprenons nous pas le monde de ce qu'il ne
croit à nous,encore que nous vsions du mot , duquel le
Prophete a vsé, Nostre predication;mais de ce qu'il ne
croit pas à la doctrine d'Esaye, de Christ, & de S.Paul,
preschee par nous. Et de fait,pensons nous qu'Esaye vsant
de ce mot de, Nostre,eust osé taxer, & condamner
l'incredulité du peuple , si la doctrine qu'il proposoit
eust esté sienne? Et pensons nous mesmes que le peuple,
[leq]

lequel il reprend , ne se soit pas defendu par cest argument
contre sa reprehension ? Tu nous taxes de ce que
nous n'auons pas creu à ta predication ; ce sont choses
forgees par toi, & inuentees en ta teste : & quand nous
ne t'aurions pas creu , est-ce a dire pourtant que nous
n'ayons pas creu à Dieu? Il ne faut point aussi douter,
que ceux qui on testé repris par Christ, ne lui ayent dit
le semblable , lors qu'il alleguoit la reprehension d'Esaye
contre eux, Tu n'es pas Esaye; & que S.Paul n'ait
esté batu de mesmes raisons, Tu n'es pas Esaye , ni le
Christ.Et cependant,a ce esté sans cause que le Prophete
voyant le mespris , & la reiection de la doctrine par
lui preschee, l'a si asprement reprise , & a si seuerement
condamné vne telle incredulité?A ce esté pource qu'elle
s'adressoit à lui? Nenni certes ; mais ç'a esté , pource
que la doctrine qu'il preschoit estoit la doctrine de
Dieu : laquelle il appelloit neanmoins sienne , à cause
qu'il en estoit le porteur,& prescheur. Christ mesmes,
parlant de la doctrine qu'il preschoit , en dit autant en
S.Iean 7.chap.16.vers. Ce n'est point ma doctrine(parlant
comme homme) mais c'est la doctrine de mon Pere,
qui m'a enuoyé. Et a peu aussi respondre à ceux qui
lui pouuoyent obiecter qu'il n'estoit pas Esaye, & que,
partant, il ne leur deuoit pas faire la reproche qu'Esaye
a fait à ceux de son temps, qu'il n'annõçoit pas vne autre
doctrine que celle qu'Esaye auoit presché, & qu'à
ceste occasion,il pouuoit à bon droit reprendre l'incredulité
de son temps , comme auoit fait Esaye du sien,
veu que c'estoit vne mesme doctrine,reietee par les vns
& par les autres. S.Paul en a peu faire autant;& nous
aussi auiourdhui , preschans & annonçans la doctrine
iadis preschee par Esaye, par Christ & par S.Paul, encores
que nous ne soyons Esaye, ne Christ, ne S. Paul,
pouuons iustement reprendre , & condamner l'incredulité
du monde ; non point pource qu'il ne croit pas à
nous , mais pource qu'il ne croit pas à la doctrine de
Dieu,iadis preschee par Esaye, & par les Prophetes, &

puis par nostre Seigneur Iesus, & ses Apostres; &,finalement,
par nous en ces derniers temps : voire,dautant
plus courageusement,& asprement,pouuons-nous crier
contre ceste incredulité, que nous la voyons, non
seulement continuer, mais aussi accroistre, & augmenter
de plus en plus. Au demeurant,il faut bien noter la
maniere de parler du Prophete. Il ne dit pas simplement,
Qui est-ce qui a ouy nostre predication? mais,
qui est-ce qui a creu à nostre predication ? Car on lui
eust peu respondre incontinent , Tout le peuple a ouy
tes predications,dequoi te pleins-tu? Ne nous sommes
nous pas trouuez au temple, ou es autres endroits ou
tu les a fait? Penses-tu que nous ayons esté sourds, &
que nous ne t'ayons pas ouy quand tu as parlé? Mais le
Prohete,par ces mots desquels il vse,leur monstre,que
combien qu'ils ayent ouy,neantmoins ils n'ont point
creu,& qu'à ceste occasion leur faute est plus grande.Ie
ne doute point aussi, que quand auiourdhui nous voudrons
vser de ceste aspre reprehension du Prophete , il
ne semble a plusieurs que nous sommes hors du sens, &
que nous nous pleignons à tort;car ils diront, N'allons
nous pas au temple?N'oyons nous pas les predications?
De quelle incredulité nous accuse-on? Pensons-nous
que ceux de Ierusalem,qu'Esaye reprend si aigrement,
n'ayent pas esté au temple? Et neantmoins il ne laisse
pas de les reprendre ; non pas de ce qu'ils n'ont point
ouy,mais de ce qu'ils n'ont point creu. Et de fait, il y a
bien difference entre Ouyr,& Croire. Plusieurs oyent,
mais tous ne croyent pas. L'ouye est vn instrument par
le moyen duquel la foy est formee,comme dit l'Apostre
au 10. chap. des Rom. vers.17. La foy vient de l'ouye;
mais cela s'entend aux fideles ; & n'est pas à dire que
tous ceux qui oyent,croyent pourtant. C'est l'argumẽt
que traitte l'Apostre au 10.chap.des Rom.& par lequel
il conuainc & condamne dauantage l'incredulité des
Iuifs,de ce qu'ayans ouy,ils n'ont point creu.Nous voyons
en la Loy,qu'Ouir & Garder,Ouir & Obeir sont
[ord]

ordinairement conioints ensemble. Voila pourquoi
Christ respondit excellemment , sur ce propos , à ceste
poure femme qui lui disoit , que bien-heureuses estoy-
les mammelles qu'il auoit succé , mais plustost bien
heureux sont ceux qui oyent la parole de Dieu , & qui
la gardent,comme il est escrit en S.Luc 11.28.ver.Christ
aussi parlant de ses brebis , en S.Iean 10.chap. 27. vers.
dit,quelles n'oyent pas seulement sa voix,mais qu'elles
le suiuent. Et c'est aussi pourquoi S.Iaques nous commande
au 1.chap. de son epist.Cathol.vers.25, de n'estre
point auditeurs oublieux ; lesquels il compare à ceux
qui se mirent en vn miroer, & s'en estans allez, ont incontinent
oublié ce qu'ils estoyent. Ce n'est donc pas
assez d'ouir , mais il faut croire , cest a dire , il faut mascher,
& aualer ce qu'on oyt. Tout ainsi que ce n'est pas
assez qu'vne viande entre en la bouche, mais il faut que
elle descende en l'estomach, & qu'elle soit la cuitte, &
digeree, pour estre par apres portee au foye,& de la respandue
par tout le corps ; aussi faut il que la parole estant
entree par l'ouye en l'entendement, soit digeree
la dedans , pour estre par apres portee au cœur , & y
prendre sa racine,afin de produire ses fruicts. Ceux-la
donc croyent, non pas qui oyent simplement auec les
oreilles charnelles , mais qui par vne vraye & viue foy
embrassent la parole preschee, & y rendent obeissance.
Et d'autant que nous ne voyons point ceste obeissance,
ains au contraire , que le monde demeure tousiours en
la corruption , & peruersité de sa nature , en son ignorance,
& superstition ; & chemine tousiours en ses voyes,
sans s'amender, & corriger, voila pourquoi, ayant
premierement esgard au petit nombre de ceux qui oyent,
les comparant auec ceux qui ne veulent point
ouir, les comparant auec ceux qui ne veulent point
ouir,& puis au nombre de ceux qui en oyant ne croyent
point,c'estadire,qui n'embrassẽt point ceste parole par
foy, & n'y rendent point d'obeissance,nous crions auec
Esaye,Qui est-ce qui a creu à nostre predication?

Dauantage, les mots, desquels vse le Prophete en sa

langue, monstrent combien est detestable ceste incredulité,
Qui est-ce qui a creu a ce qu'en preschant nous
auons fait ouir,& ce qui merite aussi d'estre ouy,& entendu
des hommes? Car voila deux circonstances lesquelles
on peut recueillir de ses paroles, & lesquelles ne
doiuent pas estre legerement passees. Par l'vne,il monstre
la diligence de laquelle il a vsé en l'execution de sa
charge; & par l'autre, la dignité de la chose qu'il a proposée.
comme nous voyons aussi,que par le tesmoignage
que l'Escriture lui rend,il a esté fort fidele executeur
de sa commission , & quelqu'empeschement qui lui ait
esté mis au deuant,il les a tous surmontez & a perseueré,
comme nous auons touché si dessus,l'espace de plus
de soixante ans à prescher. Il s'est donc bien fait ouir.
Voila pourquoi aussi nostre Seigneur Iesus,par ce mesme
argument , aggraue l'incredulité du peuple de son
temps,en disant, comme il est escrit en S.Math.23.chap.
37.vers. Ierusalem,Ierusalem,combien de fois t'ay-ie
voulu rassembler comme la poule fait les poulets sous
son aisle,& tu n'a point voulu?L'Apostre S.Paul aussi,
par toutes ses epistres,monstre la diligence,& fidelité,
de laquelle il a vsé en l'execution de sa charge. & aux
Actes 13.chap.il tesmoigne aux Iuifs qu'il s'est fidelement
aquitté de leur annoncer la parole de salut ; mais
que ne l'ayãt point voulu receuoir,il les a quittez pour
s'en aller aux Gentils. Et de faict, c'est vne chose,laquelle
condamne merueilleusement l'incredulité des
hommes auiourdhui. Le Seigneur enuoye ses pasteurs,
lesquels iournellement annoncent, & font ouir ceste
parole ; mais quelque deuoir qu'ils facent , les hommes
ne veulent point ouir,& encore moins croire. S'il n'y auoit
point de prescheurs, ou si les prescheurs ne se faisoyent
pas ouir, les hommes s'excuseroyent ; combien que
mesmes ils ne seroyent pas excusez par ce moyen. Car,
tant les creatures qui sont au ciel, & en la terre, & lesquelles
comme dit Dauid au Pseau.19. annoncent la
gloire de Dieu,comme aussi la Loy naturelle imprimee
[au]

au cœur des hommes,les rendront sans excuse, & ferõt
que leur incredulité sera punie;de ce qu'ayans cogneu,
ou deu cognoistre ce qui est de Dieu,ils ne l'ont pas serui
comme Dieu.Combien plus donc serõt punis ceux,
au milieu desquels le Seigneur a fait retentir , & resonner
sa parole, & qui ce pendant n'y ont point creu , &
n'y croyent point, c'estadire, n'y obeissent pas, & ne la
suiuent pas?Pensons nous que Dieu ne venge merueilleusement
vn tel mespris de sa grace?Nous voyons tant
de peuples qui en sont priuez, & ausquels Dieu n'enuoye
nuls pasteurs , au milieu desquels sa voix n'est aucunement
entendue ; & nous, aux oreilles desquels elle
resonne tous les iours , la foulons aux pieds par nostre
incredulité;laquelle est dautant plus à condamner,que
ceste parole se fait continuellement ouir,& qu'elle nous
remonstre,& reprend nostre incredulité. Voila comment
ceste continuelle repetition de la voix de Dieu,
qui nous est publiee par ses seruiteurs,monstre dautant
plus la grandeur , & l'enormité de nostre incredulité.
Secondement, il y a l'autre circonstance, assauoir,la dignité
de ceste parole , qui fait qu'elle merite d'estre ouye,
& entendue des hommes. Si c'estoit chose qui ne
meritast pas d'estre creue, ce seroit en vain qu'on allegueroit
la continuelle,& frequente publication.Car vn
mensonge, ou vne chose profane,& meschante, ne merite
pas d'estre mieux receue pource qu'elle est souuent
proposee , mais au contraire , tant plus eux qui la publient,
s'opiniastrent à la publier, & tant plus ceux ausquels
elle est publiee,se doiuent-ils opiniastrer à fermer
les oreilles,& à la reietter,& ce, dautant qu'elle ne vaut
rien. Mais quand il est question d'vne chose bonne,qui
apporte quelque prouffit, & vtilité à l'homme, & sur
tout qui est pour la gloire de Dieu, il faut que les hommes
ouurent incontinent les oreilles pour l'ouir. Si on
nous veux dire quelque chose pour nostre prouffit,
nous ne sommes pas paresseux, mais nous courons incontinent,
& laissons toute besoigne pour l'entendre,

nous ouurons attentiuement les oreilles.y a il chose qui
nous apporte vn plus grand prouffit que la declaration
de la bonne volonté de Dieu qui nous est faite par la
predication? Qu'est-ce de toutes les choses du monde,
& quel contentement nous peuuent elles donner;voire
mesmes quand nous les aurions,peuuent elles apporter
paix, & repos,en nos consciences? Il est certain que non.
Et sans ce repos, qu'est-ce que de nous? Il n'y a chose
qui nous puisse donner ce repos que ceste parole. Et
partant il n'y a chose qui merite mieux d'estre ouye. Et
ce pendant , le malheur des hommes est si grand , qu'il
n'y a chose qu'ils veuillent moins ouir. Nous voyons
comment la plus grande partie du monde se bouche
les oreilles de propos deliberé de peur de l'ouir , & voyons
comment ils persequutent ceux qui la veulent
ouir. Nous voyons aussi comment ceux,au milieu desquels
elle est publiee,sont paresseux,& lasches à l'ouir,
il ne faut qu'vne paille pour nous retenir , tant nostre
zele est lasche & froid. Les bancs & les pierres l'oyent,
& seruiront de iugement , & de condemnation contre
les hommes.Sçaurions nous mieux monstrer nostre incredulité,
& que nous n'auons encores aucunement
gousté, ni sauouré la douceur de ce message de salut, ni
sa dignité?Si nous regardõs à l'autheur de ceste nouuelle,
c'est Dieu. Qui est ce qui merite mieux d'estre ouy
que Dieu?Dauantage,le bien qu'elle nous apporte;c'est
nostre salut, c'est la vie eternelle. Qu'est-ce de toutes
les richesses que ce monde au prix de cela? Voila , donc,
comment ayant esgard à la dignité de ceste parole,nous
la deuons ouir : & Dieu punira plus rigoureusement
nostre incredulité , à cause de la dignité , & excellence
d'icelle.Au reste,ce passage est merueilleusemẽt propre
pour respondre à ceux qui accusent la doctrine que
nous preschons, & qui la veulent blasmer, & denigrer,
pour ceste occasion qu'il y en a bien peu qui la reçoiuent;
& disent, que si c'estoit vne doctrine celeste,comme
nous publions, Dieu l'authoriseroit, & feroit receuoir,
[uoir]

car il ne manque point de puissance. Or,ie leur
demande, si la doctrine preschee par Esaye, par Christ,
& par S. Paul, n'est pas auouee par eux pour doctrine
celeste?Ie croy qu'ils ne l'oseroyent nier;& ce pendant,
c'est leur doctrine que le monde a reietté par incredulité,
& ce sont eux aussi lesquels crient, Qui est-ce qui a
creu à nostre predication? Ce n'est pas Mahumet, ou
quelqu'autre faux Prophete, qui fait ceste compleinte.
Dieu n'auoit-il pas assez de puissance pour faire receuoir
la doctrine de son Fils?Mais il n'est pas ici question
de sçauoir quelle puissance a Dieu , & n'est pas le but
auquel vise le Prophete; ains seulement de monstrer
quelle est l'incredulité des hommes enuers ceste doctrine.
L'argument donc duquel vsent telles personnes,
pour amoindrir, ou aneantir la vertu de la doctrine
preschee par nous, dautant qu'elle est escoutee & receue
de peu,ne vaut rien;autrement,il en faudroit autant
conclurre de celle qu'a presché Esaie,veu la plainte
qu'il fait ; de celle qu'a presché Christ , qui se compleint
d'vne mesme incredulité.

Ce passage sert aussi de consolation aux pasteurs &
ministres de la parole de Dieu , contre la dureté & rebellion
des hommes ; & pour surmonter la tentation
qui leur est liuree pour cest effect ; comme , à la verité,
ils ont besoin d'estre fortifiez en cest endroit. Nous
lisons au 20.chap.de Ieremie vers.9. le dur assaut qu'a
eu le Prophete touchant cela, iusques à dire à Dieu, Ie
ne parlerai plus en ton nom.Les hommes prenent le labeur
en patience quand ils voyent qu'il n'est point
vain, & qu'il rapporte quelque fruit;mais quand ils voyent
le contraire, & que quoi qu'ils facent ils n'auancent rien,
ils se lassent, & quittent tout. Aussi ne faut
il point douter,que quand vn poure seruiteur de Dieu,
pasteur, & ministre, voit,qu'il y a plus de vingt & trente
ans qu'il presche, & ce pendant , il n'auance rien ; le
monde demeure,non seulement en son ignorance, mais
aussi en sa nature peruerse, & corrompue , qu'il ne die

en soi mesme , il vaudroit mieux m'employer en quelqu'
autre chose. Ceste tentation mesme lui peut venir
en l'entendement,ma vocation possible n'est pas legitime,
car si elle l'estoit, Dieu la beniroit. Nous voyons
qu'à quelque trauail que les hommes s'occuppent; encores
en voyent-ils reüssir quelque fruict, & benediction:
Et ce pendant,ceux qui s'employent à annoncer
ceste parole, n'en voyent que bien peu , ou point du
tout qui la reçoiuent: La dessus,le degoustement vient.
Or voici vn passage, & vn exemple,auec les autres que
nous auons allegué de Christ, & de S. Paul, qui nous
doiuent seruir, & fortifier. On dit en commun prouerbe,
que la consolation des miserables est d'auoir plusieurs
semblables à soi. Nous ne sommes pas tous seuls,
ni n'est pas seulement de ceste heure, & de ce temps,
que ce mespris, & ceste incredulité s'est veue. Sommes
nous plus escellens qu'Esaye? Sommes nous plus sçauans
que Christ qui est la Sapience eternelle? Si on n'a
point creu à la predication de ceux la,trouuerons nous
estrange si on ne croit point à la nostre? Concluerons
nous pourtãt que nostre vocation ne soit pas legitime,
ou que nostre doctrine ne soit pas bonne? Contentons
nous d'estre traittez comme nostre maistre, & d'auoir
telle audience au monde qu'il a eu. Regardons premierement
à la necessité qui nous est imposee d'euangelizer :
& au malheur duquel l'Apostre nous menace si
nous n'euangelizons : Dauantage contentons nous de
ce que dit Esaye au 49.chap.vers.4, & au 55.vers.11.que
nostre œuvre est deuant les yeux du Seigneur , & que sa
parole ne retournera point en vain à lui. Plantons, arrousons,
& semons ; & laissons à Dieu de donner tel accroissement
qu'il cognoistra estre expedient. Le laboureur
quitte il sa terre sous ombre qu'il voit qu'elle ne
rapporte point de fruict pour quelque temps, & qu'elle
ne lui produit que des ronces, & des espines? mais au
contraire tant plus il la trouue rebelle , & tant plus il
combat par son trauail contre sa rebellion. Sachons
[que]

que si ceste parole n'est receue, & n'apporte vie, elle sera
pour le moins odeur de mort à ceux qui la reiettent.
N'est ce par vn fruict, & qui reüssit à la gloire de Dieu,
qu'elle manifeste les rebelles,& incredules,afin que par
apres la iustice de Dieu reluise sur tels enfans d'infidelité?
Nous voudrions bien voir vn autre fruict, c'est-
assauoir,qu'elle fust receue;mais ce n'est pas à nous à limiter
à Dieu en quelle façon il la doit faire fructifier.
Asseurons nous seulement , qu'en quelque sorte que ce
soit , elle ne sera point vaine : Et si nous n'en tirons le
fruict que nous voudrions , consolons nous auec tant
d'excellens personnages, & sur tant d'aages & de siecles
qui nous ont precedé , esquels , ceste mesme ingratitude,
& rebellion s'est veuë. Et de fait, il est certain que le
Prophete n'a point voulu ici parler seulement de son
temps , mais ( comme nous auons touché ci dessus ) a
monstré la condition de l'Eglise qui deuoit venir apres
lui. Car nous voyons que Christ , & l'Apostre, se sont
seruis de sa complainte; & , par consequent, a voulu aduertir
les pasteurs , & les munir contre ce scandale , &
ceste tentation. Ce qui doit aussi seruir à tous fideles
Chrestiens en general. Car, comme les pasteurs sont
tentez pour ce qui concerne leur charge, aussi ne faut il
point douter , que ceste incredulité & rebellion du
monde, ne donne vn merueilleux assaut à tous les fideles
en general ; lesquels , pour ceste occasion , sont souuent
ainsi assaillis, Si la religion , & doctrine que nous
suiuons, & de laquelle nous faisons profession , estoit la
vraye doctrine de Dieu , & la vraye religion , les hommes
la reietteroyent ils en ceste façon, & se banderoyent
ils ainsi contre elle? Nous voyons combien il y a
peu de personnes qui la reçoiuent , & encore combien
moins entre ceux qui la reçoiuent, qui en facent vne
profession telle qu'ils deuroyent. Au contraire,nous
voyons combien toutes les autres religions, & doctrines,
ont de disciples qui se rangent à elles, & qui les suiuent.
Voila vn assaut qui n'est pas petit, & pour lequel

surmonter, nous n'auons point de meilleur moyen que
cestui ci. Il n'y en a pas vn d'entre nous qui ne confesse
que la doctrine preschee par Christ ne soit doctrne de
Dieu , & ce pendant elle n'a pas eu plus de credit au
monde, ni n'a esté mieux receue. Dirons nous que
la doctrine de Mahumet, & de tant d'autres payens, &
idolatres, qui sont parmi le monde, soit meilleure que
la Chrestienne , pour ce qu'il y a moins de Chrestiens
que de Mahumetistes, & idolatres? Il est certain que
non : ou autrement nous serions entierement depourueus
de sens, & ne meriterions pas d'estre appellez
Chrestiens. Tant s'en faut,donc,que nous deuions pour
ceste occasion desister de la vraye doctrine, ou la reuoquer
en doute, que au contraire,c'est vn des plus grãds,
& plus forts argumens que nous ayons,pour cognoistre
qu'elle est doctrine de Dieu, & non des hommes, & pour
nous confermer en icelle. Car si elle estoit du monde
(comme dit nostre Seigneur Iesus parlant à ses Apostres,
en S. Iehan 17. chap.14.vers.) le mõde la receuroit;
mais dautant qu'elle est de Dieu, & non du monde, le
monde la hayt, & la reiette. Est ce à dire ce pendant,
combien que le monde la reiette,qu'elle perde quelque
chose de sa dignité?Combien que Christ, qui est l'autheur
d'icelle,ait esté reietté du mõde,a il perdu neantmoins
quelque chose de son excellence, & de sa maiesté?
A il esté,ou, est il moins Fils eternel de Dieu,sa Parole,
& Sapience eternelle , par laquelle toutes choses
ont esté faites, & sont conseruees en estre ? Est il moins
souuerain Roy , souuerain Sacrificateur , & Prophete?
Dieu laisse il de demeurer Dieu, & pert il quelque chose
de sa diuinité, encore que les hommes, tant par leurs
idolatries,que par leur meschante vie, lui en arrachent
ce qu'ils peuuent? Laisse il d'estre Toutpuissant encore
que les hommes se moquent de sa puissance , & lui facent
la guerre?Les nuees,quoi qu'elles obscurcissent le
ciel , peuuent elles oster quelque chose au Soleil de sa
clarté? Sachons donc,que tout ainsi que Dieu a sa diuinité
[nité]

en soi mesme, & prend sa dignité de soi, & non des
hommes,aussi quoi que facent les hommes ils ne lui en
sçauroyent rien oster : comme il asseure par son Prophete
Esaye, au 42.chap.8.vers. & au 48.vers.11, qu'il ne
permetra point que sa gloire lui soit rauie. Et tout ainsi
que les hommes ne lui peuuent rien donner, comme
disoit Dauid au Pseau.16, Il n'y a nul bien en nous qui
paruienne iusques à toi Seigneur,aussi ne le sçauroyent
ils amoindrir ne diminuer. Cõme aussi il n'est point en
la puissance des hommes d'oster à Christ les dignitez
qu'il a du Pere.Et d'autant que la parole de Dieu a aussi
sa dignité, & son excellence, sa fermeté, & son authorité ,
de Dieu ; que les hommes en facent comment ils
voudront, qu'ils la reçoiuent, ou qu'ils la reiettent, elle
demeur tousiours doctrine celeste, & verité de Dieu,
& sera tousiours aduouee telle deuant Dieu. Et de fait,
regardons, si, combien qu'elle ait esté depuis le commencement
du monde reiettee, assaillie, & poursuiuie
par tant de peuples, tant de Rois, tant d'heretiques, &
tant de diables, elle a pour cela rien perdu de sa puissance,
& de sa vertu, & si elle n'est pas tousiours demeuree
victorieuse par dessus tous ses ennemis. Ne nous estonnons,
donc,pas des assaux qu'on lui donne, & de ce
qu'on la reiette , & ne nous desbauchons pas pour cela
de la suiure.Sachons que finalement,& elle,& ceux qui
la suiuent , seront victorieux, & qu'il faudra que les
meschans,qui lui sont contraires, le cognoissent, à leur
grande vergoigne,& confusion:& ceux qui l'auront suiuie,
à leur gloire,& felicité : Qui sera,quand Christ venant
recueillir ses enfans en la derniere iournee, nous
menera tous en son Royaume, pour viure, & regner eternellement
auec lui.

Dieu nous en face la grace.

Amen.