SECONDE HOMELIE
sur le cinquantetroisiesme chap. de la prophetie
d'Esaye, vers. 1.

Et à qui est-ce que le bras du Seigneur est reuelé ?

L'Apostre S. Paul, au 3. chap. de la seconde aux Corin.
vers. 6. parlant du ministere de la parole de Dieu, le
nous propose double, assauoir, vn de letre, & l'autre d'Esprit :
comme aussi au 2. de la premiere vers. 4. il dit, Que
sa predication n'a point esté en paroles & sapience humaine,
mais en euidence d'Esprit & de puissance : nous
monstrant par cela, qu'outre le ministere & la predication
exterieure, il y a vne force & puissance du S. Esprit,
laquelle Dieu besongne en nos cœurs : voire, sans
laquelle le ministere de letre nous tue. Voila pourquoi,
quand Dieu voulut enuoyer le Prophete, il lui fit ceste
promesse, comme il est escrit au 59. de sa prophetie
vers. 21, Mon Esprit qui est en toi, & mes paroles que
i'ai mises en ta bouche, ne bougeront point de ta bouche,
ne de la bouche de ta semence, ne de la bouche de
la semence de ta semence. Et c'est ce que nostre mesme
Prophete adiouste au propos precedent ; ou, se complaignant
de l'incredulité du peuple, & aduertissant,
que ceste incredulité continueroit au monde, il auoit
demandé, Qui est-ce qui a creu à nostre predication,
& qui est-ce qui y croira par ci apres ? Et maintenant il
demande, Et à qui est-ce que le bras du Seigneur est reuelé,
ou sera reuelé ? monstrant par cela, que non seulement
les hommes se boucheront les oreilles, pour ne
point ouir la predication exterieure, mais aussi s'endurciront
les cœurs, pour ne point accepter & receuoir
ceste puissance & bras interieur qui est proposé auec la
parole. C'est vne chose toute notoire en l'Escriture
saincte, que quand il est fait mention du Bras de Dieu,
le mot de, Bras, est pris pour sa puissance ; comme nous
[voy]

voyons que Dauid dit au Pseaum. 118. que la dextre du
Seigneur est haut esleuee, & qu'elle a fait vertu. Et en
Exod. 6. chap. vers. 6. le Seigneur promet a son peuple
qu'il le garentira en bras estendu, & en grands iugemens.
Il ne faut donc pas que nous pensions, comme
les Antropomorphites, que Dieu ait des bras, des pieds,
ou des mains : car c'est vne Essence spirituelle : mais
quand l'Escriture nous veut parler de sa puissance &
de sa force, elle vse de ce mot de, Bras ; pour ce que les
hommes monstrent ordinairement les exploits de leur
force par le bras. Au reste nous pouuons recognoistre
double bras de Dieu : ou, plustost, son bras se monstre en
deux sortes. La premiere, est generale, non seulement
en la creation de toutes choses, mais aussi en la conduicte
& conseruation d'icelles. Car tout ainsi que par sa
force & par sa vertu, il a donné estre aux creatures ; voire
mesmes, que deuant qu'elles fussent, cest Esprit &
ceste Vertu reposoit sur les eaues : aussi par ceste mesme
Vertu il nourrit, conserue, entretient, & conduict toutes
les creatures. Et c'est ce que dit Dauid au Pseau. 104
vers. 27, & au Pseaum. 141. vers. 15. & 16.Les yeux de tous
s'arrestent sur toi, afin que tu leur donnes viande à chacun
en son temps ! Tu ouures ta main, & rassasies à souhait
toute creature viuante. Le mesme Prophete, au
Pseau. 104. vers. 30. appelle ceste Main, & ce Bras, Esprit,
comme Moyse fait aussi, Quand tu retires ton Esprit
des creatures, elles defaillent, mais si derechef du remets
ton Esprit en elles, elles viuent. Ceste Vertu donc
interieure, laquelle est aux creatures, & par laquelle elles
sont conseruees en estre, soyent hommes, animaux,
plantes, ou herbes, c'est ce bras general de Dieu. Il y a
par apres le Bras particulier, lequel Dieu monstre en
la defence, & protection de ses enfans ; duquel parle
Dauid au Pseau. 44, disant, que Dieu auoit conquesté
la terre promise, & auoit planté son peuple par son
bras : & au 77. vers. 16. Tu as recoux ton peuple par ton
bras. Or, ces deux bras, ou, plustost, ces deux sortes de la

declaration, & manifestation du bras, & de la puissance
de Dieu, se voyent, & monstrent en ses œuures, & aux
creatures. Mais il y a vn autre bras de Dieu lequel se
manifeste, & declare en sa parole, qui est, ceste Vertu &
puissance du S. Esprit, besoignant à vie es enfans de
Dieu, & fideles, & à mort es enfans d'incredulité, & de
rebellion. Or est-il certain, que le Prophete, par la complainte
qu'il fait, A qui est-ce que le bras du Seigneur
a esté reuelé, veut comprendre en general toute ceste
puissance de Dieu, soit en ses œuures, soit en sa parole,
laquelle tous hommes aussi en general, ne considerent
pas, & ne recognoissent pas comme ils doiuent : mais
estans abrutis en la terre, s'arrestent aux creatures, &
aux choses basses, & exterieures, par lesquelles elles
sont engendrees, & conseruees. Et de faict, combien y
en a-il au monde, ausquels ceste vertu, & puissance de
Dieu soit reuelee ? A grand peine s'en trouuera il vn entre
cent qui y pense. Les vns sont tellement stupides,
qu'ils voyent naistre, grandir, & continuer les choses
sans y penser, ni sçauoir comment elles naissent, ni comment
elles sont conseruees : & passent leur vie vsant des
creatures comme bestes ; & font comme les pourceaux,
qui mangent le gland, lequel tombe de dessus les chesnes,
sans leuer la teste en haut, pour considerer d'ou il
tombe. Les autres, se voulans vn peu plus curieusement
enquerir, demeureront attachés à ie ne sçai quelle
nature, ou à vne certaine puissance qui est aux creatures,
ou à vne influence par laquelle elles sont conduictes,
& gouuernees. Les autres qui passeront plus outre,
& qui cognoistront, & confesseront vn bras, & vne puissance
de Dieu, s'attacheront, & appuyeront toutesfois
sur leur bras, mettant toute leur fiance en leur force, &
en leurs richesses, & sacrifieront, comme dit Habacuc
au 1. chap. vers. 16. a leur rets, & à leur filé : tellement que
on n'en voit gueres ausquels ce bras du Seigneur general,
qui se manifeste en ses œuures, soit reuelé. Et n'est
pas sans cause que le Prophete fait ceste exclamation,
[pour]

pour taxer en general, la maudite incredulité, & stupidité
des hommes. Ce n'est pas à dire pourtant, que ce
bras vniuersel de Dieu ne se monstre clairement. Car
qui est celui, lequel, au ciel, en l'air, en la terre, & es
eaues, ne voit reluire ceste puissance, & ceste force ? Les
cieux, dit Dauid au Pseaum. 19, annoncent la gloire de
Dieu. S. Paul au 1. des Rom. vers. 20. dit, Que les cieux,
& la terre, sont les images visibles, de la puissance, & diuinité
de Dieu. Et ce pendant, le monde est tellement aueuglé
qu'il n'y voit goute. Or s'il ne voit goute en ce
liure, lequel, comme Dieu dit par son Prophete, est escrit
en si grosses letres, nous esmerueillons-nous s'il est
du tout aueugle en cest autre liure de la parole, & predication,
auquel se monstre le bras, & la puissance de
Dieu en salut aux croyans, & à mort aux infideles ? Et
c'est de ce bras duquel le Prophete fait principalement
sa cõplainte, A qui est-ce que le bras du Seigneur est reuelé ?
Comme s'il vouloit dire, Il ne se faut pas estonner
si on ne croit pas, & si on ne croira point à nostre predication,
c'est dautant que le bras du Seigneur n'est pas
reuelé : Car il n'y a que ceux, ausquels ceste puissance
du Seigneur est reuelee, qui embrassent ceste parole, selon
qu'il fut dit à S. Pierre par nostre Seigneur Iesus, apres
ceste excellente confession par lui faite, La chair,
& le sang ne te l'ont pas reuelé, mais l'Esprit de mon
Père, comme il est escrit au 16. chap. de S. Matth. vers. 17.
Or, ce bras du Seigneur qui se manifeste en sa parole,
regarde, premierement, la promesse excellente de salut,
par laquelle Dieu promet à ses enfans d'estre leur Dieu,
& de les sauuer, tant de la mort eternelle, qu'aussi de
toutes les autres afflictions, esquelles ils seront enserrez.
Et c'est dequoi se complaint le Prophete, que combien
que Dieu ait fait ceste promesse, il y en a neantmoins
bien peu qui la reçoiuent, & embrassent : & que
cela ne procede d'ailleurs sinon que ceste vertu, & puissance
de Dieu, ne leur est pas persuadee. Des le commencement
du monde Dieu a fait ceste promesse de

vie, disant, Que la semence de la femme biseroit la testre
du serpent : combien y en a-il qui y ayent creu ? Cela
se peut voir par l'estat auquel estoit le monde lorsque
Dieu vint refaire ceste alliance auec Abraham auquel,
& à sa posterité, ceste premiere promesse estant proposee,
combien y en a-il de ses enfans lesquels l'ayent receu ?
Moyse est enuoyé par apres pour la reiterer : lequel
mesmes par signes & miracles, monstre & fait voir deuant
les yeux du peuple ce bras fort & ceste main estendue
de Dieu : &, ce pendant, le peuple ne le peut aprehender,
mais cerche son secours aux dieux estranges &
au bras de la chair : ce bras n'est point reuelé, &, pour
ceste occasion, ceste promesse n'est point receue. Le Seigneur
par apres fait les promesses particulieres d'assistance
& deliurance des afflictions, &, neantmoins, l'infidelité
les reiette, pour ce que ce bras n'est point reuelé.
Or en cela voit-on qu'il n'est pas reuelé, que les
hommes ne se fient pas aux promesses de Dieu. Christ
est venu. Les Apostres sont venus, & ont tous proposé
ceste promesse, mais dautant que le monde n'aprehende
pas ceste vertu & puissance de Dieu, il n'y peut croire
comme il doit : car, si ceste vertu & puissance de Dieu
leur estoit reuelee, il ne faut point douter qu'ils ne
creussent : comme nous voyons que l'Apostre dit au
chap. 11. des Hebr. vers. 19, qu'Abraham a creu quand il
lui fut commandé d'immoler Isaac, pour ce qu'il a estimé
que Dieu le pouuoit resusciter des morts : l'asseurance
aussi qu'Isaac a eu de ceste puissance a fait qu'il a
donné benediction à Iacob de choses à venir, comme il
est dit au mesme chap. vers. 20. Moyse, estant grand, a
refusé d'estre nommé fils de la fille de Pharao, & a plustost
esleu d'estre affligé auec le peuple de Dieu, estimant
l'oprobre de Christ plus grandes richesses que
les thresors qui estoyent en Egypte, pour ce que le bras
de Dieu lui a esté reuelé : Cela aussi a fait passer la mer
rouge au peuple. D'ou vient qu'André, Philippe, Pierre,
& les autres Apostres, aussi tost qu'ils sont appellez à
[Christ]

Christ, quittent incontinent tout, & le suiuent ? D'ou
vient que S. Paul, oyant Christ du ciel, est incontinent
changé, & obeit, combien qu'auparauant, ayant oui
S. Estienne, il fust demeuré en son incredulité ? D'ou
vient que plusieurs milliers de Iuifs, lesquels, ayans ouy
Christ, n'auoyent point creu à sa parole, sont conuertis
par vne seule predication de S. Pierre ? cela vient de ce
que ce bras de Dieu qui ne leur auoit point esté reuelé,
l'est. D'ou vient qu'Herodes, Ponce Pilate, les Scribes
& Pharisiens, & la plus grande partie du peuple, ne se
conuertissent point par la parole, ni par les miracles de
Christ ? C'est dautant que ce bras ne leur est pas reuelé.
Il y en a, donc, plusieurs au monde, lesquels en oyant
n'oyent point, & quelque parole qui retentisse en leurs
oreilles, n'en deuiennent point meilleurs. Il y en a plusieurs,
lesquels liront, mais, comme dit le Prophete au
29. chap. 12. vers. ils diront qu'on leur ouure le liure : &
comme dit S. Paul en la 2. à Timoth. 3. chap. 7. vers. en
apprenant ils ne prouffitent rien : & c'est, pour ce que
ceste vertu du S. Esprit ne frappe point leurs cœurs,
tellement qu'ils ne voyent que des letres & du papier.
Cela aussi est cause que toute la sapience du monde se
moque des choses, lesquelles nous sont proposees en
l'Euangile, touchant Christ & le salut que nous obtenons
de lui : qu'elles sont scandale aux Iuifs, & folie aux
Grecs. Comme, au contraire, ceux ausquels ce bras est
reuelé, croyent que par les souffrances & mort de
Christ, nous sommes deliurez de la mort : que nos iniquitez
sont lauees en son sang : que par sa resurrection
nous sommes faits participans de iustice & d'immortalité :
&, que, comme il est resuscité, nous resusciterons
aussi, pour estre faits conformes au corps glorieux auquel
il est resuscité. Voila pourquoi Christ disoit en ceste
saincte priere qui est au 17. chap. de S. Iean, Pere, ie te
ren graces, de ce que tu as caché ces choses aux grands,
& les as reuelé aux petis. Le monde ne cognoist point,
& ne peut apprehender ceste puissance de Dieu. Et

tout ainsi qu'il ne l'apprehende point en ce qui concerne
son salut, & que par ce moyen il demeure enuelopé
en ignorance, & en la mort : aussi voyons nous qu'il ne
l'aprehende point en ce qui cõcerne la regeneration, &
la victoire que Christ a obtenu sur le diable, la mort, &
le peché. Cela ne monstre il pas clairement que ce bras
de Dieu n'est pas reuelé, quand on voit que le diable, &
le peché ont encore leur regne aux hommes ? Car le
bras de Dieu, n'est-ce pas ceste puissance, & ce regne
qu'il doit auoir en nous, & par lequel il doit auoir vaincu,
& subiugué ses ennemis, & les nostres, en nous, afin
que, combien qu'ils soyent encores en nous, ils ne soyent
pas toutesfois les maistres ? Et ceux lesquels ils
maistrisent, & dominent, ne monstrent ils pas clairement,
que ce bras n'est pas encore reuelé en eux ? Quand
aussi nous obeissons à nos concupiscences, & volontez
plustost qu'à Dieu, ne monstrons nous pas euidemment
que ce bras de Dieu n'est pas encore reuelé en nous ?
S'il y estoit reuelé Dieu ne nous gouuerneroit il pas ?
Ne nous rangerions nous pas à sa volonté ? Ne renoncerions
nous pas à nous mesmes, & ne verroit on pas la
puissance qu'il auroit sur nous, en nous maniant, &
conduisant selon son vouloir ? Et, ce pendant, ou est-ce
qu'on voit cela auiourdhui ? Ou apperçoit on ceste obeissance ?
Ne voit-on point plustost vne desobeissance,
& rebellion ? tellement, que tout ainsi qu'en ce qui concerne
la foy, & le salut des hõmes, on ne voit que crainte,
defiance, pusilanimité, & reuolte : nous tremblons au
son de la feuille, & la moindre tentation qui se propose
nous abat par terre : aussi en ce qui concerne la vertu
interieure de cest Esprit de Dieu, par lequel il besoigne
en nostre nature, la mortifiant, & nous regenerant, &
viuifiant, on n'en voit que bien peu, & en peu de personnes,
d'apperceuance : & pour ceste occasion, il semble
que ceste parole soit comme vn son mort, & vain :
comme aussi certes elle est en ceux esquels le bras de
Dieu ne se voit point. Et voila pourquoi le Prophete,
[voy]

voyant tant d'incredulité de son temps, tant de defiance,
tant de corruption, & rebellion contre Dieu, demande,
à qui est-ce que ce bras est reuelé ? Et si le Prophete
l'a crié de son temps, helas ! quelle occasion auons
nous maintenant de le crier, ou nous voyons les
choses estre empirees, qu'il semble qu'elles
soyent venues a leur comble ! Ie ne di pas si nous considerons
les Payens, & Ethniques, ni mesmes ceux qui se
vantent de Chrestienté, esquels neantmoins, non seulement
l'infidelité, mais aussi la rage contre la parole de
Dieu, & la cruauté qu'ils exercent contre ses enfans se
voit, auec vn desbordement, & deluge de toutes sortes
de meschancetez : mais aussi si nous nous considerons
nous mesmes, qui nous vantons de reformation, comment
est-ce que ce bras de Dieu est reuelé au milieu de
nous ? Il est veritablement reuelé en ce qui concerne la
religion, & la doctrine ; car, le Seigneur ayant par sa misericorde
chassé du milieu de nous les superstitions, &
fauce religion, y a planté le sceptre de sa parole : a touché
le cœur des Princes pour y mettre la reformation,
& de doctrine, & de vie : a aussi entretenu, & conserué
son Eglise, nonobstant la rage, & cruauté de ses ennemis :
mais si on iette les yeux sur nous, si on considere nostre
zele, nostre foy, & nostre vie, ou est ce que ce bras
de Dieu se monstre ? ou est ceste ferme fiance, & asseurance
que nous deuons auoir en nos afflictions ? ou est ceste
ardeur qu'on deuroit voir en nous au seruice de nostre
Dieu, & à escouter sa parole ? ou est ceste reformation
de vie ? Les yurongnes laissent ils d'yurongner, les paillards
de paillarder, les blasphemateurs, & iureurs de iurer ?
Les querelles, debats, & noises cessent-elles ? y a il vne
telle charité, & amitié entre nous comme elle deuroit ?
Voila, voila le bras de Dieu qui se deuroit monstrer :
& ce pendant, à qui est-ce, ou, par qui est-ce qu'il
est reuelé ? Les pasteurs le declarent assez, & monstrent
assez quelle est la vertu, & puissance de Dieu en sa parole ;
&, ce pendant, cela ne prent aucune racine aux

cœurs : tellement, qu'il semble que ceste poure parole
n'ait aucune vertu : si en a elle vne : & puisque nous ne
monstrons pas ce bras de Dieu en ceste façon, il se fera
voir en vne autre, assauoir, en ses iustes iugemens & vengeances,
qu'il exercera à l'encontre de nostre infidelité.
Voila comment il a fait à l'endroit du peuple contre lequel
Esaye crie, A qui est-ce que le bras du Seigneur
est reuelé ? Car, dautant qu'ils n'ont point voulu monstrer
ceste puissance de Dieu, qui accompagne sa parole,
tant en foy, qu'en obeyssance, ce bras s'est desployé, &
a frappé sur eux par vne infinité de maux, desquels ils
ont esté batus, & transportez en captiuité, tantost en
vn lieu, & tantost en vn autre. Il eust bien mieux valu
pour eux, qu'ils eussent monstré, que ceste puissance de
Dieu en salut, qui accompagne sa parole, leur auoit esté
reuelee, & qu'ils l'auoyent senti. Aussi faut-il que nous
n'en attendions pas moins, si nous n'aduisons de receuoir
ceste vertu & ce bras, & monstrer que vrayement
il nous est reuelé. Pensons nous que ce soit assez d'ouir
la parole, & de faire quelque profession de religion,
pour dire que nous soyons Chrestiens ? Ce peuple, contre
lequel crie Esaye, ne l'a il point ouye ? N'ont ils
point esté au temple ? Et ce pendant, que leur a serui cela,
sinon d'vn plus grand iugement ? pour ce qu'ils ont
foulé aux pieds ceste vertu excellente de Dieu, qui se
presentoit à eux auec la predication. Et de faict, d'ou
pensons nous que vient nostre salut & nostre regeneration ?
Il est vrai que le Seigneur a institué la predication
& le ministere exterieur : mais ce pendant, est-ce en cela
que gist nostre asseurance ? Les letres & la voix d'vn
homme nous peuuent-elles sauuer ? Si le bras de Dieu
n'accompagne la parole, pensons nous qu'elle puisse
former la foy en nous, ou, qu'elle puisse regenerer ? Et
quand Dieu attribue quelque fois cela à ses seruiteurs,
c'est par concession, en leur accordant & attribuant ce
que neantmoins il fait par sa vertu ; pour monstrer que
le ministere de sa parole n'est poin vain, cõme S. Iehan
[Bapt]

Baptiste declare, au 1. chap. de l'Euangile selon S. Iehan
vers. 26, I'ai baptizé d'eaue, mais il en vient vn apres
moi, qui est à preferer à moi, icelui vous baptizera au
S. Esprit. Et si ce bras & ceste vertu ne se reuele, tous
ceux ausquels il n'est pas reuelé, encor qu'ils oyent la
parole, cela ne leur prouffite de rien. Que si la dessus
quelcun replique, puisque ie ne peux croire si ce bras
de Dieu & ceste vertu de son Esprit ne besongne en
moi, & qu'il ne me soit point reuelé, pourquoi mon incredulité
m'est elle imputee. & pourquoi suis ie condamné ?
Si le Seigneur vouloit besongner en moi, ie
croiroi aussi bien que les autres. Nous respondons par
les paroles de l'Apostre S. Paul, au 9. des Rom. O homme
qui es tu qui repliques contre Dieu ? Toutes les nations
lesquelles n'ont point ce priuilege que d'auoir
ouy la parole, se pourront-elles excuser la dessus, & se
garentir par ce moyen contre le iugement de Dieu ?
Combien y a il eu de personnes particulieres en la terre,
& combien y en a il encores, esquelles elle n'est iamais
paruenue ? Si les Iuifs fussent demeurez fermes en
l'alliance, & ne l'eussent point violee, tous les Gentils,
qui en estoyent forclos, qui n'auoyent point de part
aux promesses, & lesquels, comme dit l'Apostre aux Ephes.
2. chap. 12. vers. estoyent sans Dieu, se pouuoyent
ils excuser & defendre contre Dieu ? L'Apostre, au commencement
de l'epistre aux Rom. ne les rend il pas inexcusables
deuant le iugement de Dieu ? Si toutes les
nations du monde qui n'auoyent pas les promesses, ne
laissoyent d'estre iustement condamnees deuant Dieu,
à cause de leur incredulité, pource que le bras general,
c'estadire, ceste vertu & puissance, que Dieu a des la
creation du monde manifesté en ses creatures, leur ayant
esté reuelé, ils ne l'ont point cogneu, & n'ont pas adoré
Dieu ni serui comme ils deuoient, mais ont transformé
sa gloire & sa verité en mensonge, comment est-
ce que ceux de ces temps & de ces siecles se pourront
excuser, & dequoi leur seruira ceste replique, de dire

que la parole n'est pas paruenue iusques à eux, & qu'ils
ne l'ont point ouy prescher ? Qui si ceux qui ne l'ont
point ouy prescher, ne peuuent estre absous pour ceste
occasion, comment le seront ceux qui l'ont ouye, & dequoi
leur seruira de dire que le bras de Dieu ; c'estadire,
la force & la vertu qui accompagne sa parole, ne leur
a pas esté reuelee ? Il y en a beaucoup plus de ceux qui
ont ouy la parole, & ausquels le bras d'icelle n'a pas esté
reuelé, que de ceux ausquels il l'a esté, comme Iesus
Christ enseigne en S. Matthieu 20. chapitre 16. verset,
par ceste sentence, Plusieurs sont appellez mais peu
d'esleus : Et comme les sentences, tãt des Prophetes, que
de l'Apostre, qui parlent des restes & reliques des Iuifs,
monstrent & tesmoignent euidemment. Et c'est dequoi
mesmes nostre Prophete se complaint. Ceux, donc, ausquels
ce bras n'a point esté reuelé seront-ils excusez
pour cela ? Or afin de respondre, & entendre mieux les
choses, il nous faut representer le proces entre Dieu &
l'homme, & nous cognoistrons qui a meilleure cause :
comme cela nous est quelquefois proposé en l'Escriture,
que Dieu emprunte la maniere de faire de ceux qui
ont quelque debat ensemble, & se met en lice, semondant,
& appellant ses aduersaires pour defendre leur
cause. Cela se voit au 41. chap. de nostre Prophete, vers.
1. ou Dieu dit aux Idolatres, Produisez vostre cause,
& annoncez vos fortes raisons : Et au 43. chap. vers. 26,
parlant a son peuple, il dit, fay moi souuenir, & qu'ensemble
nous soyons iugez : raconte-toi, afin que tu sois
absous. Et en plusieurs autres passages : Dieu est l'acteur,
& accuse l'infidelité & desobeissance de l'homme, disant,
qu'estant sa creature, & l'ayant formé à son image,
l'ayant nourri & entretenu, & lui ayant donné tous les
biens qu'il a, au lieu de le seruir, de l'honorer, & de lui
obeir, il s'est bandé contre lui, & s'est ligué auec le diable,
& lui fait la guerre, & le deshonore par ses pechez
& par ses iniquitez : Qu'il lui est infidele, desloyal, &
trahistre : & qu'au lieu d'obeir au premier commandement
[ment]

qu'il lui auoit fait, il a mieux aimé obeir à la parole
du diable. Il adiouste dauantage, que continuant
en sa rebellion, il amasse peché sur peché : Qu'il le
quitte pour seruir aux faux dieux, & a sa concupiscence,
suiuant ses meschantes & deprauees affections, &
volontez. Et partant, il demande qu'il soit condamné
a mort, comme infidele, trahistre, & desloyal à son
Createur & a son Dieu. Voila l'accusation. Oyons
maintenant les defences de l'homme. Tu ne m'as point
fait ouir ta parole, ou si tu me l'as fait ouir, tu n'as point
touché mon cœur de la vertu interieure de ton Esprit,
pour la pouuoir receuoir. Si c'est Adam nostre premier
pere qui parle ainsi, il est menteur : car Dieu lui a fait
ouir sa parole, & lui auoit aussi reuelé ce bras qui l'accompagne :
car il lui auoit donné vne puissance & vertu
pour la receuoir, & mesmes pour l'accomplir : mais de
sa propre volonté il l'a quittee, & en la quittant, a perdu
ceste vertu & puissance qui estoit en ceste parole :
tellement, que par son infidelité, & par sa desobeissance,
il a tiré tous hommes en condemnation, comme dit
S. Paul au 5. chap. des Rom. vers. 18. Et, estant incredule,
a par apres engendré des enfans semblables a soi, & de
son naturel, c'estadire, pecheurs, incredules, & impuissans
de faire ce que Dieu commande : voire, il les a engendrez
tous enfans d'ire & de mort : Non pas qu'ils soyent
damnez simplement pour le peché d'Adam, mais
c'est pource que naissans pecheurs, ils pechent, & suiuent
sa rebellion, & son incredulité. Quand donc ils
oyent ceste parole, & n'y croyent point ; quand elle n'a
aucune vertu ni efficace en eux, est-ce qu'elle soit vaine,
& destituee de force en elle mesmes ? Il est certain
que non : car d'elle, & en elle, elle est tousiours semblable :
comme quand le Soleil luit es yeux d'vn aueugle, &
que l'aueugle ne voit goutte, est-ce adire que le Soleil a
perdu sa clarté ? Non : mais ce vice est en l'aueugle, &
non pas au Soleil : aussi quand vn homme qui a les oreilles
de l'esprit & de l'entendement bouchees par le

peché, ne peut comprendre & receuoir la parole qui est
preschee, cela vient de la surdité qui est en lui. Voila
pourquoi l'Apostre faisoit requeste a Dieu pour les Ephesiens,
que les yeux de leurs entendemens fussent illuminez,
comme il est escrit au 1. chap. de l'epist. qu'il
leur escrit, vers. 18. Non pas que la parole ne soit assez
claire d'elle-mesme. Quand aussi elle ne peut prendre
racine au cœur de celui qui l'oyt, & que par ce moyen
elle n'a aucune vigueur en lui, cela procede de la dureté
du cœur de celui a qui elle est proposee : cõme Christ
enseigne par la similitude du semeur, & de la semence,
qui est au 13. chap. de S. Matth. vers. 3. Au reste, d'ou vient
ceste surdité, cest aueuglissement & endurcissement,
qui causent l'infidelité & la rebellion ? Viennent elles
de Dieu ? Ia n'aduienne : cela vient de l'homme. Et
partant que l'homme s'accuse soi-mesme sans s'attaquer
à Dieu. Ouy mais, dira l'homme, pourquoi est-ce
que Dieu ne perce mes oreilles ? pourquoi n'ouure-il
mes yeux, & pourquoi n'amolist-il mon cœur, afin que
sa parole ait sa vertu & son efficace en moi ? Dieu y est
il tenu ? Monstre moy, poure creature & ver de terre, par
quelle loy, & par quel droit il est obligé de ce faire. Est
ce à cause de l'amitié que tu lui portes ? Tu es son ennemi
mortel. Est-ce à cause de l'honneur que tu lui fais, &
du seruice que tu lui rends ? Tu le deshonores par toute
ta vie, & sers au diable & au peché, au lieu de le seruir.
Est-ce à cause de ton obeissance ? Tu lui desobeis, pour
obeir à tes concupiscences, & meschantes volontez. Si
tu repliques que c'est à cause qu'il est ton Createur : &
dautant es-tu plus meschant, & digne d'vne plus grande
condemnation, de ce qu'estant tel, tu le mescognois,
mesprises & reiettes. Si Dieu mesmes vouloit traiter
l'homme en sa iustice, qui est celui auquel il feroit quelque
grace ? Ne les abysmeroit il point tous au fond d'enfer,
comme ils ont bien merité ? Il les peut tous iustement
condamner, car ils ont tous merité la mort. C'est
donc vne grande grace qu'il fait, & vn tesmoignage d'vne
[ne]

misericorde infinie, de ce qu'il en daigne retirer quelques
vns de ceste damnation en laquelle ils sont tombez
par leur peché. Que si tu demandes, pourquoi il le
fait plustost à vn autre qu'à toi ? il te respondra, pour ce
qu'il lui plaist. Si les subiects de quelque Prince ont
tous merité d'estre pendus, & qu'il plaise au Prince de
faire grace à quelqu'vn, les autres pourront-ils accuser
le Prince, de ce qu'il les fait pendre ? Et s'ils lui demandent
raison de son execution, ne leur respondra-il
point, pour ce qu'ils l'ont merité : & alors ne faudra-il
pas qu'ils ayent la bouche fermee ? Aussi, dautant que
la perdition vient de l'homme, comme Dieu dit par son
prophete Osee au 13. chap. vers. 9. Ta perdition est de
toi, ô Israel. il faudra, finalement, comme dit Dauid au
Pseaum. 51. vers. 6. que le Seigneur soit iustifié en ses
paroles, & soit victorieux quand il sera iugé. Qui
est-ce donc qui pourra accuser Dieu, quand il n'auroit
point fait ouir sa parole, & n'auroit point reuelé
son bras à pas vn des peuples & nations qui sont
sur la terre, veu qu'il n'y est pas tenu ? Les paroles du
ciel & de la terre, comme dit Dauid au Pseau. 19. ne racontent-
elles pas la gloire de Dieu ? Le firmament n'annonce-
il pas l'ouurage de ses mains ? Le iour ne desgorge-
il pas propos a l'autre iour ? La nuict ne declare-elle
pas science à l'autre nuict ? Leur propos, comme dit
S. Paul au 10. des Rom. n'est-il point allé iusques au
bout du monde ? D'ou vient que les hommes n'oyent
point ceste parole & ce son ? N'est-ce point l'homme,
lequel se bouche lui mesmes les yeux & estouppe les oreilles ?
Dauantage, ceste conscience, & ces pensees accusantes
& excusantes, desquelles parle l'Apostre au 2.
chap. des Rom. ne parlent-elles point ? S'il faut mesmes
venir à la parole & à la Loy, y a-il gueres peuple & nation
en la terre, auiourdhui, ou l'Euangile n'ait esté
presché autrefois ? C'est donc vne pure folie à l'homme,
de se vouloir excuser de ce qu'il est sourd, aueugle, &
endurci, veu que Dieu ne l'a pas creé tel, mais qu'il est

deuenu tel par son peché, lequel a ainsi depraué & corrompu
sa nature & ceste image excellente, en laquelle
Dieu l'auoit premierement creé. Et Dieu laisse en leur
naturel ceux ausquels il ne veut pas faire misericorde,
& les condamnera aussi selon leur naturel : mais il change
& renouuelle ceux ausquels il fait grace. Et ceci
nous sert pour remedier au scandale, lequel autrement
se pourroit engendrer, de ce qu'on voit si peu de personnes
à qui ce bras de Dieu soit reuelé, c'estassauoir,
que cela vient de la corruption & peruersité de l'homme ;
laquelle, pour ceste occasion, le Prophete redargue
& reprend ici si asprement : afin que nous ne trouuions
pas estrange, si cest aueuglissement & endurcissement se
voit encore auiourd'hui au monde. Le Prophete par sa
complainte l'a signifié : car il n'a pas seulement parlé de
son temps ; mais, par l'Esprit de Christ, a prophetizé
quelle authorité ce bras de Dieu, c'estadire, ce salut arresté
de tout temps au conseil de Dieu, & manifesté en
la plenitude des temps ; lequel deuoit estre executé par
Christ, & offert aux hommes par la predication de l'Euangile,
auroit au monde. Dauid, & les autres Prophetes
l'ont aussi tous predit d'vne mesme voix, appellant
Christ, qui est le vrai bras de Dieu, le seul Sauueur, & le
seul Salut ; tantost la pierre reiettee, & tantost la pierre
de scandale : & ce pendant, quand Dieu a enuoyé Christ
au monde, c'est alors ou ce grand bras s'est reuelé. Il
s'estoit au parauant monstré en la deliurance d'Egipte,
en celle de Babylone & plusieurs autres particulieres ;
mais tout cela, n'estoit rien au pris du bras qui s'est
manifesté à la venue de Christ. Car, le premier bras n'auoit
combatu que des Egyptiens, Babyloniens & autres
hommes : mais ce bras de Dieu, Christ, a combatu les
diables, l'Enfer, la Mort, le Peché, & le Monde. Voila
pourquoi le prophete Dauid, au Pse. 118. sous la figure de
ses deliurances, parlant de ceste grande qui deuoit estre
faite par Christ, repete par plusieurs fois, La dextre du
Seigneur est hautaine, la dextre du Seigneur a fait vertu :
[Ceste]

Ceste chose est faite par le Seigneur, & est merueilleuse
deuant nos yeux. Il a chassé les diables hors des corps : il
a commandé a la Mer & aux Vents : il a commandé aux
maladies de sortir, & de laisser ceux qu'elles detenoyent :
il a fait ouurir les sepulchres, & a rompu les chesnes
de la mort : bref il a commandé au ciel & à la terre : & en
departant de ce monde il a dit, que toute puissance lui
estoit donnee. Les Iuifs ont veu ce bras, & en ont esté estonnez :
iusques a dire, que iamais on n'auoit veu vne
telle puissance ; & neantmoins, a qui est-ce d'eux à qui
il est reuelé ? a douze poures pescheurs, & a quelques
petites femmellettes. En sa resurrection mesmes, en laquelle
s'est veu comme vn des plus grands effort de ce
bras, de poures & simples femmes en sont les premiers
tesmoins. Christ est monté au ciel, & estant assis à la
dextre du Pere a monstré la grande force de ce bras,
enuoyant son S. Esprit sur les Apostres, les faisant parler
toutes sortes de langues en la presence de tout le
peuple : qui est-ce qui recognoist ce bras ? Au contraire,
le peuple dit, que les Apostres sont yures : tout ainsi que
ils auoyent dit, quand Christ auoit chassé les diables
hors des corps, que c'estoit en la puissãce de Beelzebub.
Il leur a donné puissance de faire miracles, de guerir les
malades, chasser les diables, & resusciter les morts : Et ce
bras de Dieu s'est encore plus puissamment monstré apres
son Ascension au ciel qu'il n'auoit fait au parauant,
à cause qu'il s'est espandu par toute la terre, & a
on-veu le changemẽt merueilleux qui a esté fait, quand
par la predication de l'Euangile, les hommes ont esté
retirez de leur aueuglissement & idolatries, pour estre
conuertis au vray Dieu ; & que ce que Ioel, & les autres
Prophetes auoyent predit de l'exaltation de ce bras, a
esté accompli ; mais ce pendant, si on considere le nombre
de ceux ausquels il a esté reuelé pour en faire comparaison
auec le reste du monde, ne peut-on point dire,
a qui est-ce qu'il a esté reuelé ? Neantmoins, il y auoit
vn merueilleux changement : Le loup habitoit auec la

brebis : le Leopard & le cheureau couchoyent ensemble,
le Veau, & le Lyonceau & autre bestail estoyent ensemble,
& vn enfant les conduisoit, & le monde ne voyoit
point cela : comme encores auiourdhui il ne voit
point les mesmes effects, & efforts de ce bras. Or, tout
ainsi que nous auons occasion auec le Prophete de nous
escrier par vn estonnement merueilleux, aussi auons
nous besoin de prier Dieu, qu'il lui plaise nous ouurir
les yeux de l'entendement, pour voir les merueilles que
fait ce bras, qui se manifeste par la predication de l'Euangile,
au salut, & en la protection des fideles, & en la
ruine, & destruction des meschans. Car Dieu le monstre
auiourdhui si iamais il le monstra : Et combien que les
meschans s'en endurcissent, faisons en nostre proffit, afin
que recognoissans ceste vertu & puissance, laquelle
Dieu desploye, cela nous asseure de plus en plus de nostre
deliurance, & de la ruine des meschans ; comme finalement
nous verrons, & l'vn & l'autre, en son parfait,
& entier accomplissement, quand ce grand bras, & ceste
grande puissance de Dieu, se manifestera pour la derniere
fois, enuoyant les meschans en enfer, & nous retirans
au ciel, pour viure & regner eternellement auec
lui. Amen.