SERMONS
SVR LE
CHAPIT. SEPTIESME
de l'Epistre aux Hebreux.

Melchisedech estoit Roy de Salem,Sacrificateur
du Dieu souuerain , lequel vint au
deuant d'Abraham, comme il retournoit
de la deffaite des Rois,& le benit . Auquel
außi Abraham departit la disme de tout,
& premierement est interpreté Roy de
Iustice: & puis außi Roy de Salem,c'est à
dire,Roy de Paix: sans pere,sans mere,
sans genealogie , n'ayant commencement
de iours , ne fin de vie : mais estant fait
semblable au Fils de Dieu, il demeure
Sacrificateur à tousiours .

LA Sapience Diuine s'est
rendue admirable és escripts
des Prophetes , en ce que
par diuers oracles elle a predit
le Christ, & representé sa personne,
ses charges,& les biens qui nous en viennent,
plusieurs siecles auant l'accomplissement
des choses,lors que la pensee
n'en pouuoit monter au cœur d'aucun
homme. Car cela n'a peu estre fait que
par l'Esprit Eternel, à qui les choses les
plus esloignees sont presentes.Mais,outre
cela, mes freres, il y a deux choses à
remarquer: L'vne , que ces Escritures
se trouuent estre dictees par vne si haute
sagesse,que les choses les plus simples
couurent des mysteres,& que, bien que
la superficie des paroles ait peu d'apparence,
le fonds contient les merueilles
de l'œuure de la Redemption , & les
choses profondes du Royaume de Dieu.
A raison de quoy Iesus Christ nostre
Seigneur, distinguant la profondeur
d'auec la superficie des passages de l'Escriture
prophetique,disoit, Sondez les Escritures,
car elles rendent tesmoignage de
moy . Iean 5.

L'autre chose est, que toutes les expressions
des Escritures sont d'vne si
grande & parfaite verité,qu'il n'y a rien
en elles, qui ne doiue auoir son accomplissement.
Vn jota ou vn poinct, comme
dit Iesus Christ nostre Seigneur,n'en
doit passer, sans estre accompli. La chose
qui n'a pas eu sa verité, ou n'en a eu
qu'vne ombre en la figure , doit trouuer
son corps,c'est à dire,son entier accomplissement
au Messie.

Ces choses , mes freres , estoyent reconnues
& aduoüees par les Iuifs , du
temps de Iesus Christ nostre Seigneur
& des Apostres. Car ils reconnoissoyent
que le Messie estoit regardé par toute
l'Escriture; & que tout ce qu'il y auoit
eu, & de promesses , & de ceremonies,
& de grands personnages , auoyent esté
comme des lignes qui aboutissoyent au
Messie , ainsi qu'à leur centre. Et que
les Escritures estoyent d'vne verité si
diuine, que tout ce qui y estoit proposé,
deuoit auoir vn entier accomplissement;
d'où s'ensuiuoit que s'il ne l'auoit
eu à certain esgard , il le deuoit auoir à
vn autre.

C'est sur ces fondemens que nostre
Apostre dispute contre eux en cette
Epistre, escriuant aux Hebreux fideles,
& les munissant d'arguments des Escritures,
contre leurs compatriotes qui demeuroyent
incredules. Et c'est particulierement
sur ces fondemens qu'il met
en auant la personne de Melchisedech,
comme type & figure du Messie, afin de
monstrer par elle quelle deuoit estre la
Sacrificature du Messie , assauoir vne sacrificature
eternelle : puis qu'il estoit
dit au Pseaume 110. Tu es Sacrificateur
eternellement à la façon de Melchisedech .

Les Iuifs estimoyent que le Messie ne
deuoit point estre autrement Sacrificateur,
que l'auoit esté Aarõ: & croyoyent
que la sacrificature d'Aaron deuoit durer
à iamais , & que le Messie venant la
continueroit , & y assujettiroit toutes
les Nations.A l'opposite l'Apostre monstre
que la Sacrificature du Christ deuoit
estre de toute autre condition que celle
d'Aaron, assauoir vne Sacrificature qui
residast à iamais en la seule personne du
Messie, sans passer à vn autre : qu'autrement
il ne seroit pas Sacrificateur eternellement :
[nellement]

D'abondant vne sacrificature
conjoincte à vne Royauté ; Sacrificature
par consequent plus excellente
que celle d'Aaron , car Aaron n'estoit
pas Roy & Sacrificateur tout ensemble.
Et de là s'ensuiuoit que la sacrificature
d'Aaron deuoit prendre fin ; veu que ce
qui est moins parfait & moins excellent
doit faire place à ce qui est plus excellent.
Mesmes l'Apostre infere de là,
que le Messie deuoit establir vn nouueau
seruice,vn nouueau culte, puis que
par luy deuoit estre changee la sacrificature :
Pource que là où il y a changement
de sacrificature il y a necessairement
changement de Loy. Et particulierement
l'Apostre monstre par l'Eternité
de la sacrificature du Messie , son
entree au Ciel,& la necessité de sa comparution
deuant Dieu, afin d'exercer sa
sacrificature par vne intercession continuelle:
& qu'ainsi estant vrayement Sacrificateur
à iamais , l'Escriture obtient
la pleine verité de ses predictions.

L'Apostre donc,ayant dit,au premier
verset du chapitre precedent , que Iesus
Christ auoit esté fait Sacrificateur eternellement

à la façon de Melchisedech ; qui estoyẽt
les paroles du Pseaume 110. qu'il auoit
desia citees au chapitre 5. Il passe maintenant
à vn plein accomplissement de
cette Prophetie en ces mots:

Car ce Melchisedech estoit Roy de Salem,
Sacrificateur du Dieu Souuerain;lequel vint
au deuant d'Abraham, comme il retournoit
de la deffaite des Rois , & le benit , auquel
außi Abraham departit la disme de tout:&
premierement est interpreté Roy de Iustice,
& puis außi Roy de Salem , c'est à dire , Roy
de Paix : sans pere, sans mere, sans genealogie,
n'ayant commencement de iours ne fin
de vie;mais estant fait semblable au fils de
Dieu , il demeure Sacrificateur eternellement
En quoy nous auons à considerer
deux poincts.

I. Quel est l'Argument de l'Apostre,
& quelle sa force, en cette particule,
Car.

II. Quelle a esté la conuenance entre
Iesus Christ & Melchisedech.

Cette particule, Car, est fondee en
[deux]

deux raisons: l'vne est que la Prophetie
du Pseaume 110. (où Dieu dit au Messie,
Tu es Sacrificateur eternellement ) deuoit
auoir son accomplissement.Que donc il
falloit qu'il y eust de la conuenance entre
Christ & Melchisedech,& que Iesus
Christ eust le corps de toutes les choses
dont l'ombre auoit esté en Melchisedech :
pour cela donc l'Apostre represente
ce que l'Escriture dit de Melchisedech.

L'autre raison est, que toutes les personnes
notables auoyent eu quelque
rapport au Messie , & auoyent toutes
quelque conuenance & conformité
auec luy, & quelque esgard pour lequel
elles auoyent esté figures de ses perfections:
D'où s'ensuiuoit qu'à plus forte
raison Melchisedech, ce grand personnage ,
Roy & Sacrificateur ensemble,
dont Abraham auoit receu la benediction,
& lequel Abraham auoit honoré
de la disme de tout ce qu'il auoit,deuoit
estre par excellence type & figure de
Christ.

Ce que pour entendre, sçachez, mes
freres,que comme tout ce qui est en l'Vniuers

a esté fait pour estre vn tableau
des perfections de Dieu le Createur : en
sorte que plus les creatures sont excellentes ,
plus elles ont de l'image de
Dieu. Ainsi Dieu a voulu que l'Escriture
fust le tableau auquel fussent representees
ses vertus & ses effects au regard
de l'œuure du salut & de la redemption:
& que tout ce qu'il auoit , non seulement
de ceremonies , mais aussi de personnages
notables de l'Ancien Testament,
fust comme vne idee de ce qu'il y
auoit à considerer au Mediateur, ou Redempteur ,
soit au regard de sa personne,
soit au regard de ses effects.

Dés le commencement , vn Adam
chef du monde,creé par la seule vertu de
Dieu , formé sans œuure d'homme, &
pris d'vne terre vierge & pure , non encores
ouuerte par le soc & labouree de
l'homme ; a esté la figure du Christ le
nouuel Adam, qui est le chef d'vn monde
nouueau, & a esté formé, sans œuure
d'homme, de la substance d'vne Vierge
par la vertu du S.Esprit : Et cet Adam
pechant, & par sa desobeïssance engageant
en la mort toute sa posterité, a
[esté]

esté, par vn rapport de contrarieté, la figure
du Messie obeïssant à Dieu & par
son obeïssance donnant la vie à sa posteritè.
Ce mesme Adam donnant estre à
Eve son espouse de son costé , pendant
son profond sommeil , a esté le type &
la figure du Mediateur donnant estre à
son Eglise par le sommeil de mort en la
Croix, & par le sang & l'eau qui sortirent
de son costé : tellement que vous
voyez desia en Adam , le Christ & chef
du monde nouueau. Et quand vous
voyez Abel mourant innocemment par
la main de son frere,y auez vous pas vne
ombre du Christ mourant innocemment
par la main des Iuifs ses freres selon
la chair? Enoch esleué au Ciel,apres
auoir vescu sainctement icy bas , est la
figure de ce Mediateur esleué au Ciel
apres l'innocence de sa vie en la terre.
Voyez-vous Noé sauuant du deluge sa
famille par son arche? ç'a esté la figure
de ce Mediateur qui par le bois de la
Croix garantit son Eglise des tempestes
de l'ire de Dieu, & qui par les eaux de
son Baptesme, nous deliure de la mort,
& nous mene à salut. Car, comme les

eaux, qui destruisoyent & noyoyent le
monde,esleuoyent l'arche en haut,& la
sauuoyent;les eaux du Baptesme de nostre
Noé , en destruisant le monde & le
peché,donnent vie à nos ames. Voyez-
vous encor Noé offrant vn sacrifice,duquel
Dieu flaira vn odeur d'appaisement,
& protesta d'estre appaisé enuers
la terre? C'est la figure du Christ presentant
vn sacrifice à Dieu en odeur de
bonne senteur,sur lequel Dieu proteste
d'estre appaisé enuers nous , & n'auoir
plus aucune souuenance de nos pechés.
Isaac né selon l'Esprit,c'est à dire,selon
vne vertu surnaturelle , & non par la
vertu naturelle d'Abraham & de Sara,
estoit la figure de la naissance spirituelle
du Messie : & luy mesme portant , au
commandement de son pere, le propre
bois sur lequel il deuoit estre offert &
estendu , & en suite passant de mort à
vie en vn moment, le glaiue de son pere
estant retenu lors qu'il auoit à donner
le coup de mort ; a-il pas esté la figure
du Christ , qui pour obeïr au commandement
de son Pere , a porté sur soy la
Croix, a esté estendu sur elle,& est passé
[de]

de la mort à la vie par sa resurrection?
Et remarquez qu'Isaac fut mené en la
contree de Morija pour y estre immolé,
qui estoit la mesme contree où Iesus
Christ a esté crucifié. Iacob luictant
auec Dieu,& emportant sa benediction,
& obtenant le nom d'Israël, a esté la figure
de ce Messie , qui en luictant contre
Dieu dans les trauaux de la Croix,
l'a vaincu,& a obtenu la benediction de
laquelle nous estions priués. Ce mesme
Iacob espousant ses deux femmes,
a figuré Iesus Christ au regard de la Synagogue,
& de l'Eglise Chrestienne,
celle-cy la bien-aimee, comme Rachel,
laquelle ayant esté sterile,finalement a
esté mere fertile , par la vocation des
Gentils. Ioseph vendu par ses freres,&
par ses souffrances esleué au gouuernement
d'Egypte,pour donner la vie à ses
freres pendant la famine, est-il pas aussi
le type de nostre Christ persecuté par
ses freres, & esleué par ses souffrances
au gouuernement du Ciel & de la terre,
pour donner vie & nourriture spirituelle
à toute sa famille ? Moyse deliurant
son peuple de l'Egypte, le passant à trauers

la mer rouge,en laquelle ses ennemis
furent noyés,a-il pas esté vne figure
illustre de ce Liberateur qui a retiré son
peuple de l'Egypte spirituelle, & a noyé
ses ennemis en la mer rouge de son
sang, & qui ayant fait passer son peuple
par les eaux de son Baptesme, le nourrit
en ce desert d'vne manne celeste,& des
eaux saillantes en vie eternelle?Ce mesme
Moyse intercedant pour le peuple,se
mettant entre Dieu & eux, & demandant
d'estre fait anatheme pour eux,est-
il pas le type de ce Mediateur qui s'est
mis entre Dieu & nous , & a esté fait
malediction pour nous ? luy aussi montant
en la montagne, & donnant la loy,
a-il pas esté figure de ce Mediateur qui
estant monté au Ciel, a enseigné son
Eglise par son Esprit, & a escrit sa loy és
tables charnelles de nos cœurs? Ie laisse
icy l'agneau occis en Egypte pour la
rançon des premier-nés & dont le sang
garantissoit du glaiue de l'Ange destructeur.
Ie laisse le Rocher,duquel , vne
fois frappé , deuoyent descouler continuellement
des eaux pour abbreuuer
le peuple : lequel monstroit ce Mediateur,
[teur,]

qui vne fois frappé de la verge de
l'ire de Dieu , & par vne seule oblation,
deuoit estre à l'Israël de Dieu vne source
eternelle de vie & de consolation. Ie
laisse vn Aaron expiant les pechés par
ses sacrifices & entrant auec le sang de
la victime immolee dedans le Sanctuaire
de Dieu, pour là interceder pour le
peuple. Vn Iosué, introduisant par ses
combats le peuple en Canaan, figure de
ce vray Iesus qui par ses combats introduit
son peuple en la Canaan celeste.
Vn Samson faisant ses grands exploicts
par sa mort & vainquant ses ennemis en
mourant, vray type de ce Messie qui par
sa mort a destruit toute la puissance de
Satan. Vn Dauid dont les persecutions,
les combats & les victoires , ont esté figures
de la condition de nostre Christ.
Vn Salomon duquel Dieu affermit le
Royaume, & qui bastit vne maison à
l'Eternel : vraye figure de ce Messie,duquel
le regne demeure à iamais, & qui a
basti vne maison à l'Eternel,assauoir son
Eglise.

Nostre Apostre donc a raison de recercher
& poser vne conuenance entre le

Christ & Melchisedech. Car vn personnage
si qualifié , que d'auoir ensemble
les deux dignités (lesquelles ne pouuoyent
estre possedees par vne mesme
personne en Israël) assau.celle de Roy &
celle de Souuerain Sacrificateur , & qui
de plus eut sur Abraham la prerogatiue
de le benir, & de receuoir de luy la disme,
en tesmoignage d'honneur & de reuerence,
ne peut qu'il n'ait esté vne tres-
remarquable figure du Christ. Car si de
moindres que cettui cy l'ont esté, il faut
que cettuy-cy le soit encor plus.

Or quand à cette conuenance, N'attendez
pas que nous vous disions quel a
esté ce Melchisedech, autrement que
par ce que l'Escriture nous en propose,
assauoir qu'il a esté Roy de Salem, & Sacrificateur
du Dieu Souuerain:Car vouloir
dire son extraction & sa genealogie,
n'est pas seulement temerité, mais aussi
audace & impieté. Tout de mesme que
si on recerchoit le lieu particulier , où a
esté enseuely le corps de Moyse, & si on
[entre-]

entreprenoit à le designer : l'Escriture Deut. 34. vers.6.
disant que nul n'a connu son sepulchre
iusqu'à ce iourd'huy. Ou, comme qui
entreprendroit de dire le iour & l'heure
du dernier iugement, duquel l'Escriture
nous dit, que nul ne le sçait, non pas
mesmes les Anges du Ciel , ni le fils de
l'homme, assauoir entant qu'homme.
Mais ie di que c'est destruire le mystere
lequel l'Esprit de Dieu nous propose en
Melchisedech. Veu que c'est ce silence
de la Genealogie de Melchisedech qui
sert de fondement au mystere de l'eternité
de Iesus Christ , laquelle l'Apostre
nous propose : car il bastit là dessus la
conuenance de Christ & de Melchisedech.
Si on sçavoit la genealogie de
Melchisedech , l'Apostre ne pourroit
pas dire qu'il est sans pere & sans mere
& sans genealogie , & semblable au fils
de Dieu : Il est donc du mystere & de
la conuenance qui est entre Christ &
Melchisedech, que cela ne se sçache
pas.

Les Iuifs, qui ne reconnoissent pas
ce mystere , disent que Melchisedech
estoit Sem fils de Noé. Mais l'Escriture

l'eust nommé, si cela eust esté, & ne luy
eust pas changé son Nom. Adjoustez
que les Cananeëns qui estoyent de la
posterité de Cham,auoyent trop d'inimitié
contre Sem, que de l'auoir pris
pour leur Roy. Aussi se rejette l'opinion
de ceux qui ont dit que c'estoit vn Ange,
car il est proposé comme Roy de Salem
& Sacrificateur du Dieu Souuerain,
qui ne sont pas les qualités d'vn Ange,
mais d'vn homme. Et, quant à la ville
ou territoire de Salem, dont ce Melchisedech
estoit Roy : plusieurs estiment
que c'est Ierusalem, laquelle soit simplement
appelee Salem au Pseaume 76.
Dieu est connu en Iudee,son renom est grand
en Israël, & son tabernacle est en Salem, &
son domicile en Sion . Salem estant à dire
Paix, & Ierusalem, on verra la paix , le
mot simple pouuant estre mis pour le
composé. D'autres estiment que cette
Salem estoit vne ville situee au riuage
du Iordain , de laquelle il est parlé en
S. Iean chap.3. où il est dit que Iean baptizoit
en Enon pres de Salim, pource qu'il
y auoit là beaucoup d'eaux :& que Salim est
escrit par vn [i] ou par vn [e] cela est indifferent,
[different]

pource que le poinct n'estant
pas au mot Hebreu, on en donne le son
par [i] ou par [e]:Et les raisons de ceux-
cy sont que S. Hierosme en l'Epistre à
Euagrius recite , qu'il y auoit de son
temps aupres de Scytopolis,vne ville laquelle
on appeloit encores Salem , &
qu'on y monstroit les ruines du Palais
de Melchisedech , par la grandeur desquelles
on pouuoit iuger de la magnificence
de l'ouurage. Secondement, ils
alleguent que Ierusalem estoit enuironnee
de montagnes:Or qu'il est parlé
Gen 14. du champ de la plaine , où se
fit cette rencontre : d'où ils inferent
que ce ne fut pas autour de Ierusalem.
Mais ce debat nous est indifferent. Il
nous suffit que Salem estoit vne ville
ou vn territoire en Canaan ; dont ce
Melchisedech estoit veritablement
Roy.Ce qui appert de ce que Melchisedech
apporta des viures pour le rafraichissement
des troupes d'Abraham
comme il est recité que les gens d'Abraham
mangerent:Gen.14.

Or vous pourriez vous estonner,que
lors en vne contree idolatre, il y eust vn

Roy seruant au vray Dieu, & de plus vn
Roy,Sacrificateur du Dieu Souuerain:le
vray Dieu estant ainsi nommé à la difference
des faux dieux. Car la corruption
de ce siecle-là se peut reconnoistre par
la famille d'Abraham, dont le pere & le
grand pere estoyent idolatres. Sur quoy
nous disons premierement , que Dieu,
parmy les nations les plus idolatres &
corrompues, a suscité des personnes qui
le seruissent & le craignissent,afin qu'ils
fussent comme des estoilles esclairantes
au milieu des tenebres. Tel a esté vn
Iob entre les Orientaux:tel en Madian
vn Iethro beau-pere de Moyse , qui
monstre par diuers effects de sa pieté
qu'il seruoit le vray Dieu.Tel aussi estoit
ce Melchisedech : Car Dieu n'a point
voulu se laisser sans tesmoignage au milieu
de l'infidelité du monde. Secondement ,
il faut remarquer qu'encor que
Dieu eust traitté alliance auec le peuple
d'Israël, & eust resserré sa connoissance
à la famille d'Abraham , auant cette restriction
sa connoissance estoit indefiniment
entre les descendans de Noé , selon
que l'election de Dieu se rencontroit.
[troit.]

Et quant à la qualité de Sacrificateur,
vous auez à remarquer trois choses:
L'vne,que ce n'a esté que depuis la
loy de Moyse qu'il n'a esté permis de
sacrifier qu'à certaine famille , assauoir
à celle de Leui , & en certain lieu , assauoir
au Tabernacle : Auant cela il n'y
auoit point de restriction ; tout chef de
famille estant Sacrificateur en sa maison.
Cela se voit en Noé , en Iob, en
Abraham,Isaac,& Iacob.La seconde est,
que ce n'a esté que par la loy de Moyse,
que la dignité Sacerdotale a esté separee
de la Royauté; & partant qu'auant l'ordre
donné par la loy , il n'y auoit rien
d'incompatible en ces deux qualités.
Aussi entre quelques anciens peuples,les
Rois estoyent les Sacrificateurs,comme
entre les Spartins ; de quoy nous parlerons
en son lieu : Mais il faut en Melchisedech
reconnoistre quelque Sacrificature
extraordinaire , par laquelle
Melchisedech eust quelque prerogatiue
sur Abraham. Car puis qu'auant la loy
chaque chef de famille estoit Sacrificateur ,
& qu'Abraham l'estoit par
consequent , comment est-ce que
Melchisedech est appelé Sacrificateur

a l'esgard d'Abraham? Et comment
Abraham a-il peu receuoir sa benediction,
& luy donner la disme ? Nous respondons
donques deux choses. Premierement,
qu'Abraham n'estoit qu'vn Sacrificateur
domestique & priué,comme
chaque chef de famille l'estoit en sa famille :
mais que Melchisedech estoit
Sacrificateur public,estant Sacrificateur
comme Roy sur toute vne contree. Secondement,
qu'il y auoit quelque vocatiõ
& authorité extraordinaire en Melchisedech,
qu'Abraham reconnoissoit.

Mais venons à la conuenance qui
estoit entre Christ & Melchisedech.Il y
a conuenance en plusieurs chefs , assau.
premierement au nom de Melchisedech:
Melchisedech estant vn mot Hebreu,
qui signifie Roy de Iustice: 2. Au titre
de Roy de Salem , c'est à dire,Roy de paix.
3. En la qualité de Roy & Sacrificateur
tout ensemble. 4. En ce qu'il benit
Abraham. 5. En ce qu'il receut la disme
d'Abraham. 6. En ce qu'il estoit sans
pere & sans mere, sans genealogie, sans
commencement de vie , & sans fin de
iours. De tous lesquels chefs ce dernier
semble le plus important, comme
[aussi]

aussi il est le plus difficile. Ie di plus important,
pource que l'Escriture par tout
où elle parle de Christ & de Melchisedech,
a determiné la conuenance de l'vn
auec l'autre, en l'eternité de la sacrificature :
Car remarquons premierement qu'elle
n'a pas dit simplement, Tu es Sacrificateur
à la façon de Melchisedech,mais,tu
es Sacrificateur eternellement à la façon
de Melchisedech.Secondement,nostre
Apostre dit [ cettui-cy estant fait semblable
au Fils de Dieu,demeure Sacrificateur à
tousiours .] Item [ Vn autre à la façon de
Melchisedech est mis en auant , lequel n'a
point esté fait Sacrificateur selon la loy du
commandement charnel , mais selon la puissance
de la vie non perissable .] Item, quant
aux Sacrificateurs, assauoir de Leui,il en a
esté fait plusieurs, pource que la mort les empeschoit
de durer,mais cettui-cy,pource qu'il
demeure eternellement a une sacrificature .
Vous voyez donc que la façon dont
Melchisedech a esté Sacrificateur est
constituee en l'eternité ou perpetuité.
Or remarquez cela , en passant, contre
l'Eglise Romaine , qui pretend que la
conuenance de Melchisedech & de

Christ consistoit en la chose que Melchisedech
auoit accoustumé de sacrifier,
assauoir pain & vin. Car l'Escriture
ne nous dit point quelle matiere & espece
de choses Melchisedech sacrifioit.
Ce qui monstre que la conuenance de
Iesus Christ & de Melchisedech ne
consistoit point en cela. Puis donc que
l'eternité est la principale & essentielle
conuenance entre Christ & Melchisedech ,
c'est d'elle que nous parlerons la
premiere, & reseruerons les autres pour
vne autre action.

Pour cet effect d'entree remarquez
que l'Apostre dit que Melchisedech a
esté fait semblable au Fils de Dieu : au lieu
que Melchisedech ayant precedé , il
semble qu'il deuoit dire , que Iesus
Christ a esté fait semblable à Melchisedech.
Cettui-cy, dit-il, estant fait semblable
au Fils de Dieu, demeure Sacrificateur à
tousiours . Mais l'Apostre a ainsi parlé
pour deux raisons:L'vne, qu'encor que
Iesus Christ, quant au temps de son exhibition,
ait esté posterieur aux ombres
& figures;neantmoins quant à l'idee de
l'entendement diuin,Iesus Christ les a
[precedé:]

precedé : & c'est sur luy que ces figures
ont esté formees , & non luy sur elles;
Et pourtant, à parler proprement, Melchisedech
a esté fait semblable au Fils
de Dieu, & non le Fils de Dieu à Melchisedech:
Car la copie est faite semblable
à l'original , & non l'original à la
copie : la personne n'est pas faite semblable
à son tableau,mais son tableau est
fait semblable à elle. Comme donc
Moyse fit le Tabernacle selon le patron
que Dieu luy en monstra en la montagne :
Aussi la verité des choses de l'Euangile
& de l'estat de Christ, a esté l'idee
selon laquelle Dieu a donné & formé
de temps en temps des figures. Ainsi
Dieu voulant que son Fils fust vn iour
offert en sacrifice , pour arrester par son
sang le glaiue de sa vengeance , institua
sur ce modele qu'vn agneau fust occis,
qui par son sang preseruast du glaiue de
l'Ange destructeur. Et pource que Iesus
Christ deuoit estre pris d'entre ses freres
pour estre Sacrificateur , Dieu ordonna
en sa loy, que le Sacrificateur fust
pris d'entre ses freres. De mesme la
Prouidence Diuine a adressé les combats

d'vn Dauid, & les victoires d'vn
Iosué , selon l'idee de son Christ , formant
ces ombres selon le corps, & ces
figures selon l'image viue des choses.

L'autre raison pour laquelle l'Apostre
dit , que Melchisedech a esté fait
semblable au Fils de Dieu , & non le
Fils de Dieu semblable à Melchisedech,
est, que s'agissant icy d'vne eternité; la
vraye eternité ne peut pas estre faite;
car si elle estoit faite , elle ne seroit pas
eternité, puis qu'elle auroit commencé:
mais vne apparence d'eternité peut
bien estre faite. Comme ainsi soit donc
que le Fils de Dieu ait eu la vraye eternité,
c'est à dire, ait esté de tout temps;
l'Apostre n'a peu dire que le Fils de
Dieu ait esté fait semblable à Melchisedech,
mais bien que Melchisedech a
esté fait semblable à luy : car Melchisedech
n'a peu auoir qu'vne apparence
d'eternité : (afin que vous remarquiez
combien l'Escriture est exacte en ses expressions.)
Et par cecy nous tenons desia
quelque chose de ce que nous cerchons.
Car c'est beaucoup,si nous posons cecy,
comme en effect l'Apostre le pose, assauoir
[uoir]

que l'eternité de Melchisedech n'a
pas esté vne vraye eternité , mais vne
eternité faite, & par consequent vne
eternité non eternité ; mais vne petite
ombre d'vne verité qui est ailleurs. Cecy,
di-ie,est beaucoup,pource qu'il nous
sera assez aisé de trouuer en Melchisedech
vne eternité en ombre seulement
& apparence. Et si nous nous contentons
de cela , nous ne trouuerons pas
estrange qu'vn homme, qui en effect aura
eu pere & mere, commencement de
vie, & fin de iours ( comme nous ne
doutons point que Melchisedech ait eu)
paroisse neantmoins comme s'il ne l'auoit
pas eu. Or nous pouuons encor
forcer les contredisans à se contenter de
cela,par cette raison,assauoir,Que l'ombre
& le corps, la figure & la verité, sont
choses opposees : Si donc le Christ a la
verité de l'eternité,Melchisedech ne l'a
sinon en ombre & apparence : car Melchisedech
ne feroit pas figure, s'il auoit
la verité. Et c'est ce que n'ont pas compris
tous ceux qui se sont trauaillés à
trouuer vne veritable eternité de Melchisedech.

Et quoy? ne voyons-nous pas au chapitre
II. de cette Epistre , que l'Apostre
attribue à Isaac vne espece de resurrection,
consistant en ce que le glaiue dont
il deuoit estre frappé , ayant esté en vn
instant arresté,il fut comme tout soudainement
retiré de la mort & ressuscité,&
que par cette resurrection il a esté figure
de Christ, ainsi que par son immolation?
Or cela n'estoit qu'vne petite semblance
de resurrection ; Donc aussi vne petite
semblance d'Eternité peut suffire en
Melchisedech.En nostre Baptesme nous
sommes faits vne mesme plante auec
Iesus Christ , à la conformité de sa
mort & de sa resurrection , & cela
[quant à l'exterieur] pour vne petite
& legere apparence, bien esloignee
de la chose ; assauoir en ce que l'eau est
mise sur nostre teste en signe de mort, &
en est ostee en vn instant en signe de vie.
Et tous les Sacremens(or les Sacremens
sont d'entre les figures les plus expresses)
n'ont qu'vne legere conuenance &
similitude à ce dont ils sont Sacremens.
Et neantmoins pour vn peu de conuenance
ils portent le nom de ce dont ils
[sont]

sont Sacremens, comme s'ils en auoyent
la verité mesme. De mesme, pour vne
petite apparence, la condition de Melchisedech
est proposee comme vne
eternité. Voire quand Dieu a voulu donner
des images de sa perfection en la
Nature, il a donné des choses qui sous
vne apparence de ce qu'il est , ont en
effect le contraire : Pour exemple , le
Soleil est dans vn mouuement continuel,
& neantmoins vous diriez qu'il ne
se bouge : C'est l'image de l'immobilité
de Dieu dans son actiueté infinie. Le
Soleil donc, bien qu'il n'ait point en
effect l'immobilité,mais seulement vne
apparence, est l'image de laquelle Dieu
agit sans se mouuoir. Pourquoy donc
de mesme,en l'Escriture , ne nous contenterons-
nous de quelque legere apparence
pour representer l'eternité du
Mediateur?

Or cela posé que l'eternité de Melchisedech
ne deust point estre reelle,
mais typique & figuratiue, c'est à dire,
vne apparence seulement d'eternité : Ie
di que l'eternité n'a peu estre mieux figuree
& ombragee que par vn estre dont

le commencement & la fin,encor qu'ils
fussent, ne paroistroyent point en vn sujet
auquel ces choses paroissent le plus,
& auquel elles sont ordinairement remarquees
& recitees entre les hommes.
Or tels estoyent iadis les Rois, & les Sacrificateurs
en Israël : Car les Rois &
Princes sont de tous les hommes ceux
qu'on connoist le plus par leur extraction,
& leur mort : & dont les Historiens
ne se taisent pas , comme des autres
hommes , dont la condition n'est
pas de telle importance. On garde auec
soin les genealogies des Princes ; On
descrit & leur extraction & leur mort.
Et quant aux Sacrificateurs entre le
peuple de Dieu , estoit tenu registre
tres-exact de leur genealogie : pource
qu'on n'entroit en cette dignité qu'à
raison de l'extraction : dont vous lisez
Nohemie 7. qu'apres le retour de la captiuité,
les enfans d'Habaja, de Kotz &
de Berzilai, furent deboutés de la sacrificature,
pource qu'ils ne peurent monstrer
és registres leur genealogie. Et
quant à la mort , la sacrificature Leuitique
n'estant continuee que par la succession
[cession]

d'vn Sacrificateur à l'autre par
mort , il falloit que la mort aussi bien
que la naissance des Sacrificateurs fust
connuë. Mais voicy vn Roy & vn Sacrificateur
que l'Escriture propose au 14.
du Genese , en vne action tres-importante ,
sans nous rien proposer de son
origine & extraction, ni de sa fin:& sans
nous rien dire de luy que ce qui se passa
entre Abraham & luy : comme si cet
homme-là estoit venu du ciel pour cette
action-là, & estoit à l'instant disparu.
Si donc les choses sont dites n'estre
point selon qu'elles ne paroissent point,
là où elles sembloyent deuoir paroistre:
la genealogie de Melchisedech,sa naissance
& sa mort , par ce silence sont
comme n'estans point; veu notamment
qu'il s'agit icy des Escritures,desquelles
telle est l'authorité & l'excellence , en
faict de Religion,qu'on pretend les choses
estre où n'estre point , selon qu'elles
en parlent,ou s'en taisent. Si l'Escriture
n'a pas dit vne chose , nostre Apostre a
de coustume de n'en faire autre estat
que de ce qui n'est point.C'est son argument
en cette Epistre, chap. 1. Auquel

des Anges, dit-il, Dieu a-il onques dit, Tu
es mon Fils, ie t'ay aujourd'huy engendré?
Auquel des Anges a-il onques dit, Sieds toy
à ma dextre iusqu'à tant, &c . Car ces paroles
se reduisent à cet argument. En
matiere de Religion, ce que l'Escriture
ne dit point,n'est point. Or Dieu ne dit,
en nulle part de l'Escriture, à aucun des
Anges,Tu es mon fils,ie t'ay aujourd'hui
engendré, ni sieds toy à ma dextre.
Donc aussi cela n'est point, assauoir
qu'aucun des Anges ait l'honneur d'estre
le Fils que Dieu ait engendré, ou d'estre
esleue à la dextre de Dieu. Et quant à
ce que l'Apostre dit en ce chapitre touchant
Melchisedech,qu'il est tesmoigné
de luy qu'il est viuant. Il y a deux sortes
de tesmoignage, l'vn affirmatif, quand
on exprime formellement la chose : &
l'autre negatif, quand on donne à entendre
qu'elle est, ou qu'elle n'est pas,
par le silence : Et ainsi est-il tesmoigné
au liure de Genese, que Melchisedech
est viuant , d'vn tesmoignage negatif,
entant que l'histoire du liure de Genese
n'a rien dit de sa mort.

Or voyez icy la bonté & sagesse admirable
[rable]

de Dieu. Il a voulu que nous eussions
des ombres & figures de son Christ
en toutes choses. Il a voulu nous en
donner de sa Sacrificature en Aaron;de
sa Royauté en Dauid,& Salomon,& en
tous les Rois d'Israël : de sa charge de
Prophete, en tous les Prophetes : dont
vous oyez Isaye dire, comme figure de
Christ, Me voicy & les enfans que tu
m'a donnés. Mais Dieu a voulu passer
plus outre , & nous donner des figures
du Christ , non seulement au regard de
ses charges,mais aussi des accidens, dispositions,
& qualités de ses charges.
Pour exemple, quant au regne, il a voulu
donner des ombres de sa sapience &
de ses richesses celestes,& de sa paix, en
la Sapience de Salomon, és richesses &
en la paix de son regne. Quant à l'authorité
de sa charge de Prophete , il a
donné Moyse, lequel il falloit escouter
comme Dieu mesme. Donques il falloit,
afin que rien ne nous manquast, que
mesmes l'eternité du Christ nous fust figuree.
Et pourtant la sagesse de Dieu
a trouué à propos de mettre en auant és
Escritures ce Melchisedech. Et si vous

objectez encor , que cette ombre est
bien petite, & a peu de corps. Ie respon
qu'il y en a plusieurs,lesquelles vous reconnoissez,
qui n'en ont pas plus. Pour
exemple , La sagesse de Salomon qui a
esté fletrie des actes de grande folie , &
neantmoins a serui d'ombre à la sagesse
du Fils de Dieu : La paix du Royaume
de Salomon, qui fut bien-tost troublee,
& neantmoins est proposee comme figure
de la paix du regne de Iesus Christ
laquelle demeure à iamais : Les sacrifices
de la loy estoyent appelés propitiatoires ,
& neantmoins en effect ils ne
l'estoyent point, (car il est impossible
que le sang des taureaux & des boucs,
oste les pechés) & seulement nettoyoyent
les souïllés,quant à la chair, c'est à
dire, n'auoyent qu'vn nettoyement ceremoniel
& legal. Quoy? mesmes le
monde par sa rondeur , en laquelle on
ne voit ni commencement ni fin , est
vne image & symbole de l'eternité de
son Autheur, & neantmoins il a commencé
& prendra fin. Et la duree du
regne de Salomon, qui a pris fin auec
lui, est bien proposee comme figure de
[l'eternité]

l'eternité du regne de Iesus Christ.Ainsi
donc, en faict de type & de figure, pour
la perpetuité de la sacrificature,l'obmission
de la naissance & genealogie & de
la mort , suffisoit pour figurer vne eternité.
& vn estre par lequel Iesus Christ
seroit sans pere, sans mere, &c.

Or maintenant, quant à Iesus Christ,
vous entendez assez comment il est sans
pere, sans mere, &c. Assauoir sans Pere,
quant à sa nature humaine: sans mere,
quant à sa nature Diuine : sans genealogie,
& sans commencement , & fin de
iours, quant à la Diuinité : Si ce n'est
qu'au regard d'estre sans fin de iours,
vous consideriez aussi que depuis que
Iesus Christ a esté ressuscité des morts,
il ne peut plus mourir, s'estant acquis
vne vie celeste & spirituelle & glorieuse,
sur laquelle la mort n'a plus de domination.

Mais l'heure ne nous permettant pas
d'entrer és autres poincts, de la conuenance
de Christ & de Melchisedech,
Contentons-nous de rapporter cettui-
cy au but de l'Apostre. Et voyons ce
qui resulte de ce que Christ, en tant que

Sacrificateur , est sans commencement
de vie & sans fin de iours. Premierement,
de ce qu'il est sans commencement
de vie, nous apprenons qu'il est
vray Dieu, & par consequent le vray
Mediateur, qui d'vne vertu infinie nous
sauue de la mort en laquelle nous estiõs.
Car estre eternel,comme n'ayant aucun
commencement,& estre Dieu, est mesme
chose. Car estre sans commencement,
est estre par soy-mesme. Or estre
par soy-mesme , est estre Dieu. C'est
pourquoy il est dit Esaie 9. L'enfant
nous est né, le Fils nous est donné, on l'appelera
le Dieu fort & puissant, le Prince de
paix, le Pere d'eternité .

Secondement, nous apprenons qu'il
s'est presenté de toute eternité à Dieu
son Pere,comme nostre Mediateur:tellement
qu'encor qu'en certain temps
seulement il soit venu se presenter en
sacrifice, ayant reuestu nostre nature,
neantmoins de toute eternité Dieu
nous a regardés en lui,pour nous preparer
ses biens & sa gloire. Qui est-ce que
dit S. Paul Ephesiens 1. Dieu nous a esleus
en luy auant la fondation du monde . Et nostre
[stre]

Apostre Hebr. 13. Christ est le mesme
hier & aujourd'huy & eternellement . Ne
demandez pas donc comment les fideles
qui ont esté auant la venue de Iesus
Christ , ont peu obtenir remission de
leurs pechés , puis que Christ de toute
eternité comparoissoit deuant Dieu
comme pleige des pecheurs repentans.

En troisième lieu , de ce que Christ
est Sacrificateur sans fin de iours à la façon
de Melchisedech , il s'ensuit qu'il
n'y a aucun qui luy succede : Et partant
establir sous le Nouueau Testament Sacrificateurs
selon l'ordre de Melchisedech,
qui se succedent l'vn à l'autre par
mort,(comme l'Eglise Romaine en establit)
est combattre la verité de cette figure.
Car cette eternité du Christ figuree
en Melchisedech est proprement
pour estre opposee aux Sacrificateurs
Leuitiques,ausquels on succedoit. Aussi
quand l'Apostre dit en ce chapitre, que
Iesus Christ a vne sacrificature perpetuelle,
le mot de perpetuelle en la langue
de l'Apostre, signifie qui ne passe point
à vn autre.

Ainsi nous faut-il remarquer que nostre
texte renuerse le fondement que
nos Aduersaires prennent de leur Sacrifice
de la Messe , lequel ils disent
estre le Sacrifice de l'ordre de Melchisedech ,
entant que Melchisedech
offrit à Dieu Sacrifice de pain & de vin.
Car n'est-ce pas chose estrange qu'ils
posent vne chose,de laquelle,ny Moyse,
ny l'Apostre n'a dit vn seul mot ! Non
Moyse, duquel voicy les mots , Melchisedech
außi Roy de Salem apporta pain &
vin : Et il estoit Sacrificateur du Dieu Souuerain,
& benit Abraham . Or ce fut à
Abraham & à ses gens qu'il offrit cela,
& non à Dieu. Et ce present de pain &
de vin, concernoit la liberalité Royale
de Melchisedech enuers des gens , qui
estans lassés du combat,auoyent besoin
de rafraichissement. Et est à remarquer
que le mot de pain en l'Escriture se
prend en general pour viures & viandes:
Et que le mot d'offrir n'y est point:mais
le mot d'apporter , mettre en auant , tirer ,
faire tirer hors : car c'est le mot que l'Escriture
employe , quand elle dit que
Dieu tira son peuple hors d'Egypte : comme
[mesmes]

mesmes la version Canonique de l'Eglise
Romaine n'a pas le mot d'offrir,
mais le mot d'apporter & mettre en auant.
Et quant à ce que la qualité de Sacrificateur
est donnee à Melchisedech, c'est
pour rendre la raison pour laquelle il ait
eu authorité de benir Abraham , & de
receuoir de luy la disme. Mais l'erreur
est venu que la Version Vulgaire a fourré
vn mot de Car, là où l'Hebreu n'auoit que
le mot de Et : Et qu'au lieu de traduire
simplement selon l'Hebreu , Et il estoit
Sacrificateur du Dieu Souuerain ,elle a mis,
Car il estoit Sacrificateur du Dieu Souuerain :
ce qui fait imaginer que Moyse
rendoit raison de l'action de Melchisedech
apportant pain & vin:& que pourtant
il y auoit eu en cela vn sacrifice.Au
lieu que si on eust gardé le mot, Et, on
eust peu rapporter cela à la suite , assauoir
à ce que Melchisedech benit Abraham,
& receut la disme. Et ce que nous
disons est si euident , que voicy la confession
qu'en fait le Cardinal Cajetan
en ses commentaires sur ce lieu : Il n'est
rien escrit icy, dit-il, touchant un sacrifice
ou une oblation, mais touchant une action

de mettre en auant ou tirer hors , laquelle ,
Ioseph dit auoir esté faite pour rafraischir les
victorieux. Car quant à ce qu'en l'Edition
Vulgaire , il est adjousté comme pour cause
d'oblation ; Car il estoit Sacrificateur du
Dieu Souverain, il n'est pas en l'Hebreu
comme cause , mais comme une clause separee,
assauoir, & il estoit Sacrificateur au
Dieu Souuerain, entant que Moyse ioint à
la dignité & liberalité Royale la dignité Sacerdotale.
Or si Moyse n'a rien dit touchant
aucun sacrifice de Melchisedech,
S. Paul n'en a non plus parlé. Car voicy
ses paroles , Melchisedech estoit Roy de
Salem, Sacrificateur du Dieu Souuerain, lequel
vint au deuant d'Abraham comme
il reuenoit de la deffaite des Rois, & le benit:
auquel Abraham departit la disme de tout .
Sur quoi donc,Docteurs de l'Eglise Romaine,
auez-vous basti ce sacrifice que
vous pretendez offrir pour les pechés
des viuans & des morts,sous les especes
du pain & du vin de l'Eucharistie? Auez
vous leu l'Escriture pour la suiure , ou
pour inuenter ce qu'elle ne disoit point?
Car mesme l'Apostre a passé par dessus
l'action de Melchisedech apportant
[pain]

pain & vin : Il n'a pas voulu la rapporter
au nombre des conuenances qui sont
entre Christ & Melchisedech:& n'a pas
dit vn mot de pain & de vin. Pourquoi
cela?L'Esprit de Dieu qui le conduisoit,
l'a ainsi dispensé,pour ne donner occasion
à l'erreur qu'il preuoyoit. Car bien
que nous ne nions pas , qu'il n'y ait
quelque conuenance entre Christ &
Melchisedech en cecy , assauoir, que
comme Melchisedech sustenta de pain
& de vin Abraham & ses gens fatigués
du combat qu'ils auoyent eu contre
leurs ennemis : Ainsi Iesus Christ nous
sustente icy bas au combat que nous
auons contre Satan & le monde par le
Sacrement du pain & du vin en la saincte
Cene,nous nourrissant spirituellement
de son Corps & de son Sang : Neantmoins
l'Apostre n'allegue point cette
conuenance. D'où s'ensuit qu'elle ne
pouuoit estre prise pour fondement
d'vn culte & sacrifice en l'Eglise Chrestienne:
Outre qu'il n'y a nulle consequence
de la nourriture que Iesus Christ
nous donne par le Sacrement de son
Corps & de son Sang, à vn sacrifice reel

qui s'y face de son Corps & de son Sang
sous des apparẽces de pain et de vin.Car
ce que nous sommes sustentés du Corps
& du Sang de Christ , est que ce corps
& ce sang ayant esté vne fois offerts en
sacrifice en la Croix,nos ames en reçoiuent
consolation & sanctification : assauoir
quand nous ramenteuons par vraye
foy ce que Iesus Christ a fait pour nous
en la Croix, selon qu'il dit , faites cecy en
memoire de moy , & l'Apostre, toutesfois &
quantes que vous mangerez de ce pain &
boirez de cette coupe , vous annoncerez la
mort du Seigneur , iusqu'à ce qu'il vienne .

Pour finir ce propos, mes freres, faisons
encor sur nostre texte quelque obseruation
pour nostre instruction & consolation.
C'est que si nous auons vn Sacrificateur
eternel: comme il surmonte
tous les Siecles, aussi il n'y a peché si
grand qu'il ne surmonte:car Iesus Christ
ne peut estre Sacrificateur eternel en
duree, qu'il ne soit infini en vertu. Partant
recourez,pecheurs , à ce Sacrificateur,
lequel quand vos pechés seroyent
rouges comme cramoisi , les blanchira
comme la neige, si vous vous adressez à
[luy]

luy par repentance & foy.

Et puis qu'il est sans fin Sacrificateur,
intercedant pour nous à la dextre de
Dieu, receuez, fideles, la consolation
que vous donne S.Iean, disant, Bien-aimés
si nous auons peché,nous auons vn
Aduocat enuers le Pere, Iesus Christ le
iuste , qui est la propitiation pour nos
pechés. Nos infirmités estans grandes,
& les tentations violentes,si IesusChrist
apres nous auoir reconciliés à Dieu,
nous eust abandonnés,nous luy eussions
aisément esté rauis. Mais intercedant
continuellement pour nous , nous sommes
releués de nos cheutes,& soustenus
contre les tentations , & rendus plus
que vainqueurs en toutes choses. De
sorte que son intercession nous asseure
de nostre perseuerance en son salut.

Mais aussi si sa Sacrificature n'a point
de fin , s'ensuit-il pas de là que nous ne
deuons point mettre de fin à nostre
amandement & sanctification , qui est
le sacrifice , auquel il nous faut vaquer,
en crucifiant la chair avec ses conuoitises.
O homme, Iesus Christ t'a consacré
pour tousiours, par l'eternité de son

sacrifice : Pourquoy donc maintenant
t'abandonnes-tu au peché? Pourquoy
cesses-tu ce qui doit estre perpetuel,
assauoir le sacrifice du renoncement à
toy-mesmes? Le Dieu souuerain auroit-
il fait son Christ Sacrificateur à tousiours,
afin que ta sanctification ne fust que de
quelques heures , & de quelques iours?
Offrons donc continuellement nos
corps en sacrifice viuant,sainct,plaisant
à Dieu, qui est nostre raisonnable seruice:
Offrons sacrifice de loüange à tousjours
à Dieu, confessans son Nom.

Et s'il faut vous monstrer plus amplement
l'analogie & conuenance qu'il y a
de nous à Christ. Christ est sans pere &
sans mere ; & toy Chrestien as vne naissance
spirituelle , en laquelle tu n'as ny
pere ny mere charnels. Car S.Iean dit-il
pas,que ceux qui ont creu en IesusChrist
ne sont point nés de sang,ny de la volonté
de la chair ny de la volonté de l'homme ,
mais sont nés de Dieu?Iesus Christ
estoit Roy & Sacrificateur. Et Sainct
Iean dit-il pas Apocalypse 1. que Iesus
Christ nous a fait Rois & Sacrificateurs
à Dieu son Pere? Et si Melchisedech apporta
[porta]

pain & vin pour en sustenter Abraham
& ses gens , sont-ce pas les œuvres
de charité par lesquelles vous deuez
donner à manger & boire à celuy qui a
faim & soif, & subuenir aux necessités
de vos prochains? Ce sont icy, ce sont
icy ces sacrifices ausquels l'Escriture
vous exhorte de vaquer: Ne mettez point
en oubly, dit l'Apostre en cette Epistre, la
beneficence & communication ; car Dieu
prend plaisir à tels sacrifices .Melchisedech
alla au deuant d'Abraham , allez au deuant
du pauure & de l'affligé. et si l'Apostre
nous a dit,que Melchisedech vint
au deuant d'Abraham, quand il retournoit
de la deffaite des Rois : sçachez
aussi, mes freres , que quand nous vaquerons
à la deffaite du peché en nos
membres,& au combat contre nos
conuoitises charnelles , & que nous aurons
vaincu le peché & le monde , ce grand
Melchisedech viendra à nous , auec le
pain & le vin de ses consolations celestes,
il rassasiera nostre ame des biens de
son Paradis, & nous donnera sa benediction
eternelle: Ainsi soit il.